ଭୁବନେଶ୍ୱର: ଧର୍ମେନ୍ଦ୍ର ପ୍ରଧାନଙ୍କ ଗ୍ୟାସକୁ ନବୀନ ପଟ୍ଟନାୟକଙ୍କ ପାଣି ପ୍ରକଳ୍ପ। ଗୋଟିଏ ଦିନରେ ଇଏ ଅଦ୍ଭୂତ ସଂଯୋଗ । ଭୁବନେଶ୍ୱରରେ ପାଇପ୍ ଯୋଗେ ଗ୍ୟାସ ପ୍ରକଳ୍ପକୁ ଧର୍ମେନ୍ଦ୍ର ଉଦଘାଟନ କରିଥିଲା ବେଳେ କଟକରେ ପାଇପ ଯୋଗେ ପାନୀୟ ଜଳ ପ୍ରକଳ୍ପକୁ ନବୀନ ଉଦଘାଟନ କରିଥିଲେ । ତେବେ ସମାନ୍ତରାଳ ଭାବେ କାର୍ଯ୍ୟକାରୀ ହୋଇଥିବା ଦୁଇ ପ୍ରକଳ୍ପର ଗୁଣଗାନକୁ ବଳିଯାଇଛି କଳି । ଗାଁ ମାଇପିଙ୍କ ଭଳି ଲୁଗାରେ କଣ୍ଟା ପକାଇ କଳି କରିଛନ୍ତି ବିଜେପି ଓ ବିଜେଡ଼ି ନେତା । ସହରାଞ୍ଚଳ ବାସିନ୍ଦାଙ୍କ ପାଇଁ ଦୁଇ ଜନକଲ୍ୟାଣକାରୀ ପ୍ରକଳ୍ପରେ ପଶିଛି ରାଜନୈତିକ ପେଂଚ । ପାଇପ୍ ଯୋଗେ ଗ୍ୟାସ୍ ପ୍ରକଳ୍ପରୁ ଧର୍ମେନ୍ଦ୍ର ପ୍ରଧାନ ସବୁ ଫାଇଦା ନେବାକୁ ଉଦ୍ୟମ କରିଥିବା ବେଳେ ବିଜେଡ଼ି ତାହାକୁ ବରଦାସ୍ତ କରିନି । ତମର କିଛି ବାହାଦୁରି ନାହିଁ, ୨୦୦୯ରୁ ମୁଖ୍ୟମନ୍ତ୍ରୀ ଏଥିପାଇଁ ଉଦ୍ୟମ କରି ଆସୁଛନ୍ତି ବୋଲି କହି ବିଜେପିକୁ ଟକ୍କର ଦେଇଛନ୍ତି ବିଜେଡ଼ି ନେତା ।
ଗତକାଲି ନାଲକୋ ନଗରରେ ଆୟୋଜିତ ଗ୍ୟାସ୍ ପ୍ରକଳ୍ପ ଉତ୍ସବରେ ମୁଖ୍ୟମନ୍ତ୍ରୀଙ୍କୁ କଠୋର ଭାଷାରେ ସମାଲୋଚନା କରିଥିଲେ ଧର୍ମେନ୍ଦ୍ର । ମନଇଚ୍ଛା ବର୍ଷିଥିଲେ । ଗଦା ଗଦା ପ୍ରଶ୍ନ ପଚାରିଥିଲେ । ଏତେ ଗରମ ହୋଇଯାଇଥିଲେ ଯେ ପାଟିର ଭାଷାକୁ ସଂଯମ କରିପାରି ନ ଥିଲେ । ନବୀନ ଓ ତାଙ୍କ ଦଳକୁ ମିଛୁଆ ରାଧୁଆ ଆକ୍ଷେପ କରିବା ସହ ସାମ୍ବାଦିକଙ୍କୁ ଆହ୍ୱାନ ଦେଇଥିଲେ ଯାଅ, ମୋର ପ୍ରଶ୍ନର ଉତ୍ତର ନବୀନଙ୍କୁ ଯାଇ ପଚାର । ତାଙ୍କର ଚେଲା, ଚାମୁଣ୍ଡା କି ବଚସ୍କରଙ୍କୁ ନ ପଚାରି ସିଧାସଳଖ ନବୀନଙ୍କୁ ପଚାର ।
ରାଜନୈତିକ ସମୀକ୍ଷକଙ୍କ ମତରେ ଧର୍ମେନ୍ଦ୍ର ଆଜିକାଲି ସବୁ ସଭାରେ ମୁଖ୍ୟମନ୍ତ୍ରୀଙ୍କୁ ମନଇଚ୍ଛା ଗାଳି କରୁଛନ୍ତି । ଭାଷା ଅଭାଷା ମାନୁନାହାନ୍ତି । ରାଜନୈତିକ ଦୃଷ୍ଟିରୁ ଏଥିରେ କୌଣସି ଆପତ୍ତି ନାହିଁ । ମାତ୍ର ନବୀନଙ୍କ ସହ ବ୍ୟକ୍ତିତ୍ୱ ଓ ଭାବମୂର୍ତ୍ତି ତୁଳନାରେ ଧର୍ମେନ୍ଦ୍ର ବିଷ ପିଉଛନ୍ତି । ଦ୍ୱିତୀୟରେ, ବିଜେଡ଼ିର ଚେଲା, ଚାମୁଣ୍ଡା କି ବଚସ୍କର ଯାହାକୁ କହିଥାଉନ୍ତୁ ନା କାହିଁକି ହେଲେ ଧର୍ମେନ୍ଦ୍ର ନିଜ ଘର କଥା ଭୁଲି ଯାଆନ୍ତୁ ନାହିଁ । ଦଳରେ ନବୀନଙ୍କର ଚେଲା ଚାମୁଣ୍ଡା ଅଛନ୍ତି । ଦଳର ମୁଖ୍ୟ ଭାବେ ତାଙ୍କର ଚେଲା, ଚାମୁଣ୍ଡା ରହିବା ବି ସ୍ୱାଭାବିକ । ହେଲେ ପଦପଦବୀ ଦୃଷ୍ଟିରୁ ରାଜ୍ୟ ବିଜେପିରେ ଧର୍ମେନ୍ଦ୍ର କିଏ ? ତାଙ୍କର ଏଠି ଚେଲା, ଚାମଣ୍ଡା ଭର୍ତ୍ତି ହୋଇଛନ୍ତି କାହିଁକି ? ଦଳର ନେତା ଓ କର୍ମୀଙ୍କୁ ସେ ନିଜର ଚାମଚାଗିରି କରିବାକୁ ବାଧ୍ୟ କରୁନାହାନ୍ତି କି ? ଧର୍ମେନ୍ଦ୍ରଙ୍କର ଏକଛତ୍ରବାଦରେ ତାଙ୍କ ଦଳର ବରିଷ୍ଠ ନେତାମାନେ ଥରହର ହେଉନାହାନ୍ତି କି ? ତେଣୁ ପରକୁ ଅଙ୍ଗୁଳି ଦେଖାଇବା ପୂର୍ବରୁ ନିଜ ଆଡକୁ ଚାରି ଅଙ୍ଗୁଳି ଆସୁଥିବା ଧର୍ମେନ୍ଦ୍ର ଭୁଲି ନ ଯିବା କଥା ।
ଉଲ୍ଲେଖଯୋଗ୍ୟ, ରାଜ୍ୟ ବିଜେପିରେ ଧର୍ମେନ୍ଦ୍ରଙ୍କ ବିଖ୍ୟାତ ଚେଲା ଚାମୁଣ୍ଡାମଣ୍ଡଳୀଙ୍କ ବିଷୟରେ ଆଜିକାଲି ସୋସିଆଲ୍ ମିଡ଼ିଆରେ ବହୁତ ଚର୍ଚ୍ଚା । ଟିଭି ବିତର୍କରେ ସେମାନଙ୍କ ଭାଷା ଓ ଅଶାଳୀନ ହାବଭାବ ସମସ୍ତଙ୍କ ନଜରକୁ ଆସିଛି । ଧର୍ମେନ୍ଦ୍ର ପ୍ରଧାନଙ୍କ ଆଟାକିଂ ମୁଡ୍ କୁ ସେମାନେ ଆଉ ଦୁଇପଦ ଆଗକୁ ନେଉଛନ୍ତି । ତେଣୁ ମୁଖ୍ୟମନ୍ତ୍ରୀଙ୍କ ପାରିଷଦ ଉଦ୍ଦେଶ୍ୟରେ ଚେଲା, ଚାମଣ୍ଡା, ବଚସ୍କର ଭଳି ଶବ୍ଦ ସେମାନଙ୍କ ପାଇଁ ନିହାତି ମାମୁଲି । କିନ୍ତୁ ନବୀନଙ୍କ ବିକଳ୍ପ ଦାବିଦାର ଧର୍ମେନ୍ଦ୍ରଙ୍କ ମୁହଁରେ ଏହା ଶୋଭା ପାଉନି । ଧର୍ମେନ୍ଦ୍ରଙ୍କ ଭାଷା ତାଙ୍କ ସମର୍ଥକଙ୍କୁ ବି ଆଘାତ ଦେଉଛି । ବ୍ୟକ୍ତିତ୍ୱର ମାପକାଠିରେ ଧର୍ମେନ୍ଦ୍ର ପଛରେ ପଡ଼ିଯାଉଥିବା ସେମାନେ ଅନୁଭବ କରିଛନ୍ତି । ଧର୍ମେନ୍ଦ୍ର ନିଜ ପାଟିରେ ଏଭଳି କଥା ନ କହି ନିଜର ଚେଲାଚାମୁଣ୍ଡାଙ୍କ ମୁହଁରେ ବାରମ୍ବାର କୁହାଇବାରେ ଆପତ୍ତି ନାହିଁ ବୋଲି ସେମାନେ ପରାମର୍ଶ ଦେଇଛନ୍ତି ।
