ଭୁବନେଶ୍ୱର: ମୁଖ୍ୟମନ୍ତ୍ରୀଙ୍କ ନିରାମୟ ଜୀବନ ପାଇଁ ବୈଜୟନ୍ତ ‘ଜୟ’ ପଣ୍ଡା ସତରେ ଭାରି ବ୍ୟସ୍ତ ? ପ୍ରବଳ ଗୁଳୁଗୁଳି ସହି ନ ପାରି ଅଶ୍ୱସ୍ତି ଅନୁଭବ କରିଥିବା ମୁଖ୍ୟମନ୍ତ୍ରୀଙ୍କ ପାଇଁ ତାଙ୍କର ବହୁତ ଚିନ୍ତା ? ମହାପ୍ରଭୁ ଜଗନ୍ନାଥଙ୍କ ନିକଟରେ ଆକୁଳ ପ୍ରାର୍ଥନା ? ମୁଖ୍ୟମନ୍ତ୍ରୀଙ୍କ ଅଫିସ୍ ପକ୍ଷରୁ ମୁଖ୍ୟମନ୍ତ୍ରୀ ସମ୍ପୂର୍ଣ୍ଣ ଠିକ୍ ଥିବା ସ୍ପଷ୍ଟୀକରଣ ଆସିଲା ପରେ ବି ଜୟଙ୍କ ମନ ବୁଝିଲାନି । ଟୁଇଟ୍ କରି ଜଗନ୍ନାଥଙ୍କ ପାଖରେ ମୁଖ୍ୟମନ୍ତ୍ରୀଙ୍କ ନିରାମୟ ଜୀବନ ପ୍ରାର୍ଥନା କଲେ ।
ସେପଟେ ଟୁଇଟ୍ ମାଷ୍ଟରଙ୍କ ନିଜସ୍ୱ ଟିଭି ଚାନେଲ୍ ରେ ନବୀନ ନିବାସ ଲାଇଭ୍ ଧମାକା ଲୋକଙ୍କ ମନରେ ମୁଖ୍ୟମନ୍ତ୍ରୀଙ୍କ ସ୍ୱାସ୍ଥ୍ୟାବସ୍ଥା ନେଇ ଆଶଙ୍କା ସୃଷ୍ଟି କଲାବେଳକୁ ଏହି ଟୁଇଟ୍ ଆତଙ୍କିତ କରିଦେଇଥିଲା । ନବୀନଙ୍କୁ ଭଲ ପାଉଥିବା ଲୋକେ ବ୍ୟତିବ୍ୟସ୍ତ ହୋଇପଡ଼ିଲେ । ମୁଖ୍ୟମନ୍ତ୍ରୀ ତାଙ୍କ ପୂର୍ବ ନିର୍ଦ୍ଧାରିତ କାର୍ଯ୍ୟକ୍ରମରେ ଯୋଗଦେଲା ପରେ ଯାଇ ଲୋକଙ୍କ ମନରୁ ଆଶଙ୍କା ହଟିଥିଲା । ସେ ଯାହା ହେଉ ନା କାହିଁକି, ମୁଖ୍ୟମନ୍ତ୍ରୀଙ୍କ ସ୍ୱାସ୍ଥ୍ୟାବସ୍ଥା ନେଇ ଜୟ ପଣ୍ଡାଙ୍କ ଟୁଇଟ୍ ରାଜନୈତିକ ମହଲରେ ଚର୍ଚ୍ଚା ସୃଷ୍ଟି କରିଛି । ଟୁଇଟ୍ ପଛରେ ଜୟଙ୍କ ଆନ୍ତରିକତାକୁ ନେଇ ପ୍ରଶ୍ନ ଉଠିଛି । ମୁଖ୍ୟମନ୍ତ୍ରୀଙ୍କ ସ୍ୱାସ୍ଥ୍ୟ ଠିକ୍ ଅଛି ଜାଣିଲା ପରେ ବି ସେ କ’ଣ ପାଇଁ ଚିନ୍ତିତ ହୋଇପଡ଼ିଲେ ? ଜଗନ୍ନାଥଙ୍କ ନିକଟରେ ପ୍ରାର୍ଥନାଭରା ନିଜ ଟୁଇଟ୍ କୁ ନିଜ ଟିଭିରେ ଦେଖାଇବାରେ କ’ଣ ଅସୁବିଧା ଥିଲା ? ମୁଖ୍ୟମନ୍ତ୍ରୀଙ୍କ ନିରାମୟ ଜୀବନ ଚାହୁଁଥିଲେ ନା ଲୋକଙ୍କ ମଧ୍ୟରେ ଭ୍ରମ ସୃଷ୍ଟି କରି ଅନ୍ୟ କିଛି ଫାଇଦା ହାସଲ ଉଦ୍ୟମରେ ଥିଲେ ?
ଜୟଙ୍କ ଟୁଇଟ୍ ଉପରେ ରିଟୁଇଟ୍ କରିଥିବା କିଛି ଲୋକଙ୍କର ମତାମତ ବି ଆମେ ଏଠାରେ ଉଲ୍ଲେଖ କରୁଛୁ । ଡ. ସ୍ୱାତୀ ମଲ୍ଲିକ ଲେଖିଛନ୍ତି, ଜଗନ୍ନାଥଙ୍କ ପାଖରେ ଡାକିଲା ଭଳି କିଛି ଅସୁବିଧା ହେଇନି । ବରଂ ଜଗନ୍ନାଥଙ୍କ ପାଖରେ ଗୋରଖପୁର ପିଲାଙ୍କ ପାଇଁ ଡାକ । ସମ୍ବିତ୍ କାରକ୍ ସ୍ୱାଇଁ ଲେଖିଛନ୍ତି, ପ୍ଲିଜ୍ ଡୋଣ୍ଟ ଜଏନ୍ ବିଜେପି.. ନବୀନ ବାବୁ ମେ ନଟ୍ ଲିଭ୍ ଫର ଏଭର୍ । ଆଣ୍ଡ ବିଜେପି ଓଣ୍ଟ୍ ପ୍ରୋଭାଇଡ ସିଏମ୍ ପୋଷ୍ଟ ଆଟ୍ ଏନି କଷ୍ଟ୍ । ଗଗନ ସିଂ ଲେଖିଛନ୍ତି, ଷ୍ଟପ୍ ଆକ୍ଟିଂ । ୟୁ ଆଣ୍ଡ ୟୋର୍ ଚାନେଲ୍ ଓନଲି ଲୁକ୍ ଫର୍ ଅପର୍ଚୁନିଟି ଟୁ ଡିଫେମ୍ ବିଜେଡ଼ି ଆଣ୍ଡ ଆୱାର୍ ସିଏମ୍ ।
ଉଲ୍ଲେଖଯୋଗ୍ୟ, ଚିଦାମ୍ବରମ୍ ପରିବାର ସହ ଜୟ ପଣ୍ଡାଙ୍କ ବ୍ୟବସାୟିକ ସମ୍ପର୍କ ନେଇ ଅଜିତ୍ ଯୋଗୀ ଗୁରୁତର ଅଭିଯୋଗ ଆଣିଥିଲେ ମଧ୍ୟ ତାହାର ଜବାବ ଦେବାକୁ ଟୁଇଟ୍ ମାଷ୍ଟରଙ୍କ ଟୁଇଟ୍ ହାଣ୍ଡଲ୍ ଚାଲୁନାହିଁ । ଏ ପ୍ରସଙ୍ଗରେ ସେ ପୂରାପୁରି ଚୁପ୍ ହୋଇଯାଇଛନ୍ତି । ମଉନେ ସମ୍ମତି ଲକ୍ଷଣ ନ୍ୟାୟରେ ଯୋଗୀଙ୍କ ଅଭିଯୋଗ ଠିକ୍ ବୋଲି ବୋଧହୁଏ ଇଙ୍ଗିତ ଦେଇଛନ୍ତି । ଏବେ କିନ୍ତୁ ସେଇ ଟୁଇଟ୍ ଜରିଆରେ ଶୁଖିଲାଟାରେ ନବୀନଙ୍କ ସ୍ୱାସ୍ଥ୍ୟ ନେଇ ତାଙ୍କର ଚିନ୍ତା ରାଜନୀତିରେ ଚର୍ଚ୍ଚାର ବିଷୟ ହୋଇଛି ।
