ଟ୍ରିବ୍ୟୁନାଲ୍ ଛାଟ: ଓରଟେଲ୍ ରେ ପଡ଼ିବ ତାଲା !

ଭୁବନେଶ୍ୱର: ଦେବାଳିଆ ଅବସ୍ଥାରେ ଚାଲୁଥିବା ପଣ୍ଡା ପରିବାର ମାଲିକାନା ସଂସ୍ଥା ଓରଟେଲ୍ କମ୍ୟୁନିକେସନ୍ ଡୁବିବାକୁ ଯାଉଛି । ଋଣଦାତାମାନଙ୍କୁ ଟଙ୍କା ଫେରାଇ ନ ପାରି କମ୍ପାନୀ ଆଇନ ଜାଲରେ ବାନ୍ଧି ହୋଇଯାଇଛି । ନ୍ୟାସନାଲ୍ କମ୍ପାନୀ ଲ’ ଟ୍ରିବ୍ୟୁନାଲ୍ (ଏନସିଏଲଟି) ଓରଟେଲ୍ ବିରୋଧରେ କର୍ପୋରେଟ୍ ଇନସଲଭେନ୍ସି ରିଜୋଲ୍ୟୁସନ୍ ପ୍ରକ୍ରିୟା ଆରମ୍ଭ ପାଇଁ ନିର୍ଦ୍ଦେଶ ଦେଇଛନ୍ତି । ଅନୀଲ ଭାଟିଆଙ୍କୁ ଅନ୍ତରୀଣ ଇନସଲଭେନ୍ସି ପ୍ରଫେସନାଲ୍(ଆଇପି) ଭାବେ ନିଯୁକ୍ତି ଦିଆଯାଇଛି । ଇତିମଧ୍ୟରେ ଶ୍ରୀ ଭାଟିଆ ଓରଟେଲ୍ ଋଣଦାତାଙ୍କ ନିମନ୍ତେ ସର୍ବସାଧାରଣ ନୋଟିସ୍ ଜାରି କରିଛନ୍ତି ।

ଋଣ ଓ ବିଭିନ୍ନ ବକେୟାର ଖିଲାପ ନେଇ ଓରଟେଲ୍ ବିରୋଧରେ କ୍ରମାଗତ ଅଭିଯୋଗ ହୋଇ ଆସୁଥିଲା । ଏମିତିକି ବର୍ଷ ବର୍ଷ ଧରି କର୍ମଚାରୀଙ୍କ କର୍ମଚାରୀଙ୍କ ଦରମା ଦେଉ ନ ଥିବା ବି ଅଭିଯୋଗ ରହିଛି । ତେବେ ସୋନି ପିକଚର୍ସ ନେଟୱାର୍କସ୍(ଭାରତ) ପ୍ରାଇଭେଟ୍ ଲିମିଟେଡ଼ର ଅଭିଯୋଗ ଏହାକୁ ନିର୍ଣ୍ଣାୟକ ମୋଡ଼ ଦେଇଛି । ସୋନି ଏହାର ପ୍ରସାରଣ ବାବଦକୁ ଓରଟେଲ ଉପରେ ୧୨ କୋଟି ଟଙ୍କା ବକେୟା ପ୍ରାପ୍ୟ ଦାବି କରି ନିରାଶ ହେବା ପରେ ଗତ ସେପ୍ଟେମ୍ବର ମାସରେ ଏନସିଏଲଟି ପାଖରେ ପିଟିସନ୍ ଦାଖଲ କରିଥିଲା । ଏନସିଏଲଟି ସୋନିର ଆବେଦନକୁ ଗ୍ରହଣ କରି ତାଙ୍କ ନିଷ୍ପତ୍ତି ଶୁଣାଇଛନ୍ତି । ଓରଟେଲ୍ ବିରୋଧରେ ଇନସଲଭେନ୍ସି ଆଣ୍ଡ ବ୍ୟାଙ୍କରପ୍ସୀ କୋଡ୍,୨୦୧୬ର ଧାରା ୬ ଅନୁଯାୟୀ କର୍ପୋରେଟ୍ ଇନସଲଭେନ୍ସି ରିଜୋଲ୍ୟୁସନ୍ ପ୍ରକ୍ରିୟା ଆରମ୍ଭ ପାଇଁ ନିର୍ଦ୍ଦେଶ ଦିଆଯାଇଛି । ୬ ମାସ ମଧ୍ୟରେ (୨୬.୦୫.୨୦୧୯) ପ୍ରକ୍ରିୟା ଶେଷ ହେବ । ଅନ୍ତରୀଣ ରିଜୋଲ୍ୟୁସନ୍ ପ୍ରଫେସନାଲ୍ (ଆଇଆରପି) ଭାବେ ଅନୀଲ ଭାଟିଆଙ୍କୁ ନିଯୁକ୍ତି ଦିଆଯାଇଛି ।

ଗତ ୨୭ ତାରିଖରେ ଓରଟେଲ୍ ପାଖରେ ନିର୍ଦ୍ଦେଶ ହସ୍ତଗତ ହେବା ପରେ ପ୍ରକ୍ରିୟା ଆରମ୍ଭ ହୋଇଛି । ଶ୍ରୀ ଭାଟିଆ ଅରଟେଲ କମ୍ୟୁନିକେସନ୍ ର ସମସ୍ତ ଋଣଦାତା(କ୍ରେଡିଟର୍) ମାନଙ୍କ ନିମନ୍ତେ ବିଜ୍ଞାପନ ଜରିଆରେ ଘୋଷଣା ଜାରି କରିଛନ୍ତି । ଓରଟେଲ୍ କମ୍ୟୁନିକେସନ୍ ର କ୍ରେଡିଟର୍ ମାନେ ସେମାନଙ୍କ ଦାବି ଡିସେମ୍ବର ୧୧ ତାରିଖ ସୁଦ୍ଧା ଅନ୍ତରୀଣ ରିଜୋଲ୍ୟୁସନ୍ ପ୍ରଫେସନାଲ୍ ଙ୍କ ପାଖରେ ଦାଖଲ କରିବାକୁ ଏଥିରେ କୁହାଯାଇଛି ।

ନିୟମ ଅନୁଯାୟୀ ଆଇଆରପିଙ୍କ ଦ୍ୱାରା ନିଯୁକ୍ତ କ୍ରେଡିଟର୍ସ କମିଟି କମ୍ପାନୀର ଆର୍ଥିକ ସ୍ଥିତି ଓ ବିଭିନ୍ନ ଦିଗ ଉପରେ ପୁଙ୍ଗାନୁପୁଙ୍ଖ ତର୍ଜମା କରି ରିଜୋଲ୍ୟୁସନ୍ ପ୍ଲାନ୍ ପ୍ରସ୍ତୁତ କରିବେ । ଏହି ପ୍ରକ୍ରିୟାର ଫଳାଫଳରେ ଅରଟେଲ୍ କମ୍ପାନୀକୁ ଜୀବନ୍ତ ରଖି ପୁର୍ନଗଠନ ଜରିଆରେ ବକେୟା ହିସାବନିକାଶ କରାଯିବ ନଚେତ୍ କମ୍ପାନୀର ସମସ୍ତ ସମ୍ପତ୍ତି ବିକ୍ରୀ କରାଯାଇ ଦେୟ ପରିଶୋଧ କରାଯିବ । ତେବେ ଅରଟେଲ୍ ର ଯାହା ସ୍ଥିତି ସେଥିରେ ଯେ କମ୍ପାନୀର ପୁର୍ନଗଠନ କରାଯାଇ ଆର୍ଥିକ ସ୍ଥିତି ସଜଡ଼ାଯିବ ତାହା ସମ୍ଭବ ମନେହେଉନି ବୋଲି ବିଶେଷଜ୍ଞମାନେ ମତ ଦେଇଛନ୍ତି । ସୁତରାଂ କମ୍ପାନୀର ଲିକ୍ୟୁଡେସନ୍ ହିଁ ଏକମାତ୍ର ରାସ୍ତା ବୋଲି ସେମାନେ କହିଛନ୍ତି ।

କେବୁଲ୍, ବ୍ରଣ୍ଡବ୍ୟାଣ୍ଡ, କେବୁଲ ଟିଭି ଓ ଡିଜିଟାଲ୍ ଟିଭି ଭଳି ବ୍ୟବସାୟରେ ସଂପୃକ୍ତ ଓରଟେଲ୍ କର୍ତ୍ତୃପକ୍ଷଙ୍କ ବିରୋଧରେ ଗ୍ରାହକ ଓ କର୍ମଚାରୀ ଶୋଷଣ, ଗୁଣ୍ଡାରାଜ ଓ ଆର୍ଥିକ ବେଫିକର ଭଳି ଗୁରୁତର ଅଭିଯୋଗ ବର୍ଷ ବର୍ଷ ଧରି ଗଡ଼ି ଆସୁଛି । ଋଣଦାତାଙ୍କ ପଇସା ନ ଫେରାଇବା ଓ ଦେୟ ପରିଶୋଧରେ ଖିଲାପ ଭଳି ସଙ୍ଗୀନ ଅଭିଯୋଗରେ କମ୍ପାନୀ ଛନ୍ଦି ହୋଇରହିଛି । ଓରଟେଲ୍ କେବୁଲ ସେବାକୁ ନେଇ ଗ୍ରାହକଙ୍କ ମଧ୍ୟରେ ପ୍ରବଳ ଅସନ୍ତୋଷ ଲାଗିରହିଛି ।

ସ୍ମରଣଯୋଗ୍ୟ, ଅତୀତରେ ଭୂଷଣ କମ୍ପାନୀକୁ ଏଭଳି ଦଶା ଭୋଗିବାକୁ ପଡ଼ୁଥିଲା । ଦେବାଳିଆ ହୋଇଥିବା କମ୍ପାନୀର ଭାଗ୍ୟ ନ୍ୟାସନାଲ୍ ଲ’ ଟ୍ରିବ୍ୟୁନାଲ୍ କୋର୍ଟକୁ ଯାଇଥିଲା । ଯାହାର ପରିଣାମ ହେଲା ଭୂଷଣରେ ତାଲା । ଓରଟେଲ୍ କ୍ଷେତ୍ରରେ ସମ୍ଭବତଃ ସେୟା ହେବାକୁ ଯାଉଛି ।