ଭୁବନେଶ୍ୱର: ଏଠି କଂଗ୍ରେସ ସ୍ଥିତି ଆହୁରି ସଙ୍ଗୀନ ହେଲାଣି । ତାରା ବାହିନୀପତି ଓ ସୁର ରାଉତରାୟଙ୍କ କଯ୍ୟା ଶୁଣି ଲଜ୍ଜା ଲାଗୁଛି । ଗାଁ ଦାଣ୍ଡରେ ମାଇପିଙ୍କ କଳିଠାରୁ ଏହା କମ୍ ନୁହେଁ । ପ୍ରସାଦ ହରିଚନ୍ଦନ ଓ ବିଧାୟକ ଗୋଷ୍ଠୀ ମଧ୍ୟରେ ଲାଗିରହିଥିବା ତିକ୍ତତାର ଏହି ଝଲକ ରାଜ୍ୟ କଂଗ୍ରେସକୁ ଅଧିକ କ୍ଷତାକ୍ତ କରିଛି । ବିଜେଡ଼ି ଓ ବିଜେପି କ୍ଷମତା ଦଖଲ ପାଇଁ ବଳ କଷାକଷିରେ ମନ ଦେଇଥିଲା ବେଳେ କଂଗ୍ରେସରେ ନିଜ ନିଜ ଭିତରେ ବଳ କଷାକଷି ବୁଦ୍ଧିଜୀବୀଙ୍କୁ ଲଜ୍ଜିତ କରିଛି ।
ବହୁ ଦିନ ଆଗରୁ ପ୍ରସାଦ ହଟାଓ ଜୋସ୍ ଧରିଛି ତାରା ବାହିନୀପତିଙ୍କୁ । ଦଳର ସାଥୀ ବିଧାୟକଙ୍କୁ ଏକାଠି କରି ସେ ପ୍ରସାଦଙ୍କ ବିରୋଧରେ କମ୍ପମାନ କରୁଛନ୍ତି । ନିରଂଜନ ପଟ୍ଟନାୟକଙ୍କୁ ପିସିସି ସଭାପତି କରିବାକୁ ସେ ଖୋଲାଖୋଲି ଦାବି କରୁଛନ୍ତି । ପଂଚାୟତ ନିର୍ବାଚନରେ କଂଗ୍ରେସର ଶୋଚନୀୟ ପରାସ୍ତ ପରେ ତାରା ଆଉ ଦୁଇପାଦ ଆଗକୁ ଯାଇଛନ୍ତି । ପ୍ରସାଦ ହଟୁନଥିବାରୁ ସୋନିଆ ଓ ରାହୁଲଙ୍କୁ ମଧ୍ୟ କଡ଼ା ଭାଷା ଶୁଣାଉଛନ୍ତି । ଓଡ଼ିଶା ପ୍ରଭାରୀ ବି.କେ.ହରିପ୍ରସାଦଙ୍କୁ ବିଧାୟକ ଦଳ ଜୋକର୍ କରିଦେଇଛନ୍ତି । ଯୋଗେଶ ସିଂ ତାଙ୍କୁ “ହରିଆ” ନାଁରେ ସମ୍ବୋଧନ କରୁଛନ୍ତି । ହରି-ପ୍ରସାଦ ନ ହଟିଲା ପର୍ଯ୍ୟନ୍ତ ଓଡ଼ିଶାରେ କଂଗ୍ରେସ ଉଧେଇ ପାରିବନି ବୋଲି ବିଧାୟକ ଗୋଷ୍ଠୀ ଗଳା ଫଟାଇ ଚିତ୍କାର କରୁଛନ୍ତି ।
ସେପଟେ ପ୍ରସାଦ ହରିଚନ୍ଦନ ବି ଥୋବରା ହୋଇଯାଇଛନ୍ତି । ଦଳ ଭିତରେ ତାଙ୍କୁ ତୀବ୍ର ବିରୋଧ ସତ୍ତ୍ୱେ ସେ ଚଙ୍କୁନାହାନ୍ତି । ନା ସେ ରାଜ୍ୟରେ ଦଳର ସ୍ଥିତିକୁ ବଦଳେଇ ପାରୁଛନ୍ତି ନା ନେତାଙ୍କୁ ଏକାଠି କରି ଚାଲିପାରୁଛନ୍ତି । ଓଲଟି ସଂଗଠନ ଭୁଷୁଡ଼ିବାରେ ଲାଗିଛି । ତଥାପି ପଦ ମାଡ଼ିବସିବାକୁ ସେ ପସନ୍ଦ କରିଛନ୍ତି । ନିଜର ନୈତିକତା ଓ ସମ୍ମାନକୁ ବଳି ପକାଇ ସୋନିଆ ଏବଂ ରାହୁଲଙ୍କ ନିଷ୍ପତ୍ତିକୁ ଅପେକ୍ଷା କରିଛନ୍ତି । ଏହାଦ୍ୱାରା ପ୍ରସାଦ ନିଜ ବ୍ୟକ୍ତିତ୍ୱ ଓ ଭାବମୂର୍ତ୍ତିକୁ ଦଳିଚକଟି ଦେଇଛନ୍ତି । ଗଣମାଧ୍ୟମରେ ଶ୍ୱଶୁର ସୁର ରାଉତରାୟଙ୍କୁ ନିଜର ସୁରକ୍ଷାକବଚ ଭାବିନେଇଛନ୍ତି । ପାଟିରେ ବାଡବତା ନ ଥିବା ସୁର ବି ପ୍ରସାଦଙ୍କ ବିରୋଧୀଙ୍କୁ ମନଇଚ୍ଛା ଗାଳି କରୁଛନ୍ତି ।ଗୋଟେ ପଟେ ସୁର ଏବଂ ଆରପଟେ ତାରା । ଲୁଜ୍ ଟକ୍ ରେ କେହି କାହାରିଠାରୁ ଉଣା ନୁହଁନ୍ତି । ଆଉ ଗଣମାଧ୍ୟମରେ ପରଷ୍ପରର ଗୋହି ଖୋଳି ଏମାନେ ଯେଉଁ ସ୍ତରକୁ ଯାଉଛନ୍ତି ତାହା କଂଗ୍ରେସ ପ୍ରତି ଲୋକଙ୍କ ଅଧିକ ଘୃଣାଭାବ ସୃଷ୍ଟି କରିଛି । ଏଥିସହ ଦଳର ଭବିଷ୍ୟତକୁ ଅଧିକ ଅନ୍ଧାର ମଧ୍ୟକୁ ଠେଲିଦେଇଛନ୍ତି ।
କଂଗ୍ରେସର ଏଭଳି ଦୁର୍ଦ୍ଦଶା ପାଇଁ ସୋନିଆ ଓ ରାହୁଲ ଗାନ୍ଧୀଙ୍କୁ ସିଧାସଳଖ ଦାୟୀ କରିଛନ୍ତି ଅନେକ ବରିଷ୍ଠ ନେତା । କଂଗ୍ରେସ ଘରକୁ ପାଣି ଆସି ବୁଡ଼ାଇବାକୁ ବସିଥିଲେ ମଧ୍ୟ ସୋନିଆ ଓ ରାହୁଲଙ୍କର ଉଦାସିନତା ଏହି ବିପଦକୁ ଡାକିଆଣିଥିବା ସେମାନେ କହିଛନ୍ତି । ଓଡ଼ିଶାରେ ଦଳର ଅବସ୍ଥା ଦିନକୁ ଦିନ ଖସି ଚାଲିଥିବା ବେଳେ ସୋନିଆ ଓ ରାହୁଲଙ୍କର ଚିନ୍ତା ନାହିଁ । କ’ଣ କଲେ ଦଳର ଅଣ୍ଟା ସଳଖିବ ତାହାର ଯୋଜନା ନାହିଁ । ଓଲଟି ସେମାନଙ୍କ କାର୍ଯ୍ୟକଳାପ ପିସିସି ଓ ବିଧାୟକ ଗୋଷ୍ଠୀ ମଧ୍ୟରେ ଚାଲିଥିବା କନ୍ଦଳକୁ ଅଧିକ ପ୍ରଶମିତ କରୁଛି । ଏଥିରୁ ବୁଝାପଡୁଛି କି ଦଳର ଭବିଷ୍ୟତ ନେଇ ସେମାନେ ଜମାରୁ ଆଶାବାଦୀ ନାହାନ୍ତି । ତେଣିକି ଦଳ ଡୁବୁ କି ମରୁ ସେମାନଙ୍କର ଯାଏ ଆସେ ନାହିଁ ।
