ଜ୍ୟୋତି କୁମାରୀ ପାଶ୍ୱାନ୍ । ଅଷ୍ଟମ ଶ୍ରେଣୀରେ ପାଠ ପଢ଼ୁଥିବା ବିହାର ଦରଭଙ୍ଗାର ଏହି ୧୫ ବର୍ଷୀୟା ଝିଅଟିର କର୍ତ୍ତବ୍ୟ ଓ ସାହାସିକତାକୁ ନେଇ ଆଜି ସବୁଆଡ଼େ ଚର୍ଚ୍ଚା । ଖାଲି ଆମ ଦେଶ ନୁହେଁ, ହ୍ୱାଇଟ୍ ହାଉସ୍ ରେ ବି ତାଙ୍କର ଚର୍ଚ୍ଚା । ଲକ୍ ଡାଉନ୍ ସମୟରେ ରୋଜଗାର ହରାଇଥିବା ଅସୁସ୍ଥ ବାପାଙ୍କୁ ୧୨୦୦ କିଲୋମିଟର ରାସ୍ତା ସାଇକେଲରେ ନିଜ ଘରକୁ ବୋହି ଆଣିବା ଏକ ଫିଲ୍ମ କାହାଣୀ ଭଳି ମନେ ହେଉଥିଲେ ମଧ୍ୟ ଜ୍ୟୋତି ବାସ୍ତବ ଜୀବନରେ କରିକି ଦେଖାଇଛନ୍ତି ।
ବିହାର ଦରଭଙ୍ଗା ଜିଲ୍ଲାର ନିହାତି ମଫସଲ ଗାଁ ସିରହୁଲି ବାସିନ୍ଦା ମୋହନ ପାଶ୍ୱାନ୍ ଙ୍କ ବଡ଼ ଝିଅ ଜ୍ୟୋତି କୁମାରୀ । ପିଲାଙ୍କୁ ପାଠ ପଢ଼ାଇବା ସହ ପରିବାର ପେଟକୁ ଦାନା ଦେବା ପାଇଁ ମୋହନ ସୁଦୂର ହରିଆନାର ଗୁରୁଗାଁରେ ଏକ କାରଖାନାରେ କାମ କରୁଥିଲେ । କିଛି ମାସ ତଳେ ଏକ ଦୁର୍ଘଟଣାରେ ଆହତ ହୋଇଥିଲେ ମଧ୍ୟ କଷ୍ଟମଷ୍ଟେ କାମ କରୁଥିଲେ । ଆହତ ବାପାଙ୍କ ଦେଖାଶୁଣା ପାଇଁ ଝିଅ ଜ୍ୟୋତି ତାଙ୍କ ପାଖକୁ ଚାଲିଯାଇଥିଲେ । ଏହି ସମୟରେ ଦେଶରେ ଲକ୍ ଡାଉନ୍ ଘୋଷଣା ହେଲା । କାରଖାନା ବନ୍ଦ ହୋଇଯିବାରୁ ରୋଜଗାର ହରାଇଲେ ମୋହନ । ଘରଭଡ଼ା ଦେଇପାରିଲେନି । ଘର ଭଡ଼ା ନ ଦେଲେ ଘର ଛାଡ଼ିଦେବାକୁ ଘର ମାଲିକ ତାଗିଦ୍ କଲେ ।
ରୋଜଗାର ନ ଥିବାରୁ ଘରଭଡ଼ା ଦେବା ମୋହନଙ୍କ ପକ୍ଷେ ସମ୍ପୂର୍ଣ୍ଣ ଅସମ୍ଭବ ଥିଲା । ପାଖରେ କିଛି ପଇସା ନ ଥିବାରୁ ନିଜ ପାଇଁ ଔଷଧ କି ବାପଝିଅଙ୍କ ଖାଇବା ବି ଯୋଗାଡ଼ କରିପାରିଲେନି । ଲକ୍ ଡ଼ାଉନ୍ ପାଇଁ ଘରକୁ ଫେରିବା ବି ତାଙ୍କ ପାଇଁ ସ୍ୱପ୍ନ ଥିଲା । ସମ୍ପୂର୍ଣ୍ଣ ଭାଙ୍ଗିପଡ଼ିଲେ ମୋହନ । ବାପାଙ୍କର ଏହି କଷ୍ଟ ଆଖିରେ ଦେଖୁଥିବା ଝିଅ ଜ୍ୟୋତି ସାହାସ ବାନ୍ଧିଲେ । ନିଜ ପାଖରେ ଯାହା ପଇସାପତ୍ର ଥିଲା ସେଥିରେ ଗୋଟିଏ ପୁରୁଣା ସାଇକେଲ୍ କିଣିଲେ । ଗୋଟିଏ ବ୍ୟାଗ୍ ରେ ନିହାତି ଆବଶ୍ୟକୀୟ ଜିନିଷପତ୍ର ପୂରେଇ ଗାଁ କୁ ବାହାରିଲେ ।
