ଭୁବନେଶ୍ୱର: ରାଜନୀତିରେ କିଏ କାହାରିକୁ ବିରୋଧ କରିବେ ତାହା ଭିନ୍ନ କଥା । ମାତ୍ର ନିଜ ମାଟି ମାଆ ର ଇଜ୍ଜତ ଉପରେ ବ୍ୟକ୍ତିଗତ ସ୍ୱାର୍ଥ ସିଦ୍ଧର ଅଭିଳାଷ ରଖିବା ନିହାତି ସାଂଘାତିକ କଥା । ପୂର୍ବତନ ସାଂସଦ ବୈଜୟନ୍ତ ପଣ୍ଡା ଏବଂ ତାଙ୍କ ପତ୍ନୀ ତଥା ଓଟିଭିର ସହ ପ୍ରତିଷ୍ଠାତା ଜାଗି ମଙ୍ଗତ ପଣ୍ଡାଙ୍କ ଟୁଇଟର ପେଜ୍ ରୁ ଏହାର ଦୃଷ୍ଟାନ୍ତ ଦେଖିବାକୁ ମିଳିଛି । ଦୁଇବର୍ଷ ତଳେ ଓଡ଼ିଆ ଜାତିକୁ ଉପହାସ କରିଥିବା ସୁପ୍ରିମକୋର୍ଟର ଅବସରପ୍ରାପ୍ତ ବିଚାରପତି ମାର୍କଣ୍ଡେୟ କାଟଜୁ ଏବେ ଟୁଇଟ୍ ଜରିଆରେ ରାଜ୍ୟ ସରକାରଙ୍କୁ କାର୍ଟୁନ୍ କରି କାର୍ଯ୍ୟାନୁଷ୍ଠାନର ଆହ୍ୱାନ ଦେଇଛନ୍ତି । ଆଉ ତାଙ୍କ ଟୁଇଟ୍ କୁ ଲାଇକ୍ ମାରିଛନ୍ତି ବୈଜୟନ୍ତ ଓ ଜାଗି। ଅର୍ଥାତ୍ କାଟଜୁ ଯାହା କହୁଛନ୍ତି ପଣ୍ଡା ଦମ୍ପତ୍ତିଙ୍କୁ ଭଲ ଲାଗିଛି ।
ବୈଜୟନ୍ତଙ୍କ ବନ୍ଧୁ ଅଭିଜିତ୍ ଆୟାର ମିତ୍ରଙ୍କୁ ନେଇ ଏହି ପ୍ରସଙ୍ଗ ଉଠିଛି । ଓଡ଼ିଆ, ଓଡ଼ିଶାର କଳା, ସଂସ୍କୃତି ଓ ବିଧାୟକମାନଙ୍କ ପ୍ରତି ଅଭଦ୍ର ଓ ଅରୁଚିକର ମନ୍ତବ୍ୟ ଦେଇ ଅଭିଜିତ୍ ଜେଲ୍ ଯାଇଥିଲେ । ୪୩ ଦିନ ବନ୍ଦୀ ରହିବା ପରେ ଗତ ଗୁରୁବାର ଦିନ ମୁକୁଳିଛନ୍ତି । ତେବେ ଅଭିଜିତ୍ ଙ୍କ ମନ୍ତବ୍ୟକୁ ସମର୍ଥନ ସହ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନକୁ ନାପସନ୍ଦ କରିଛନ୍ତି ଅବସରପ୍ରାପ୍ତ ବିଚାରପତି କାଟଜୁ । ଦୁଇବର୍ଷ ତଳେ ଓଡ଼ିଆ ଜାତିକୁ ନେଇ ଏହି କାଟଜୁ ଉପହାସ କରିଥିଲେ । ଓଡ଼ିଆ ଜାତିର ଭାବାବେଗକୁ ଆଘାତ ଦେଇଥିଲେ । ଏବେ ସେହି କଥା ମନେ ପକାଇଛନ୍ତି କାଟଜୁ । ଓଡ଼ିଶା ସରକାରଙ୍କ ଉଦ୍ଦେଶ୍ୟରେ ଟୁଇଟ୍ କରି କହିଛନ୍ତି, ମୁଁ ମଧ୍ୟ ତୁମକୁ ପୂର୍ବରୁ ଉପହାସ କରିଥିଲି ଯାହା ମୋ ପୂର୍ବ ଫେସବୁକ୍ ପୋଷ୍ଟରେ ଉଲ୍ଲେଖ ଅଛି । ତେଣୁ ମୋତେ କେବେ ଜେଲ୍ ହାଜତରେ ଭର୍ତ୍ତି କରିବ? କାଟଜୁ ତାତ୍ସଲ୍ୟ କରି ଲେଖିଛନ୍ତି ଯେ ଅଭିଜିତ୍ ଆୟାର ମିତ୍ର ଭଳି ମୁଁ ନିଶ୍ଚିତ କ୍ଷମା ମାଗିବି । କିନ୍ତୁ କ୍ଷମା ଦେବା ପୂର୍ବରୁ ମତେ ନିଶ୍ଚିତ ୪୩ ଦିନ ଜେଲ୍ ରେ ରଖିବାକୁ ପଡ଼ିବ ।
କାଟଜୁ ଏଭଳି ଟୁଇଟ୍ କରି ଓଡ଼ିଶାବାସୀ ଓ ଓଡ଼ିଶା ସରକାରଙ୍କୁ ପରୋକ୍ଷରେ ଚାଲେଂଜ ଦେଇଛନ୍ତି । ଯଦି ସାହାସ ଅଛି ମୋତେ ଗିରଫ କରି ୪୩ ଦିନ ଜେଲ୍ ରେ ରଖ ବୋଲି ଆହ୍ୱାନ ଜଣାଇଛନ୍ତି । କାଟଜୁ ଙ୍କ ଏହି ଟୁଇଟ୍ ରାଜ୍ୟବାସୀଙ୍କ ମନରେ ପ୍ରବଳ ପ୍ରତିକ୍ରିୟା ସୃଷ୍ଟି କରିଛି । ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ସବୁ ମହଲରୁ ଦାବି ହେଲାଣି ।
ହେଲେ ଆଶ୍ଚର୍ଯ୍ୟ ଓ ପରିତାପର କଥା ଯେ କାଟଜୁ ଙ୍କ ଏହି ଟୁଇଟ୍ ଉପରେ ଲାଇକ୍ ମାରିଛନ୍ତି ବୈଜୟନ୍ତ ଓ ଜାଗି । ଏକଥା ସମସ୍ତେ ଜାଣନ୍ତି, ବନ୍ଧୁ ଅଭିଜିତ୍ ଆୟାରଙ୍କୁ ନିଜ ହେଲିକପ୍ଟରରେ ପୁରୀ, କୋଣାର୍କ ଓ ଚିଲିକା ବୁଲାଇଥିଲେ ବୈଜୟନ୍ତ । ଓଡ଼ିଶା ବିରୋଧରେ ଅଭିଜିତ୍ ଲଗାତର ଟିପ୍ପଣି ଦେଲା ବେଳେ ବୈଜୟନ୍ତ ତାକୁ ପସନ୍ଦ କରୁଥିଲେ । କୋଣାର୍କ ବିରୋଧରେ ଅଭିଜିତ୍ ଙ୍କ ମନ୍ତବ୍ୟ ବୈଜୟନ୍ତଙ୍କୁ ବାଧି ନ ଥିଲା । ଅଭିଜିତ୍ ଙ୍କ ବିରୋଧରେ କାର୍ଯ୍ୟାନୁଷ୍ଠାନକୁ ସେ ବିରୋଧ କରି ଆସୁଥିଲେ ।
ଏବେ ଅଭିଜିତ୍ ଆୟାର ମନ୍ତବ୍ୟକୁ ସମର୍ଥନ ଜଣାଇଥିବା ଜଣାଶୁଣା ଓଡ଼ିଆ ବିରୋଧୀ ଜଷ୍ଟିସ୍ କାଟଜୁ ଙ୍କ ଟୁଇଟ୍ ବୈଜୟନ୍ତ ଓ ତାଙ୍କ ପତ୍ନୀଙ୍କୁ ଭଲ ଲାଗିବା ଓଡ଼ିଆଙ୍କ ଭାବାବେଗକୁ ଆହୁରି ଆଘାତ ଆଣିଛି । ଓଡ଼ିଶାର ପୁଅ ବୋହୁ ହୋଇ ଓଡ଼ିଆ ଜାତିର ସମ୍ମାନ ଓ ଭାବାବେଗ ପ୍ରତି ସେମାନଙ୍କର ଆଭିମୁଖ୍ୟ ଏବେ ବିଭିନ୍ନ ମହଲରେ ଚର୍ଚ୍ଚାର ବିଷୟ ହୋଇଛି ।
