ତିତଲି ସହାୟତା ପାଇଁ ରାଜନାଥଙ୍କୁ ଚିଠି ଲେଖିଲେ ନବୀନ

ଭୁୁବନେଶ୍ୱର: କେନ୍ଦ୍ରଠାରୁ ତିତଲି କ୍ଷତିଗ୍ରସ୍ତ ଓଡ଼ିଶାକୁ ଏପର୍ଯ୍ୟନ୍ତ ସହାୟତା ମିଳିଲାନି । ଏହାଦ୍ୱାରା କ୍ଷତିଗ୍ରସ୍ତ ଅଞ୍ଚଳରେ ମରାମତି ଓ ପୁନଃନିର୍ମାଣ କାର୍ଯ୍ୟ ବାଧାପ୍ରାପ୍ତ ହୋଇଛି । ତୁରନ୍ତ କେନ୍ଦ୍ରୀୟ ସହାୟତା ଯୋଗାଇ ଦେବାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି କେନ୍ଦ୍ର ଗୃହମନ୍ତ୍ରୀ ରାଜନାଥ ସିଂଙ୍କୁ ଚିଠି ଲେଖିଛନ୍ତି । ଏ ଦିଗରେ ବ୍ୟକ୍ତିଗତ ଭାବେ ଧ୍ୟାନ ଦେବାକୁ ମୁଖ୍ୟମନ୍ତ୍ରୀ ଅନୁରୋଧ କରିଛନ୍ତି ।

ମୁଖ୍ୟମନ୍ତ୍ରୀ ଲେଖିଛନ୍ତି, ତିତଲି ବାତ୍ୟା, ବନ୍ୟା ଓ ଭୂସ୍ଫଳନ ଯୋଗୁଁ ୧୭ ଜିଲ୍ଲା ପ୍ରଭାବିତ ହୋଇଛି ।୧୨୮ ବ୍ଲକ୍ ର ୬୦.୩୧ ଲକ୍ଷ ଲୋକ କ୍ଷତିଗ୍ରସ୍ତ ହୋଇଛନ୍ତି । ଏହି ଦୁର୍ବିପାକର ମୁକାବିଲା ପାଇଁ ରାଜ୍ୟ ସରକାର ସବୁପ୍ରକାର ପଦକ୍ଷେପ ନେଇଥିଲେ । କ୍ଷତିଗ୍ରସ୍ତ ଲୋକଙ୍କୁ ସହାୟତା ଦେବା ସହ ନଷ୍ଟ ହୋଇଯାଇଥିବା ଘର, ଭିତ୍ତିଭୂମି ଆଦିର ମରାମତି ଓ ପୁନଃନିର୍ମାଣ କାର୍ଯ୍ୟକୁ ଯୁଦ୍ଧକାଳୀନ ଭିତ୍ତିରେ କରିଥିଲେ । ଏଥିପାଇଁ ରାଜ୍ୟ ବିପର୍ଯ୍ୟୟ ପ୍ରଶମନ ପାଣ୍ଠି(ଏସଡିଆରଏଫ)ରୁ ୧୬୮୯.୧୩ କୋଟି ଟଙ୍କା ବିନିଯୋଗ କରାଯାଇଛି । ଯାହାଫଳରେ ଏସଡିଆରଏଫ୍ ପାଣ୍ଠି ସମ୍ପୂର୍ଣ୍ଣ ଖାଲି ହୋଇଯାଇଛି । ଏହି ପାଣ୍ଠି ପୂରଣ ସହ ବାକି ରହିଥିବା ମରାମତି ଓ ପୁନଃନିର୍ମାଣ କାର୍ଯ୍ୟ ପାଇଁ ଏନଡିଆରଏଫରୁ ଅର୍ଥର ଜରୁରୀ ହୋଇପଡ଼ିଛି ।

ମୁଖ୍ୟମନ୍ତ୍ରୀ ଜଣାଇଛନ୍ତି ଯେ ରାଜ୍ୟ ସରକାର ୨୭୭୯.୩୨ କୋଟି ଟଙ୍କାର କ୍ଷତି ଆକଳନ କରି ଏକ ସ୍ମାରକପତ୍ର ଜରିଆରେ କେନ୍ଦ୍ରଠାରୁ ୨୦୨୩.୧୩ କୋଟି ସହାୟତା ମାଗିଥିଲେ । ମୁଁ ନିଜେ ପ୍ରଧାନମନ୍ତ୍ରୀଙ୍କୁ ଗତ ଅକ୍ଟୋବର ୧୮ ତାରିଖରେ ଚିଠି ଲେଖି ୧୦୦୦ କୋଟି ଟଙ୍କା ଅନ୍ତରୀଣ ସହାୟତା ଦେବାକୁ ଅନୁରୋଧ କରିଥିଲି । ଇତିମଧ୍ୟରେ କେନ୍ଦ୍ରୀୟ ଟିମ୍ ନଭେମ୍ବର ପ୍ରଥମ ସପ୍ତାହରେ କ୍ଷତିଗ୍ରସ୍ତ ଅଞ୍ଚଳ ବୁଲି କ୍ଷୟକ୍ଷତି ଆକଳନ କରିଛନ୍ତି । କିନ୍ତୁ ବର୍ତ୍ତମାନ ସୁଦ୍ଧା ଆମେ କୌଣସି ସହାୟତା ପାଇନାହୁଁ ।

ସୂଚନାଯୋଗ୍ୟ, ତିତଲି ପ୍ରଭାବିତ ଆନ୍ଧ୍ରପ୍ରଦେଶକୁ ଗତ ୬ ତାରିଖରେ ୫୩୯.୫୨ କୋଟି କେନ୍ଦ୍ରୀୟ ସହାୟତା ମଂଜୁର କରାଯାଇଛି । କେରଳକୁ ୩୦୪୮ କୋଟି ଏବଂ ନାଗାଲାଣ୍ଡକୁ ୧୩୧୬ କୋଟି ଟଙ୍କା ଦେଇଛନ୍ତି କେନ୍ଦ୍ର ସରକାର । ମାତ୍ର ଓଡ଼ିଶା କଥା ବିଚାରକୁ ନେଇନାହାନ୍ତି ।