ଏମାନଙ୍କୁ କହିବା ଡିହ ଗାଲୁଆ!

ଭୁୁବନେଶ୍ୱର: ଆମ ଓଡ଼ିଆରେ ଗୋଟେ କଥନ ଅଛି ଯେ ଗାଲୁଆ କ’ଣ ଗଛରୁ ଫଳନ୍ତି! ଆଜି ଭୁବନେଶ୍ୱରରେ ସଟ୍ ଡାଉନ୍ ବେଳେ ଏମିତିକା ଗାଲୁଆ ନୁହେଁ ତ ଡିହ ଗାଲୁଆଙ୍କୁ ଦେଖିବାକୁ ମିଳିଛି । ଶେଷରେ ସଟ୍ ଡାଉନ୍ ବା କର୍ଫ୍ୟୁ ଭଳି କଟକଣାକୁ ମଧ୍ୟ ସେମାନେ ଭ୍ରୃକ୍ଷେପ କରିନାହାନ୍ତି । ରାସ୍ତାକୁ ଆସିବାର ବିଭିନ୍ନ ଆଳ ଦେଖାଇଥିଲେ ମଧ୍ୟ ପୁଲିସକୁ ତାହା ସନ୍ତୁଷ୍ଟ କରିନାହିଁ ।

ମୋଟାମୋଟି କହିଲେ ପ୍ରଧାନମନ୍ତ୍ରୀ, ମୁଖ୍ୟମନ୍ତ୍ରୀଙ୍କଠାରୁ ଆରମ୍ଭ କରି ରାଜ୍ୟ ପ୍ରଶାସନ, ପୁଲିସ କାହାରି ଅନୁରୋଧ କିମ୍ବା ତାଗିଦ୍ ସେମାନଙ୍କୁ କାଟୁ କରିନି । କରୋନା ଭୟବହତା ବଢ଼ୁଥିବା ବେଳେ ନିଜର, ପରିବାରର ଓ ଲକ୍ଷ ଲକ୍ଷ ଓଡ଼ିଶାବାସୀଙ୍କର ଜୀବନକୁ ବାଜି ଲଗାଇବାକୁ ଦୁଃସାହସ କରିଛନ୍ତି ।

କାଲି ମୁଖ୍ୟ ଶାସନ ସଚିବ ଓ ଡିଜି ଘୋଷଣା କରିଥିଲେ ଯେ ସଟ୍ ଡାଉନ୍ ବେଳେ ଯେଉଁମାନେ ରାସ୍ତାକୁ ଆସିବେ ସେମାନଙ୍କଠାରୁ ଫାଇନ୍ ଆଦାୟ ହୋଇ ମାମଲା ରୁଜୁ ହେବ, ୧୪ ଦିନିଆ ବାଧ୍ୟତାମୂଳକ କ୍ୱାରେଣ୍ଟାଇନ୍ ରେ ରଖାଯିବ । ସେହି ଅନୁଯାୟୀ, ସଟ୍ ଡାଉନ୍ କଟକଣା ଭାଙ୍ଗିଥିବା ଡିହ ଗାଲୁଆ ଓ ଅମାନିଆଙ୍କୁ ଆଜି ରାସ୍ତାରୁ ଉଠାଇ ନେଇଛି ପୁଲିସ । ଏହି ରିପୋର୍ଟ ହେଲାବେଳକୁ, ରାଜଧାନୀର ବିଭିନ୍ନ ରାସ୍ତାରେ ବୁଲୁଥିବା ୪୫ ଜଣଙ୍କୁ ପୁଲିସ ଧରିନେଇ କ୍ୱାରେଣ୍ଟାଇନ୍ ରେ ଛାଡ଼ିଛି । ନିୟମ ଭାଙ୍ଗିଥିବା ଅନ୍ୟ ୬୪ ଜଣଙ୍କୁ ପୁଲିସ ଅଟକ ରଖିଛି । କଟକ, ଭଦ୍ରକ ଓ ଯାଜପୁରରୁ ମଧ୍ୟ ଏଭଳି ଡିହ ଗାଲୁଆଙ୍କ ଖବର ଆସୁଛି ।

କରୋନା ସଂକ୍ରମଣ ଭୟରେ ରାଜଧାନୀବାସୀ ନିଜ ଘରେ ବନ୍ଦୀ ଜୀବନ ବିତାଉଛନ୍ତି । ସରକାରଙ୍କ କଟକଣାକୁ ମାନି ଚଳୁଛନ୍ତି । କାରଣ ନିୟମ ଭାଙ୍ଗିଲେ ନିଜର ଓ ପରିବାରର ହିଁ କ୍ଷତି । ଇତିମଧ୍ୟରେ ଓଡ଼ିଶାରେ କରୋନା ସଂକ୍ରମଣଙ୍କ ସଂଖ୍ୟା ୨୦ ରେ ପହଞ୍ଚିଲାଣି । କେବଳ ଭୁବନେଶ୍ୱରରୁ ୧୪ ଜଣ କରୋନାରେ ଆକ୍ରାନ୍ତ ହୋଇଛନ୍ତି । ଗୋଷ୍ଠୀ ସଂକ୍ରମଣ ଆଶଙ୍କା ଦୃଷ୍ଟିରୁ ସରକାର କଡ଼ା କଟକଣା ଲଗାଇଲା ବେଳକୁ ଏହି ଅମାନିଆଙ୍କ ଆଚରଣ ବଦଳୁନାହିଁ । ଲକ୍ ଡାଉନ୍ ଫୁ କରିବା ପରେ ସଟ୍ ଡାଉନ୍ କୁ ବି ଗିଳିବାକୁ ବସିଛନ୍ତି ।

ଅମାନିଆଙ୍କ ଏହି ଆଚରଣ ସରକାରଙ୍କୁ ଚିନ୍ତାରେ ପକାଇଥିଲା ବେଳେ ଜନସାଧାରଣ ମଧ୍ୟରେ ପ୍ରବଳ ପ୍ରତିକ୍ରିୟାଶୀଳ ସୃଷ୍ଟି କରିଛି । ଏମାନଙ୍କୁ ମାଡ ମାରି ଜେଲ୍ ରେ ପୂରାଇ ଦେବା କଥା ବୋଲି ଅନେକ ମତ ଦେଉଛନ୍ତି । ସମସ୍ତଙ୍କ ଜୀବନକୁ ଏମାନେ ବିପଦ ମୁହଁକୁ ଠେଲି ନିଜେ ଭୟଙ୍କର କରୋନା ଭୂତାଣୁ ସାଜିଛନ୍ତି । ଜନସାଧାରଣଙ୍କ ସୁରକ୍ଷା ପାଇଁ ଦିନରାତି ଅକ୍ଲାନ୍ତ ପରିଶ୍ରମ କରୁଥିବା ପୁଲିସ ପାଇଁ ମଧ୍ୟ ବଡ଼ ବୋଝ ହୋଇଛନ୍ତି ।