ଭୁବନେଶ୍ୱର:
“I don’t want to write a sanctimonious status note on what other journalists should do. I can only speak for myself. My primary job is to speak truth to power. To question the government of the day. In 2011 when I wrote the story on Robert Vadra’s dealings with DLF, I don’t remember the sort of backlash that I see now. There were no ‘only whatsapp or FaceTime audio from now’ sort of messages from sources. No seeking to shift the location of meetings to cafes resembling dungeons! A person close to a senior BJP leader brags our call record details are with the party bosses. (Good for them, I say!;)) And of course the low level slander campaign online.
“Intimidation and harassment are tools often used by powerful people to get journalists to toe the line. As someone famously once said and I paraphrase, news is something someone wants to suppress, everything else is advertising. I don’t know about others but I don’t wish to lose focus of that. I would rather quit journalism than do the sort of reportage that I see often around me. Many of you have been extremely kind to me and are investing me with qualities I probably don’t have. I don’t do the sort of stories I do because I am ‘ brave’. I do them because that’s journalism and not bravery.”
ଅମିତ୍ ଶାହାଙ୍କ ପୁଅ ଜୟଙ୍କ ବ୍ୟବସାୟିକ କାରବାରର ତଥାକଥିତ ଗୁମର ଖୋଲିଥିବା ସାମ୍ବାଦିକା ରୋହିଣୀ ସିଂ ଏବେ ଟାର୍ଗେଟ୍ ରେ । ‘ଦ ଓୟାର’ରେ ତାଙ୍କ ରିପୋର୍ଟ ସମଗ୍ର ଦେଶରେ ଝଡ଼ ସୃଷ୍ଟି କରିଥିବା ବେଳେ ସୋସିଆଲ୍ ମିଡ଼ିଆରେ ତାଙ୍କୁ ମାର ନ ମାର କରାଯାଇଛି । ତାଙ୍କୁ ସୁପାରି ସାମ୍ବାଦିକର ଆଖ୍ୟା ଦିଆଯାଇଛି । ଜୟ ତାଙ୍କ ବିରୋଧରେ ୧୦୦ କୋଟି ଟଙ୍କାର ମାନହାନି ମକଦ୍ଦମା କରିଛନ୍ତି । ତେବେ ସବୁ ପ୍ରକାର ଧମକ, ଚାପ, ନିନ୍ଦା, ଅପବାଦ, ସମାଲୋଚନା ତାଙ୍କୁ ଡରାଇ ପାରିନାହିଁ । ରୋହିଣୀଙ୍କ ମନର ଉପରୋକ୍ତ ଭାଷା ହିଁ ତାହାର ସ୍ପଷ୍ଟ ବୟାନ ।
୨୦୧୧ ମସିହାରେ ଏହି ରୋହିଣୀ ସିଂ ଖୋଲିଥିଲେ ରବର୍ଟ ଭଦ୍ରଙ୍କ ବ୍ୟବସାୟିକ ଗୁମର । ଡିଏଲଏଫ ସହ ଭଦ୍ରଙ୍କ ବ୍ୟବସାୟିକ ଡିଲ୍ କୁ ନେଇ ତାଙ୍କ ରିପୋର୍ଟ ସାରା ଦେଶରେ ହଇଚଇ ସୃଷ୍ଟି କରିଥିଲା । ତତ୍କାଳ ବିଜେପି ପାଇଁ ଏହି ରିପୋର୍ଟ ହୋଇଥିଲା ଅମୃତ । ତାହାକୁ ଅସ୍ତ୍ର କରି କଂଗ୍ରେସକୁ ପ୍ରଚଣ୍ଡ ଆକ୍ରମଣ କରିଥିଲା । ଆଜି ସେହି ରୋହିଣୀ ସିଂ ଅମିତ୍ ଶାହାଙ୍କ ପୁଅ କଥା ଲେଖିଲା ବେଳକୁ ବିଜେପି ପାଇଁ ହୋଇଛି ବିଷ । ବିଜେପି ଆଖିରେ ରୋହିଣୀ ପାଲଟିଛନ୍ତି ‘ସୁପାରି ସାମ୍ବାଦିକ’ । ସୋସିଆଲ୍ ମିଡ଼ିଆରେ ତାଙ୍କ ଉପରେ ବର୍ଷୁଛି ଅରୁଚିକର କଟୁ ମନ୍ତବ୍ୟ । ବିଜେପି ଭକ୍ତମାନେ ତାଙ୍କୁ ଗତ ୟୁପି ନିର୍ବାଚନରେ ଅଖିଲେଶ ସିଂଙ୍କ ଏଜେଣ୍ଟ ଥିବା ଦର୍ଶାଇଥିଲା ବେଳେ ଆଗକୁ ଗୁଜୁରାଟ ନିର୍ବାଚନରେ କଂଗ୍ରେସ ଏଜେଣ୍ଟର ଆଖ୍ୟା ଦେଇଛନ୍ତି । କାହା ଭାଷାରେ ସେ ସୁପାରି ସାମ୍ବାଦିକ ତ ଆଉ କିଏ ଫେକ୍ କିମ୍ବା ପେଡ଼୍ ସାମ୍ବାଦିକର ନାଁ ଦେଇଛନ୍ତି । ତେବେ ରୋହିଣୀ ଏସବୁ ସମାଲୋଚନାକୁ ତିଳେ ମାତ୍ର ଖାତିର କରିନାହାନ୍ତି । ଯାହା ଲେଖିଛନ୍ତି ଠିକ୍ ଲେଖିଛନ୍ତି ବୋଲି ଦମ୍ଭ ଦେଖାଇଛନ୍ତି । ମାନହାନି ମକଦ୍ଦମାରେ ସେ ବିଚଳିତ ହୋଇନାହାନ୍ତି କି ଡରିନାହାନ୍ତି ।
ରୋହିଣୀଙ୍କ ତଥ୍ୟ ଓ ଯୁକ୍ତିର ଦମ୍ ଏବେ କୋର୍ଟ ନିର୍ଣ୍ଣୟ କରିବ । ସେଥିରେ କାହାର କିଛି କହିବାର ନାହିଁ । ତେବେ ଏହି ପ୍ରସଙ୍ଗଟି ସାମ୍ବାଦିକତାର ପରିଭାଷାକୁ ବହୁତ ବଡ଼ ବିବାଦ ଭିତରକୁ ନେଇଯାଇଛି । ସରକାର ବଦଳିଲେ ସାମ୍ବାଦିକତାର ସଂଜ୍ଞା ବି ବଦଳିଯାଏ ବୋଲି ଚର୍ଚ୍ଚା ଜୋର୍ ଧରିଛି । ଜାତୀୟ ଗଣମାଧ୍ୟମ ବର୍ତ୍ତମାନ କିଭଳି ଅବସ୍ଥା ଦେଇ ଗତି କରୁଛି ତାହା ସମସ୍ତେ ଅନୁଭବ କଲେଣି । ଉପା ସରକାର ଅମଳରେ ରାଜଦୀପ ସରଦେଶାଇଙ୍କ ପାୱାର୍ ଦେଖିଲେ । ଏବେ ଅର୍ଣ୍ଣବ ଗୋସ୍ୱାମୀଙ୍କ ପାୱାର୍ ଦେଖୁଛନ୍ତି । କିଛି ମାସ ତଳେ ପ୍ରଣୟ ରାୟଙ୍କ ଭଳି ମହାନ୍ ବ୍ୟକ୍ତିତ୍ୱଙ୍କ ଦୁର୍ଦ୍ଦଶା ଦେଖିଛନ୍ତି । ବିଜେପି ମୁଖପାତ୍ରଙ୍କୁ ତାଙ୍କ ଆଙ୍କର ନିଧି ରାଜଦାନଙ୍କ କଠୋର ଭାଷାର ପରିଣାମ ଭୋଗିଛନ୍ତି ପ୍ରଣୟ । ରବିଶ୍ କୁମାର, ପୂଣ୍ୟପ୍ରସନ୍ନ ବାଜପେୟୀଙ୍କ ଭଳି ସ୍ୱାଧୀନଚେତା ବରିଷ୍ଠ ସାମ୍ବାଦିକଙ୍କ ଦୁର୍ଦ୍ଦଶା କଥା ନକହିବା ବି ଭଲ ।
ଓଡ଼ିଶାରେ ଗଣମାଧ୍ୟମ ବି ସାଂଘାତିକ ସ୍ଥିତି ଦେଇ ଗତି କଲାଣି । ୧୫ ବର୍ଷର ବିଜେଡ଼ି ଶାସନରେ ଗଣମାଧ୍ୟମ ଡରର ଶିକାର ହୋଇ ନ ଥିଲା ବେଳେ ବିଜେପି କ୍ଷମତା ନ ପାଉଣୁ ଗଣମାଧ୍ୟମ ଉପରେ କ୍ଷମତା ଜାହିର କରିବା ଆରମ୍ଭ କରିଛି । ପ୍ରମୁଖ ଗଣମାଧ୍ୟମକୁ ଭୟ କିମ୍ବା ପ୍ରଲୋଭନ ଜାଲରେ ବାନ୍ଧିଦେଇଥିବା ଅଭିଯୋଗ ହେଲାଣି । କେଉଁ ଟିଭିର ମୁଖ୍ୟ କିଏ ହେବେ ତାହା ରାଜ୍ୟର ବିଜେପି ହାଇକମାଣ୍ଡ ସ୍ଥିର କରୁଛନ୍ତି । ବୋଲ ନ ମାନିଲେ ପରିଣତି କ’ଣ ତାହା ବି ଦେଖେଇ ଦେଲେଣି । ରାଜନୈତିକ ଦଳକୁ ଏଥିପାଇଁ ସମ୍ପୂର୍ଣ୍ଣ ଦୋଷ ଦେବା ବି ଠିକ୍ ନୁହେଁ । ସାମ୍ବାଦିକତାର ଧର୍ମ ଭୁଲି କିଛି ମାଲିକ, ସମ୍ପାଦକ ଓ ସାମ୍ବାଦିକ ମଧ୍ୟ ରାଜନୈତିକ ଦଳର ଗୋଡ଼ାଣିଆ ହୋଇଥିବା କୁହାଯାଉଛି । ସାମ୍ବାଦିକତା ନାଁରେ ଦଲାଲି କରୁଛନ୍ତି । ଟଙ୍କା ଓ କ୍ଷମତା ମୋହରେ ସାମ୍ବାଦିକତାକୁ କଳୁଷିତ କରୁଛନ୍ତି । ନିଜ ପେପର୍, ଟିଭି କିମ୍ବା ଟୁଇଟରରେ ନିର୍ଦ୍ଦିଷ୍ଟ ଦଳର ପ୍ରବକ୍ତା ସାଜିଛନ୍ତି । ବହୁତ ବଡ଼ ବଡ଼ କଥା ଗପୁଥିବା ଏଭଳି ତଥାକଥିତ ସାମ୍ବାଦିକଙ୍କ ହାତରେ ଗଣମାଧ୍ୟମ କେତେ ସୁରକ୍ଷିତ ତାହା ଏବେ ବୁଦ୍ଧିଜୀବୀଙ୍କୁ ଆନ୍ଦୋଳିତ କରିଛି ।
