କି କରିତକର୍ମା! ଆସୁ ଆସୁ ସାଢ଼େ ୬ ଲକ୍ଷ

ଭୁବନେଶ୍ୱର: ସମସ୍ତଙ୍କ ଆଖିରେ ପୁଟୁଳା ବାନ୍ଧି ସରକାରୀ ଅର୍ଥକୁ ଲୁଟିନେବାକୁ ଉଦ୍ୟମ କରିଛନ୍ତି ଜଣେ ତଥାକଥିତ ନାମୀ ସାମ୍ବାଦିକ । ଏକ ଇଂରାଜୀ ୱେବ ପୋର୍ଟାଲ୍ ଚଳାଉଥିବା ଏହି ସାମ୍ବାଦିକ ନିଜ ପୋର୍ଟାଲ୍ ରେ ମନକୁ ମନ ସରକାରୀ ବିଜ୍ଞାପନ ବସାଇ ମୋଟା ପାଉଣା ଦାବି କରିଛନ୍ତି । ସବୁଠାରୁ ଆଶ୍ଚର୍ଯ୍ୟର କଥା ସଂପୃକ୍ତ ସାମ୍ବାଦିକଙ୍କ ପୈଠ ବିଲ୍ ର ପେମେଣ୍ଟ ପାଇଁ ସୂଚନା ଓ ଲୋକସମ୍ପର୍କ ବିଭାଗର ନିର୍ଦ୍ଦେଶକ ବ୍ୟଗ୍ର ହୋଇପଡ଼ିଛନ୍ତି । ସରକାରୀ ନିୟମ କାନୁନକୁ ସେ ଆଖିବୁଜି ଦେଇଛନ୍ତି । ଏ ସମ୍ପର୍କିତ ଫାଇଲ୍ ପ୍ରସ୍ତୁତ ପାଇଁ ତଳିଆ ଅଧିକାରୀଙ୍କୁ ମୌଖିକ ନିର୍ଦ୍ଦେଶ ଦେଇସାରିଲେଣି । ଘଟଣାଟି ଜଣାପଡ଼ିବା ପରେ ସାମ୍ବାଦିକମହଲରେ ତୀବ୍ର ପ୍ରତିକ୍ରିୟା ସୃଷ୍ଟି ହୋଇଛି ।

ସଂପୃକ୍ତ ଇଂରାଜୀ ୱେବପୋର୍ଟାଲ୍ ଟି ସରକାରୀ ବିଜ୍ଞାପନ ପାଇବା ପାଇଁ ମନୋନୀତ ହେବାର ସପ୍ତାହେ ହୋଇନି । ୱେବପୋର୍ଟାଲକୁ ବିଜ୍ଞାପନ ବଣ୍ଟନ ପାଇଁ ସରକାର ନୀତି ଚୂଡ଼ାନ୍ତ ହେବାର ଦି ଦିନ ବି ପୂରିନି । ମାତ୍ର ୱେବପୋର୍ଟାଲ୍ ମାଲିକ ଗତକାଲି(୩ ତାରିଖ) ସୂଚନା ଓ ଲୋକସମ୍ପର୍କ ବିଭାଗରେ ସାଢ଼େ ୬ ଲକ୍ଷ ଟଙ୍କାର ବିଲ୍ ଦାଖଲ କରିଛନ୍ତି । ବିନା ଆଡଭଜାଇମେଣ୍ଟ ରିଲିଜ୍ ଅର୍ଡରରେ ଏହି ବିଲ୍ ଦାଖଲ ହୋଇଛି । ଅତି ସାଧାରଣ କଥାଟି ହେଉଛି, ଯେ କୌଣସି ଖବରକାଗଜ କି ଟିଭି ସଂସ୍ଥା ବିଜ୍ଞାପନ ଛାପିବା ପାଇଁ ରିଲିଜ୍ ଅର୍ଡର ରଖିବା ଆଇନତଃ ବାଧ୍ୟତାମୂଳକ । ସରକାରୀ କ୍ଷେତ୍ରରେ ଏହା ସୁନିଶ୍ଚିତ କରାଇବା ଶତପ୍ରତିଶତ ବାଧ୍ୟ । ରିଲିଜ୍ ଅର୍ଡର ସାଥୀରେ ବିଲ୍ ଦେଲେ ଯାଇ ପେମେଣ୍ଟ ମିଳେ । ମାତ୍ର ବିନା ଖାତା ଖତିଆନରେ ନିର୍ଦ୍ଦିଷ୍ଟ ଇଂରାଜୀ ୱେବ ପୋର୍ଟାଲ୍ ମାଲିକ ସାଢ଼େ ୬ ଲକ୍ଷ ଟଙ୍କାର ବିଲ୍ ପୈଠ କରିବା ସମସ୍ତଙ୍କୁ ଖାଲି ବିସ୍ମିତ କରିନି ବରଂ ଏହା ଫ୍ରଡ୍ ବୋଲି କୁହାଯାଉଛି ।

ସରକାର ସଂପୃକ୍ତ ଇଂରାଜୀ ୱେବପୋର୍ଟାଲ୍ କୁ ବିଜ୍ଞାପନ ଦେବାକୁ ମନୋନୀତ କରିଥିବା ସତ୍ୟ । ଏକଥା ବି ସତ ଯେ ସରକାର ୱେବ ବିଜ୍ଞାପନ ବଣ୍ଟନ ନୀତିର ବିଜ୍ଞପ୍ତି ପ୍ରକାଶ କରିଛନ୍ତି ୨ ତାରିଖରେ । ଅର୍ଥାତ୍ ବିଜ୍ଞପ୍ତି ପ୍ରକାଶନର ଦିନକ ପରେ ଦାଖଲ ହୋଇଛି ସାତ ଦିନର ବିଜ୍ଞାପନ ବାବଦରେ ସାଢ଼େ ୬ ଲକ୍ଷ ଟଙ୍କାର ବିଲ୍ । ସେଥିରେ ରହିଛି ଉତ୍କଳ ଦିବସ, କଳାହାଣ୍ଡି ମେଡ଼ିକାଲ କଲେଜ ଚୁକ୍ତି, ମୁଖ୍ୟମନ୍ତ୍ରୀଙ୍କ ଦ୍ୱାରା କଟକରେ ପୋଲ ଉଦଘାଟନର ସରକାରୀ ବିଜ୍ଞାପନ । ସେହି ବିଜ୍ଞାପନ ବସାଇବା ପାଇଁ ସୂଚନା ଓ ଲୋକସମ୍ପର୍କ ବିଭାଗ ତାଙ୍କୁ ରିଲିଜ୍ ଅର୍ଡର ଦେଇନାହିଁ । ଅର୍ଥାତ ମନକୁ ମନ ନିଜ ୱେବପୋର୍ଟାଲରେ ଏହିସବୁ ବିଜ୍ଞାପନ ବସାଇ ସରକାରଙ୍କଠାରୁ ମୂଲ ମାଗିଛନ୍ତି ସାମ୍ବାଦିକ । ସୂଚନା ଓ ଲୋକସମ୍ପର୍କ ବିଭୠର ଅନେକ କର୍ମଚାରୀଙ୍କୁ ଏହା ଯେତିକି କୌତୁହଳ କରୁଛି ସେତିକି ବିସ୍ମିତ କରୁଛି । ଉପରିସ୍ଥ ଅଧିକାରୀଙ୍କ ସହ ସଂପୃକ୍ତ ସାମ୍ବାଦିକଙ୍କ ଗଭୀର ବନ୍ଧନ ଥିବାରୁ ସେମାନଙ୍କ ପାଟି ବନ୍ଦ ହୋଇଯାଇଛି । ଖୋଦ୍ ନିର୍ଦ୍ଦେଶକ ଏହାକୁ ସ୍ୱୀକୃତ ଦେବାକୁ ଆଗେଇ ଆସିବା ସେମାନଙ୍କ ଅକଲ ଗୁଡ଼ୁମ୍ କରିଦେଇଛି ।

ସୂଚନା ଓ ଲୋକସମ୍ପର୍କ ବିଭାଗର ଉପର ଅଧିକାରୀଙ୍କଠାରୁ ଆରମ୍ଭ କରି ତୃତୀୟ ମହଲା ଯାଏଁ ଏହି ନିର୍ଦ୍ଦିଷ୍ଟ ସାମ୍ବାଦିକଙ୍କ ମଧୁର ଚେର ଲମ୍ବିଥିବା ଚର୍ଚ୍ଚା ହେଉଛି । ଓଡ଼ିଆ ୱେବପୋର୍ଟାଲ୍ କୁ ରାଜ୍ୟ ସରକାର ଅଗ୍ରାଧିକାର ଦେବାକୁ ଘୋଷଣା କରିବା ପରେ ପ୍ରଥମରୁ ବିଜ୍ଞାପନ ନୀତି ପ୍ରଣୟନରେ ତାଙ୍କର କୁଆଡ଼େ ଦବଦବା ଥିଲା । କେବଳ ନିଜ ସଂସ୍ଥାକୁ ସରକାରୀ ଅନୁଗ୍ରହ କରାଇବା ଲକ୍ଷ୍ୟରେ ସେ ଅଫିସରଙ୍କୁ ମନେଇ ନିୟମ ପ୍ରଣୟନ କରିବାରେ ସଫଳ ହୋଇଥିବା କୁହାଯାଉଛି । ସେହି ନିର୍ଦ୍ଦିଷ୍ଟ ପୋର୍ଟାଲ୍ କୁ କୋଳେଇବା ପାଇଁ ସରକାରୀ ଅଫିସର ବି ବ୍ୟଗ୍ର ହୋଇପଡ଼ିଥିଲେ । ଏମିତି ବି ହେଲା, ନିଜେ ସୂଚନା ଓ ଲୋକସମ୍ପର୍କ ମନ୍ତ୍ରୀ ପ୍ରତାପ ଜେନା ସେହି ଫାଇଲ୍ ଉପରେ ସମ୍ମତି ଦେବାକୁ ଅନିଚ୍ଛା ପ୍ରକାଶ କରିଥିଲେ ମଧ୍ୟ ନିର୍ଦ୍ଦିଷ୍ଟ ପ୍ରଭାବଶାଳୀ ଅଫିସରଙ୍କ ଚାପ ଆଗରେ ନିରୁପାୟ ହୋଇଗଲେ । ଯେଉଁଥିପାଇଁ ଅନ୍ୟ ପ୍ରମୁଖ ଓଡ଼ିଆ ୱେବପୋର୍ଟାଲ୍ ସରକାରୀ ବିଜ୍ଞାପନ ଖାତାକୁ ଆସିପାରିନାହାନ୍ତି ।

ଏହି ନିର୍ଦ୍ଦିଷ୍ଟ ସାମ୍ବାଦିକଙ୍କ ପାଇଁ ସବୁ କିଛି ରିକ୍ସ ନେବାକୁ କିଛି ଅଫିସରଙ୍କ ବ୍ୟଗ୍ରତା ପଛର ରହସ୍ୟ କାହାରିକୁ ବୁଝାପଡ଼ୁନାହିଁ । ଏବେ ସେହି ସାମ୍ବାଦିକ ବିନା ରିଲିଜ୍ ଅର୍ଡରରେ ମନଇଚ୍ଛା ବିଜ୍ଞାପନ ବସାଇ ସରକାରଙ୍କଠାରୁ ସାଢ଼େ ୬ ଲକ୍ଷ ଟଙ୍କା ପକାଇବାର ଉଦ୍ୟମ ପଛରେ ବିଭାଗୀୟ ନିର୍ଦ୍ଦେଶକଙ୍କ ସମେତ ନିର୍ଦ୍ଦିଷ୍ଟ କିଛି ଉପର ଅଫିସରଙ୍କ ଆର୍ଶିବାଦ ଥିବା କୁହାଯାଉଛି । ସରକାର ଏଭଳି ଦୁର୍ନୀତିକୁ ପ୍ରଶୟ ନ ଦେଇ କଠୋର କାର୍ଯ୍ୟାନୁଷ୍ଠାନ ପାଇଁ ବିଭିନ୍ନ ମହଲରୁ ଦାବି ହୋଇଛି ।