ନୂଆଦିଲ୍ଲୀ: କିଛି ଆର୍ଥିକ ନୀତିକୁ ନେଇ ନେଇ ରିଜର୍ଭ ବ୍ୟାଙ୍କ ଓ କେନ୍ଦ୍ର ସରକାରଙ୍କ ମଧ୍ୟରେ ଟଣାଓଟରା ଲାଗି ରହିଥିବା ବେଳେ ଆଜି ରିଜର୍ଭ ବ୍ୟାଙ୍କ ଗଭର୍ଣ୍ଣର ଉର୍ଜିତ ପଟେଲ ତାଙ୍କ ପଦରୁ ଇସ୍ତଫା ଦେଇଛନ୍ତି । ବ୍ୟକ୍ତିଗତ କାରଣରୁ ଇସ୍ତଫା ଦେଉଥିବା ସେ ତାଙ୍କ ପତ୍ରରେ ଉଲ୍ଲେଖ କରିଛନ୍ତି । ୧୦ ମାସ କାର୍ଯ୍ୟକାଳ ବାକି ଥିବା ବେଳେ ଉର୍ଜିତ ତାଙ୍କ ପଦ ଛାଡ଼ିଛନ୍ତି । ୨୦୧୬ ମସିହା ସେପ୍ଟେମ୍ବରରେ ରଘୁରାମ ରାଜନ୍ ଙ୍କଠାରୁ ଦାୟିତ୍ୱ ଗ୍ରହଣ କରିଥିବା ଉର୍ଜିତ ଙ୍କ କାର୍ଯ୍ୟକାଳ ଆସନ୍ତାବର୍ଷ ସେପ୍ଟେମ୍ବର ମାସରେ ପୂରିଥାଆନ୍ତା ।
ରିଜର୍ଭ ବ୍ୟାଙ୍କ(ଆରବିଆଇ)ର ସ୍ୱାଧୀନତା, ଗଚ୍ଛିତ ପାଣ୍ଠି ଏବଂ ଅଚଳ ଋଣ ପରିଚାଳନା ବ୍ୟବସ୍ଥା ଉପରେ କେନ୍ଦ୍ର ସରକାରଙ୍କ ଅଯଥା ହସ୍ତକ୍ଷେପକୁ ନେଇ କିଛି ମାସ ହେଲା ଉଭୟ ପକ୍ଷ ମଧ୍ୟରେ ଟଣାଓଟରା ଲାଗିଛି । ଋଣ ପ୍ରଦାନ ସୀମାରେଖା ହ୍ରାସ ଏବଂ ଆରବିଆଇରେ ଗଚ୍ଛିତ ବଳକା ପାଣ୍ଠିର ପରିଚାଳନାରେ କେନ୍ଦ୍ର ସରକାର ହସ୍ତକ୍ଷେପ ଚାହୁଁଥିବାରୁ ଏଭଳି ଅବସ୍ଥା ସୃଷ୍ଟି ହୋଇଛି । ଗତମାସରେ ଆରବିଆଇର ବୋର୍ଡ ବୈଠକ ଦୀର୍ଘ ଦୀର୍ଘ ୯ ଘଣ୍ଟାର ଅଧିକ ସମୟ ବସ ଏ ପ୍ରସଙ୍ଗରେ ଆଲୋଚନା ହୋଇ କିଛି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଥିଲା । ଆସନ୍ତା ୧୪ ତାରିଖରେ ବୋର୍ଡର ପୁଣି ଏକ ଗୁରୁତ୍ୱପୂର୍ଣ୍ଣ ବୈଠକ ବସିବାର ଅଛି । ମାତ୍ର ଆଜି ସଂଧ୍ୟାରେ ଶ୍ରୀ ପଟେଲ ଅଚାନକ ତାଙ୍କ ପଦରୁ ଇସ୍ତଫା ଦେବା ସମସ୍ତଙ୍କୁ ଚକିତ କରିଛି ।
ଗତ ମାସରେ ରିଜର୍ଭ ବ୍ୟାଙ୍କର ଡେପୁଟି ଗଭର୍ଣ୍ଣର ବିରଳ ଆଚାର୍ଯ୍ୟ ଆରବିଆଇର ସ୍ୱାଧୀନତା ସପକ୍ଷରେ ଖୋଲାଖୋଲି ଯୁକ୍ତି ରଖିବା ପରେ କେନ୍ଦ୍ର ସରକାରଙ୍କ ସହ ମତପାର୍ଥକ୍ୟ ପଦାକୁ ଆସିଥିଲା । ଉର୍ଜିତ ପଟେଲ ତାଙ୍କ ପଦ ଛାଡୁଥିବା ଚର୍ଚ୍ଚା ହୋଇଥିଲା । ସୂଚନାଯୋଗ୍ୟ, ଉର୍ଜିତଙ୍କୁ ଆଖିରେ ରଖି ରଘୁରାମ ରାଜନ୍ ଙ୍କୁ ଦ୍ୱିତୀୟ ଥର ପାଇଁ ଆରବିଆଇ ଗଭର୍ଣ୍ଣର କରିବାକୁ କେନ୍ଦ୍ର ସରକାର ଅମଙ୍ଗ ହୋଇଥିଲେ । ମାତ୍ର ସେହି କେନ୍ଦ୍ର ସରକାରଙ୍କ ପାଇଁ ଉର୍ଜିତ ନିଜ ପଦ ଛାଡ଼ିଥିବା କୁହାଯାଉଛି ।
