ଭୁବନେଶ୍ୱର: ଆସନ୍ତା ୨୯ ତାରିଖରେ ନବୀନ ପଟ୍ଟନାୟକ ଓ ତାଙ୍କ ସରକାରଙ୍କ ଶପଥ ଗ୍ରହଣ ଉତ୍ସବ । ନରେନ୍ଦ୍ର ମୋଦିଙ୍କୁ ଏଥିପାଇଁ ଆମନ୍ତ୍ରଣ କରିଛନ୍ତି ନବୀନ । ନିର୍ବାଚନ ବେଳେ ନବୀନ ଦେଇଥିବା କଥାକୁ ଭୁଲିନାହାନ୍ତି । ଧର୍ମେନ୍ଦ୍ର ପ୍ରଧାନଙ୍କ ସମେତ ବିଜେପିର ଅନ୍ୟ ବରିଷ୍ଠ ନେତାଙ୍କୁ ମଧ୍ୟ ଆମନ୍ତ୍ରଣ କରିଛନ୍ତି ନବୀନ ।
ନରେନ୍ଦ୍ର ଏପ୍ରିଲ୍ ୨୩ ତାରିଖରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓଡ଼ିଶାକୁ ନିର୍ବାଚନ ପ୍ରଚାରରେ ଆସିଥିବା ବେଳେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିରୋଧରେ ଧୂମ୍ ବର୍ଷିଥିଲେ । ନବୀନ ସରକାରଙ୍କ ବିଦାୟ ବେଳା ଆସିଗଲା ବୋଲି ଜୋର୍ ଲଗାଇଥିଲେ । ଓଡ଼ିଶାରୁ ବିଜେଡ଼ି ସରକାର ଗଲା ପରେ ସେ ପୁଣି ଓଡ଼ିଶା ଆସିବେ ବୋଲି ମୋଦି ପ୍ରତିଶ୍ରୁତି ଦେଇ ଫେରିଥିଲେ । ତା’ ପରଦିନ ମୁଖ୍ୟମନ୍ତ୍ରୀ ବାଲେଶ୍ୱର ପ୍ରଚାର ସଭାରେ ମୋଦିଙ୍କୁ ଅତ୍ୟନ୍ତ ବିନମ୍ରତାର ସହ ଜବାବ ଦେଇଥିଲେ । ନବୀନ କହିଥିଲେ,
“ତୃତୀୟ ପର୍ଯ୍ୟାୟ ଭୋଟ ପରେ ଓଡ଼ିଶାବାସୀଙ୍କ ଆର୍ଶିବାଦରେ ବିଜେଡ଼ି ବହୁ ମତ ପାଇସାରିଲାଣି । ବିଜେଡ଼ି ସରକାରର ଶପଥ ଗ୍ରହଣ ଉତ୍ସବରେ ଅତିଥି ଭାବରେ ଯୋଗଦେବାକୁ ମୋଦିଜୀଙ୍କୁ ନମ୍ରତାର ସହ ମୋର ଅନୁରୋଧ ।”
ନବୀନଙ୍କ ଏହି ଦମ୍ଭୋକ୍ତିକୁ ଅତି କଠୋର ଭାଷାରେ ସମାଲୋଚନା କରିବା ସହ ତାଙ୍କୁ ନିର୍ଘାତ୍ କଟାକ୍ଷ କରିଥିଲେ ଧର୍ମେନ୍ଦ୍ର ପ୍ରଧାନ । ନବୀନ ପଟ୍ଟନାୟକଙ୍କୁ ମିଛର ସୌଦାଗର ବୋଲି ଧର୍ମେନ୍ଦ୍ର ଅଭିହିତ କରିବା ସହ ୨୦ ବର୍ଷ ଧରି ସେ ଓଡ଼ିଶାବାସୀଙ୍କୁ ଭୂଆଁ ବୁଲାଉଥିବା କହିଥିଲେ । ଧର୍ମେନ୍ଦ୍ର କହିଥିଲେ,
“ଓଡ଼ିଶାରେ ବିଜେପି ସରକାରର ଶପଥ ଗ୍ରହଣ ଉତ୍ସବକୁ ପୂର୍ବତନ ମୁଖ୍ୟମନ୍ତ୍ରୀ ଭାବେ ନବୀନ ବାବୁଙ୍କୁ ଆମନ୍ତ୍ରଣ କରିବା ପାଇଁ ଆମେ ନିଷ୍ପତ୍ତି ନେଇଛୁ । ପ୍ରଧାନମନ୍ତ୍ରୀ ମୋଦିଙ୍କ ପାଖରେ ବସିବାକୁ ନବୀନ ବାବୁଙ୍କ ପାଇଁ ସିଟ୍ ବ୍ୟବସ୍ଥା ମୁଁ କରେଇଦେବି ।”
ତେବେ ନିର୍ବାଚନ ଫଳ ଆସିବା ପରେ ଆଜି କିଏ କାହା ପାଇଁ ସିଟ୍ ବ୍ୟବସ୍ଥା କରିବାକୁ ଯାଉଛନ୍ତି ତାହା ଓଡ଼ିଶାବାସୀଙ୍କୁ ଅଛପା ନାହିଁ । ଦୁଇ ତୃତୀୟାଂଶ ଆସନ ସହ ପଞ୍ଚମ ଥର ପାଇଁ ରାଜ୍ୟରେ ସରକାର ଗଢ଼ିବାକୁ ଯାଉଥିବା ନବୀନ ପଟ୍ଟନାୟକ ଆସନ୍ତା ୨୯ ତାରିଖରେ ମୁଖ୍ୟମନ୍ତ୍ରୀ ଭାବେ ଶପଥ ନେବେ । ଆଉ ଏହି ଅବସରରେ ମୋଦୀଙ୍କ ଉପସ୍ଥିତି କାମନା କରି ଭାଷଣ ଛଳରେ ଆଗୁଆ ଆମନ୍ତ୍ରଣ କରିଥିବା ନବୀନ ଆଜି ତାଙ୍କୁ ଆମନ୍ତ୍ରଣ ପତ୍ର ପଠାଇଛନ୍ତି । ଧର୍ମେନ୍ଦ୍ର ପ୍ରଧାନଙ୍କୁ ବି ଆମନ୍ତ୍ରଣ କରିବାକୁ ଭୁଲିନାହାନ୍ତି ନବୀନ । ସମସ୍ତ ସାଂସଦ, ବିଧାୟକଙ୍କ ସମେତ ସବୁଦଳର ତୁଙ୍ଗ ନେତାଙ୍କୁ ଶପଥ ଗ୍ରହଣ ଉତ୍ସବକୁ ଆମନ୍ତ୍ରଣ କରିଛନ୍ତି ନବୀନ ।
ମୋଦିଙ୍କ ଛଡ଼ା ଅନ୍ୟ କେଉଁ ଜାତୀୟ ନେତାଙ୍କୁ ଆମନ୍ତ୍ରଣ କରିନାହାନ୍ତି ନବୀନ । ତେବେ ମେକ ଇନ ଓଡ଼ିଶାରେ ଭାଗ ନେଇଥିବା ଦେଶର ପ୍ରତିଷ୍ଠିତ ଶିଳ୍ପପତି ରତନ ଟାଟା, ମୁକେଶ ଅମ୍ବାନୀ, ନବୀନ ଜିନ୍ଦଲ ପ୍ରଭୃତିଙ୍କୁ ଶପଥ ଗ୍ରହଣ ଉତ୍ସବକୁ ଆମନ୍ତ୍ରିତ କରାଯାଇଛି ।
ସୂଚନାଯୋଗ୍ୟ, ନିର୍ବାଚନ ପ୍ରଚାର ବେଳେ ଶପଥ ଗ୍ରହଣ ଉତ୍ସବ ଆମନ୍ତ୍ରଣକୁ ନେଇ ସୋସିଆଲ୍ ମିଡ଼ିଆରେ ବେଶ୍ ଗରମ ଚର୍ଚ୍ଚା ହୋଇଥିଲା । ବିଜେଡ଼ି ଓ ବିଜେପି ପକ୍ଷରୁ ନିମନ୍ତ୍ରଣ ପତ୍ର ଭାଇରାଲ୍ ହୋଇଥିଲା ।
