ଭୁବନେଶ୍ୱର: ଶେଷରେ କଂଗ୍ରେସ ଛାଡ଼ିଛନ୍ତି ନବ ଦାସ । କଂଗ୍ରେସ କାର୍ଯ୍ୟକାରୀ ସଭାପତି ଓ ପ୍ରାଥମିକ ସଦସ୍ୟ ପଦରୁ ଆଜି ସେ ଇସ୍ତଫା ଦେଇଛନ୍ତି । ନିଜର ଇସ୍ତଫାପତ୍ର ରାହୁଲ ଗାନ୍ଧୀଙ୍କ ନିକଟକୁ ପଠାଇ ଦେଇଛନ୍ତି । ଦଳ ବିରୋଧରେ ତାଙ୍କର କୌଣସି ଅଭିଯୋଗ ନାହିଁ । ତେବେ ବିଜେଡ଼ିରେ ଯୋଗଦେଉଥିବା ନେଇ ସେ ତାଙ୍କ ଇସ୍ତଫାପତ୍ରରେ ଜଣାଇଛନ୍ତି । ବିଜେଡ଼ି ଟିକେଟରେ ଏଥର ନିର୍ବାଚନ ଲଢ଼ିବେ ବୋଲି ତିନି ଦିନ ତଳେ ନବ ସ୍ପଷ୍ଟ କରିଦେଇଥିଲେ । ଆଜି କଂଗ୍ରେସୁ ଇସ୍ତଫା ଦେଇ ସେ ନିଜ ଭବିଷ୍ୟତ ଆଗକୁ ବଢ଼ାଇଛନ୍ତି ।
ନବଙ୍କ ଇସ୍ତଫା ଉପରେ ପିସିସି ସଭାପତି ନିରଞ୍ଜନ ପଟ୍ଟନାୟକ ପ୍ରତିକ୍ରିୟା ଦେଇ କହିଛନ୍ତି ଯେ ଏହା ନିଶ୍ଚିତ କଷ୍ଟଦାୟକ । ମାତ୍ର ଦଳ ପାଇଁ ଶୁଭଙ୍କର । ବ୍ୟବସାୟିକ ସ୍ୱାର୍ଥ ରଖି ରାଜନୀତି କରୁଥିବା ବ୍ୟକ୍ତିଙ୍କ ଆଦର୍ଶବୋଧ ନାହିଁ । ନବଙ୍କ ଇସ୍ତଫା ଦଳ ଉପରେ କୌଣସି ପ୍ରଭାବ ପକାଇବ ନାହିଁ । ଏମିତି ବହୁ ନେତା ଦଳ ଛାଡ଼ିଛନ୍ତି ଏବଂ ଦଳକୁ ଆସିଛନ୍ତି । ଦଳ ଏବେ ସୁଦୃଢ଼ ହୋଇଛି ଏବଂ ଆଗକୁ ଆହୁରି ସୁଦୃଢ଼ ହେବ ବୋଲି ନିରଞ୍ଜନ କହିଛନ୍ତି ।
ଦଳର ବରିଷ୍ଠ ନେତା ଆର୍ଯ୍ୟକୁମାର ଜ୍ଞାନେନ୍ଦ୍ର କହିଛନ୍ତି, କଂଗ୍ରେସ ପରିଚୟରେ ବଡ଼ ହୋଇଥିବା ନବ ରାଜନୈତିକ ସ୍ୱାର୍ଥ ରଖି ବିଜେଡ଼ିକୁ ଯାଇଛନ୍ତି । ତେବେ ବିଜେଡ଼ିରେ ସେ ଖତ ହୋଇଯିବେ ଏଥିରେ ସନ୍ଦେହ ନାହିଁ ।
ମଜ୍ଜାର କଥା, କଂଗ୍ରେସ ଛାଡ଼ିଥିବା ନବ ଦଳୀୟ ନେତୃତ୍ୱକୁ ଚକମା ଦେବାରେ ସକ୍ଷମ ହୋଇଛନ୍ତି । ସୂଚନା ଅନୁଯାୟୀ, ନବଙ୍କୁ ଦଳରୁ ବହିଷ୍କାର କରିବା ପାଇଁ ନିଷ୍ପତ୍ତି ହୋଇସାରିଥିଲା । ଆଜି ସଂଧ୍ୟାବେଳ ପିସିସି ସଭାପତି ଏହି ନିଷ୍ପତ୍ତି ଶୁଣାଇଥାଆନ୍ତେ । ମାତ୍ର ତା ପୂର୍ବରୁ ନବ ନିଜ ଆଡୁ ଇସ୍ତଫା ଦେଇଥିଲେ । ନବ ଇସ୍ତଫା ଦେବାର ଦେଢ଼ ଘଣ୍ଟା ପରେ ଯାଇ ତରବରିଆ ଭାବେ ପିସିସି ଶୃଙ୍ଖଳା କମିଟି ଆବାହକ ଅନନ୍ତ ପ୍ରସାଦ ସେଠୀଙ୍କ ଦସ୍ତଖତରେ ବହିଷ୍କାର ଆଦେଶ ବାହାରିଥିଲା । ଏହାକୁ ନେଇ କଂଗ୍ରେସ ମହଲରେ ଜୋରଦାର ଚର୍ଚ୍ଚା ହେଉଛି ।
