ଛାତି ଚିରିଦେଲେ ଖାଲି ‘ଜୟ’

ଭୁବନେଶ୍ୱର: ଚିଦାମ୍ବରମ୍- ବୈଜୟନ୍ତ ‘ଜୟ’ ପଣ୍ଡାଙ୍କ ବ୍ୟବସାୟିକ ଲିଙ୍କ୍ ଅଭିଯୋଗଟି ନିହାତି ସାଂଘାତିକ । ଅଜିତ୍ ଯୋଗୀ ଦିଲ୍ଲୀରେ ଏହି ଅଭିଯୋଗ ବାଢ଼ିବା ପରେ ସାରା ଦେଶରେ ହଇଚଇ ସୃଷ୍ଟି ହୋଇଛି । ଯୋଗୀଙ୍କ ଅଭିଯୋଗ ଉପରେ ଜୟ ପଣ୍ଡାଙ୍କ ନିରବତା ପ୍ରସଙ୍ଗର ଗମ୍ଭୀରତାକୁ ଆହୁରି ବଢ଼ାଇ ଦେଇଛି । ଜୟଙ୍କ ରାଜନୈତିକ ଓ ବ୍ୟବସାୟିକ ସ୍ୱାର୍ଥନ୍ୱେଷୀ ଚେହେରାକୁ ନେଇ ଭୁବନେଶ୍ୱରଠାରୁ ଦିଲ୍ଲୀ ପର୍ଯ୍ୟନ୍ତ ସବୁ ମହଲରେ ହୁରି ପଡ଼ିଛି । ତେବେ ଏତେବଡ଼ ଗାମ୍ଭୀର୍ଯ୍ୟ ପ୍ରସଙ୍ଗରେ ବିରୋଧୀ ରାଜନୈତିକ ଦଳ ଓ କାମିକା ସାମାଜିକ ସଂଗଠନଗୁଡ଼ିକ ପାଟିରେ ତୁଣ୍ଡି ଲାଗିବା ସାଧାରଣ ଜନତାଙ୍କୁ ବିସ୍ମିତ କରିଛି ।

ରାଜ୍ୟରେ ବିଜେଡ଼ିର ଏବେ ମୁଖ୍ୟ ଶତ୍ରୁ ହେଉଛି ବିଜେପି । ବିଜେଡ଼ିର ସାମାନ୍ୟ ଛିଦ୍ର ପାଇଲେ ବିଜେପି ପ୍ରେସ୍ ମିଟ୍ କରିପକଉଛି । କଂଗ୍ରେସ ସହ ବିଜେପି ଦିଲ୍ଲୀରୁ ଭୁବନେଶ୍ୱର ଯାଏଁ ଅହି ନକୂଳ ସମ୍ପର୍କରେ ଅଛି । ଆଶ୍ଚର୍ଯ୍ୟର କଥା, ବିଜେଡ଼ିର ହାଇପ୍ରୋଫାଇଲ୍ ବରିଷ୍ଠ ସାଂସଦଙ୍କ ସହ କଂଗ୍ରେସର ହାଇପ୍ରୋଫାଇଲ୍ ପୂର୍ବତନ ଅର୍ଥମନ୍ତ୍ରୀଙ୍କ ଅସାଧୁ ବ୍ୟବସାୟିକ କାରବାର ଅଭିଯୋଗ ବିଜେପିବାଲାଙ୍କୁ ବିଚଳିତ କରିପାରୁନି । ଯୋଗୀ ଆଣିଥିବା ଗୁରୁତର ଅଭିଯୋଗକୁ ନ ଯାଇ ଓଲଟି ଜୟ ପଣ୍ଡାଙ୍କ ରାଜନୈତିକ ଗୁମାସ୍ତାଙ୍କ ବରଦିଆ ବୟାନକୁ ମୁଣ୍ଡରେ ମୁଣ୍ଡାଇଛନ୍ତି । ତୃତୀୟ ମହଲାର ଅଣଓଡ଼ିଆ ଅଫିସରଙ୍କୁ ଟାଣିଓଟାରି ଫମ୍ଫା ଭାଷଣବାଜି କରୁଛନ୍ତି । ବିଜେପି ତୁଣ୍ଡରୁ ଏକଥା ଶୁଣି ଲୋକେ ଟାହିଟାପରା କରୁଛନ୍ତି । ନିଜକୁ ସରମ ମଣୁଛନ୍ତି । ଅବଶ୍ୟ ଏହାଦ୍ୱାରା ବିଜେପି-ଜୟ ସମ୍ପର୍କକୁ ସେମାନେ ଶତପ୍ରତିଶତ ଏଷ୍ଟାବ୍ଲିସ୍ କରିଦେଇଛନ୍ତି ।

କଂଗ୍ରେସ ତ ଏମିତିରେ ୧୦୦ ଫାଳ । ବାଜିରେ ଲାଗିଛି ପ୍ରସାଦଙ୍କର ନେତୃତ୍ୱ । ସହଜେ ତାଙ୍କ ଦଳର ନେତା ପି.ଚିଦାମ୍ବରମ୍ ଙ୍କ କଥା ଇଏ । ତେଣୁ ସେମାନେ ନିରବ ରହିବାରେ ଆଶ୍ଚର୍ଯ୍ୟ ହେବାର ନାହିଁ । ହେଲେ ବାମପନ୍ଥୀ ସମେତ ରାଜ୍ୟର ଛୋଟ ଛୋଟ ଦଳଗୁଡ଼ିକ ଗଲେ କୁଆଡେ ? ଚର୍ଚ୍ଚା ହେଉଛି, ସେମାନେ ଚୁପ୍ ରହିବା ପଛରେ ରହିଛି ଅନେକ ଅକୁହା କଥା । କାହାର ଜୟଙ୍କ ଟିଭିକୁ ଡର ତ ଆଉ କିଏ ମ୍ୟାନେଜଡ୍ ।

ସ୍ୱେଚ୍ଛାସେବୀ ସଂଗଠନମାନେ ବି ଏହି ପ୍ରସଙ୍ଗରେ ଉଭାନ ହୋଇଯାଇଛନ୍ତି । ଦୁର୍ନୀତି ମୁଖା ଖୋଲିବାର ବାବିଦାର ବୋଲାଉଥିବା ସିଭିଲ୍ ସୋସାଇଟ୍ କର୍ମକର୍ତ୍ତାଙ୍କଠାରୁ ଜୟ ପଣ୍ଡାଙ୍କ ଇସ୍ୟୁରେ ଲୋହିଆ ଏକାଡେମୀକୁ ପ୍ରେସ୍ ମିଟ୍ ଇନଭିଟେସନ୍ ଆସୁନି । ଏତେବଡ଼ ଦୁର୍ନୀତି ଉପରେ ମନଜ୍ଞାନ ଦେବାକୁ ସେମାନେ ସମୟ ପାଇନାହାନ୍ତି ନା ଆଉ କିଛି ଭିତିରି କଥା ଅଛି ତାହା ରିଅଲ୍ ବୁଦ୍ଧିଜୀବୀଙ୍କୁ ଆନ୍ଦୋଳିତ କରିଛି । ସଂଧ୍ୟାରେ ନିଜକୁ ସଜବାଜ କରି ପଣ୍ଡା ଚାନେଲରେ ନିଜକୁ ମାର୍କେଟିଂ କରିବାର ସୁଯୋଗ ହାତଛଡ଼ା କରିବାର ଡର ବି ଥାଇପାରେ ବୋଲି ସେମାନେ ଆଶଙ୍କା କରୁଛନ୍ତି ।

ଖୋଦ୍ ଆମ ରାଜ୍ୟର ମେନଷ୍ଟ୍ରିମ୍ ମିଡ଼ିଆ ଷ୍ଟାଣ୍ଡ୍ ଆହୁରି ଲଜ୍ଜାଜନକ । ଏତେବଡ଼ ଖବରର ଗଭୀରକୁ ଯାଇ ଛାନଭିନ୍ କରିବେ କ’ଣ ଓଲଟି ଜୟଙ୍କୁ ସୁରକ୍ଷା ଦେବାକୁ ବାଟ କାଟିଛନ୍ତି । ଗୌଣ ପ୍ରସଙ୍ଗକୁ ହାଇପ୍ କରି ଜୟ ପ୍ରସଙ୍ଗକୁ ଡାଉନ୍ ପ୍ଲେ କରିଦେଇଛନ୍ତି । କିଛି ଟିଭି ଓ ପେପର ମାଲିକ ବୈଜୟନ୍ତ ଇସ୍ୟୁରେ ହାତ ନ ମାରିବାକୁ କଡ଼ା ତାଗିଦ୍ କରିଛନ୍ତି । ଖବରକୁ ଚାପିଦେଲେ ତାହା ଧୀରେ ଧୀରେ ଲୋକଲୋଚନରୁ ହଟିଯିବ ବୋଲି ସିମ୍ପଲ୍ ଫର୍ମୂଲା ଧରିଛନ୍ତି । ଜୟ ପଣ୍ଡାଙ୍କ ଟିଭିର ଫଲୋଅର୍ ଟିଭି ଓ ପେପର୍ ଏହି ପ୍ରସଙ୍ଗରେ ଜୟଙ୍କର ଅଖଣ୍ଡ ସ୍ତାବକ ପାଲଟିଛନ୍ତି ।

ଦିଲ୍ଲୀ ମିଡ଼ିଆ ବି ଜୟଙ୍କ ରାସ୍ତାରେ । ମେଟ୍ରୋ ସହରରେ ବେଙ୍ଗ ପରିସ୍ରା କଲେ ଲାଇଭ୍ କରି ଝଡ଼ ସୃଷ୍ଟି କରୁଥିବା ନ୍ୟାସନାଲ୍ ମିଡ଼ିଆ ସେମାନଙ୍କର ପ୍ରିୟ ବନ୍ଧୁ ଜୟଙ୍କ ପ୍ରତି ସହାନୁଭୂତିଶୀଳ ହେବାକୁ ପସନ୍ଦ କରିଛନ୍ତି । ସମ୍ ହସ୍ପିଟାଲ୍ ନିଆ ପାଇଁ ରାଜ୍ୟ ସରକାରଙ୍କ ବିରୋଧରେ ଷ୍ଟୁଡ଼ିଓ ଫଟଉଥିବା ଅର୍ଣ୍ଣବ ଗୋସ୍ୱାମୀଙ୍କର ଚିଦାମ୍ବରମ୍-ଜୟ ଲିଙ୍କ୍ ପ୍ରସଙ୍ଗରେ ପାଟି ଖୋଲୁନି । ରିପବ୍ଲିକ୍ ଟିଭି ଭଳି ଅନ୍ୟ ନ୍ୟାସନାଲ୍ ଟିଭି ପି.ଚିଦାମ୍ବରମ୍ ଙ୍କ ବ୍ୟବସାୟିକ କାରବାର ଓ ସିବିଆଇ ଚଢ଼ଉକୁ ଲାଇଭ୍ ଦେଖାଇ କମ୍ପାମାନ କରୁଥିଲା ବେଳେ ଚିଦାମ୍ବରମ୍-ଜୟ ଲିଙ୍କ୍ ସେମାନଙ୍କ ନଜରକୁ ଆସିପାରୁନି ।