ଧର୍ମେନ୍ଦ୍ରଙ୍କୁ ଚେକ୍ ଦେଲେଣି ଅପରାଜିତା!

ଭୁୁବନେଶ୍ୱର: ସାରା ରାଜ୍ୟରୁ ମହିଳା ଗୋଷ୍ଠୀଙ୍କୁ ଏକତ୍ରିତ କରିବା ଉଦ୍ୟମରେ ଗଠନ ହେଲା ‘ଅଜିତା’ । ପରେ ପରେ ଯୁବଶକ୍ତିଙ୍କୁ ନେଇ ଗଢ଼ା ହେଲା ‘ୟୁଥ୍ ଫର ଆକ୍ସନ୍’ । ଦୁଇଟିଯାକର ନେତୃତ୍ୱ ନେଇଛନ୍ତି ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ । ଏହା ଅଣରାଜନୈତିକ ପ୍ଲାଟଫର୍ମ ବୋଲି ଦାବି କରାଯାଉଥିଲେ ମଧ୍ୟ ପ୍ରଚ୍ଛଦରେ ବିଜେପି ଛାମୁଆ ସଂଗଠନ ବୋଲି କୁହାଯାଉଛି । ବିଜେଡ଼ିର ‘ମିଶନ ଶକ୍ତି’ ଏବଂ ‘ବିଜୁ ଯୁବ ବାହିନୀ’ କୁ ଟକ୍କର ଦେବା ସହ ମହିଳା ଓ ଯୁବ ଭୋଟବ୍ୟାଙ୍କକୁ ବିଜେପି ସପକ୍ଷରେ ହାତେଇବା ପାଇଁ ଏଭଳି ରଣନୀତି ପ୍ରସ୍ତୁତ ହୋଇଛି । ଅପରାଜିତା ଏଥିରେ ବୁଦ୍ଧି ଖଟାଇବା ସହ ଦାୟିତ୍ୱ ନେଇଛନ୍ତି ।

ବିଡ଼ମ୍ବନା ହେଉଛି, ଓଡ଼ିଶା ବିଜେପିର ସର୍ବମୟ କର୍ତ୍ତା କୁହାଯାଉଥିବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏଥିରେ ନ୍ୟୁନ ହୋଇଯାଇଛନ୍ତି । ଗତକାଲି ‘ୟୁଥ୍ ଫର ଆକ୍ସନ’ ଶୁଭାରମ୍ଭ କାର୍ଯ୍ୟକ୍ରମ ବେଳେ କେନ୍ଦ୍ରମନ୍ତ୍ରୀ ଭୁବନେଶ୍ୱରରେ ଉପସ୍ଥିତ ଥାଇ ମଧ୍ୟ ତାଙ୍କୁ ସେଠି ଦେଖିବାକୁ ମିଳିଲାନି । ଅପରାଜିତା ତାଙ୍କୁ ଆମନ୍ତ୍ରଣ କରିଥିଲେ ସେ ଗଲେନି ନା ଅପରାଜିତା ତାଙ୍କୁ ଆଦୌ ଆମନ୍ତ୍ରଣ କରିନଥିଲେ ତାହା ଜଣାପଡ଼ିନି । ତେବେ ବିଜେପି ରାଷ୍ଟ୍ରୀୟ ଉପସଭାପତି ବୈଜୟନ୍ତ ପଣ୍ଡା କିନ୍ତୁ ସେଠି ଅତିଥି ହୋଇଥିଲେ । ଏପରିକି ବୈଜୟନ୍ତଙ୍କ ଆଗମନରେ ବିଳମ୍ବ ହେବାରୁ ଅପରାଜିତା ବ୍ୟସ୍ତ ହୋଇପଡ଼ିଥିଲେ ।

ଏହି ଗୋଟିଏ ଘଟଣାରୁ ଓଡ଼ିଶାରେ ବିଜେପିର ଆଭ୍ୟନ୍ତରୀଣ ରାଜନୀତିର ବାତ୍ସ୍ନା ବାରିଛନ୍ତି ରାଜନୈତିକ ସମୀକ୍ଷକ । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଭୂମିକାରେ କେହି କେହି ଅପରାଜିତା ଷଡ଼ଙ୍ଗୀଙ୍କୁ ଦେଖିବାକୁ ପାଇଛନ୍ତି । ଗତ ୫ ବର୍ଷ ଧରି ଯେଉଁ କାର୍ଯ୍ୟ ଧର୍ମେନ୍ଦ୍ର କରୁଥିଲେ ଆଜି ଅପରାଜିତା ହାତେଇଲେଣି । ଖାଲି ସେତିକି ନୁହେଁ, ଧର୍ମେନ୍ଦ୍ରଙ୍କୁ ଚେକ୍ ଦେବାକୁ ସବୁ ପ୍ରକାର ବ୍ୟବସ୍ଥା ହେଉଥିବା ବି ବିଶ୍ୱାସ କରାଯାଉଛି ।

‘ୟୁଥ୍ ଫର୍ ଆକ୍ସନ’ ର ସଂଯୋଜକ ଦାୟିତ୍ୱ ଦେବାଶିଷ ନାୟକ ଓରଫ୍ ବାପି ଜିମ୍ କୁ ଦେଇ ଅପରାଜିତା ଧର୍ମେନ୍ଦ୍ର ଗୋଷ୍ଠୀଙ୍କୁ ଚାବୁକ୍ ଦେଖାଇଥିବା ଅନେକ କଟାକ୍ଷ କରିଛନ୍ତି । କାରଣ ଧର୍ମେନ୍ଦ୍ରଙ୍କ ଏକାନ୍ତ ଅନୁଗତ ତଥା ବିଜେପିର ଭୁବନେଶ୍ୱର ଜିଲ୍ଲା ସଭାପତି ହରେକୃଷ୍ଣ ଖୁଣ୍ଟିଆଙ୍କ ପ୍ରତିଦ୍ୱନ୍ଦୀ ଭାବେ ଦେବାଶିଷ ଏବେ ଜଣାଶୁଣା । ନିକଟରେ ହରେକୃଷ୍ଣଙ୍କୁ ସେ ମରଣାନ୍ତକ ଆକ୍ରମଣ କରିଥିବା ଅଭିଯୋଗ ହୋଇଥିଲା । ଅପରାଜିତାଙ୍କ ଇଙ୍ଗିତରେ ଏହି ଆକ୍ରମଣ ହୋଇଥିବା ହରେକୃଷ୍ଣ ଗଣମାଧ୍ୟମରେ ବୟାନ ଦେଇଥିଲେ । ଏମିତିରେ ଅପରାଜିତା ବିଜେପିରେ ମିଶିଲା ପରଠୁ ତାଙ୍କର କାର୍ଯ୍ୟକଳାପକୁ ଭୁବନେଶ୍ୱର ଜିଲ୍ଲା କର୍ମକର୍ତ୍ତାମାନେ ପସନ୍ଦ କରୁନାହାନ୍ତି । ଦଳୀୟ କର୍ମକର୍ତ୍ତାଙ୍କୁ ଅଣଦେଖା କରି ଅପରାଜିତା ନିଜସ୍ୱ ସଂଗଠନ ତିଆରି କରୁଥିବା ସେମାନେ ଅଭିଯୋଗ କରି ଆସୁଛନ୍ତି ।

ଏହି ପୃଷ୍ଠଭୂମିରେ ଧର୍ମେନ୍ଦ୍ରଙ୍କ ଦୃଶ୍ୟମାନ ନ ଥିବା ଅପରାଜିତାଙ୍କ ‘ଅଜିତା’ ଏବଂ ‘ୟୁଥ୍ ଫର୍ ଆକ୍ସନ୍’ ଜନ୍ମକୁଣ୍ଡଳି ଦେଖିଲା ପରେ ସେମାନଙ୍କର ଅଭିଯୋଗର ବାସ୍ତବତା ବାରୁଛନ୍ତି ରାଜନୈତିକ ପଣ୍ଡିତ । ତେବେ ଧର୍ମେନ୍ଦ୍ରଙ୍କୁ ଅଣଦେଖା କରିବାର ଧୃଷ୍ଟତା ସେ କେଉଁଠୁ ପାଇଲେ ତାହାକୁ ନେଇ ଭିନ୍ନ ଭିନ୍ନ ଚର୍ଚ୍ଚା ହେଉଛି । ବିନା ଦିଲ୍ଲୀ ଇସାରା ଓ ପ୍ରଚ୍ଛନ୍ନ ଆର୍ଶିବାଦରେ ଅପରାଜିତା ଏଭଳି କାର୍ଯ୍ୟକ୍ରମ ଯେ ହାତକୁ ନେଇଛନ୍ତି ତାହା ବିଶ୍ୱାସ କରିହେଉନି ।

ସୂଚନାଯୋଗ୍ୟ, ଓଡ଼ିଶାରେ ବିଜେପିର ୮ ଜଣ ସାଂସଦ ଥିବା ବେଳେ ଭୁବନେଶ୍ୱର କ୍ଷେତ୍ରରୁ ପ୍ରତିନିଧିତ୍ୱ କରୁଥିବା ଅପରାଜିତା ବିଭିନ୍ନ ଆଳରେ ସାରା ରାଜ୍ୟ ବୁଲୁଛନ୍ତି । କର୍ମୀଙ୍କ ସହ ପ୍ରତ୍ୟକ୍ଷ ସମ୍ପର୍କ ସ୍ଥାପନ ଚରୁଛନ୍ତି । ଏବେ ଦୁଇ ଦୁଇଟି ପ୍ଲାଟଫର୍ମ ଜରିଆରେ ମହିଳା, ଯୁବକଙ୍କୁ ଏକାଠି କରିବା ଆରମ୍ଭ କରିଛନ୍ତି ।

ଅପରାଜିତାଙ୍କ ଖାସ୍ ଅନୁଗତ ମହଲର ଖବରକୁ ବିଶ୍ୱାସ କରାଗଲେ ମଜ୍ଜାଦାର ସମୀକରଣର ଆଭାସ ମିଳୁଛି । କୁଆଡ଼େ ସିଧାସଳଖ ପ୍ରଧାନମନ୍ତ୍ରୀଙ୍କ ଅଫିସ୍ ଇସାରାରେ ଅପରାଜିତା ବିଭିନ୍ନ କାର୍ଯ୍ୟକ୍ରମ ହାତକୁ ନେଇଛନ୍ତି । ଅମିତ୍ ଶାହାଙ୍କ ମେଣ୍ଟର୍ ଧର୍ମେନ୍ଦ୍ରଙ୍କୁ ହାତରେ ନ ମାରି ଭାତରେ ମାରିବା ଯୋଜନା ହୋଇଛି । ଓଡ଼ିଶାରେ ଧର୍ମେନ୍ଦ୍ର ତାଙ୍କ ଯାଦୁ ଦେଖାଇବାରେ ବିଫଳ ହୋଇଥିବାରୁ ପ୍ରଧାନମନ୍ତ୍ରୀଙ୍କ ଅଫିସ୍ ଅପରାଜିତାଙ୍କୁ ଭରସା କରିଛନ୍ତି । ଉପରୁ ଆର୍ଶିବାଦ ପାଇ ଅପରାଜିତା ରାଜ୍ୟ ବୁଲୁଛନ୍ତି । ସଂଗଠନ ସଜାଡ଼ିବା ଉଦ୍ୟମରେ ଧର୍ମେନ୍ଦ୍ରଙ୍କ ବିରୋଧୀମାନଙ୍କୁ ପ୍ରାଧାନ୍ୟ ଦେବା ଆରମ୍ଭ କରିଛନ୍ତି ।

ଏହାର ସତ୍ୟାସତ୍ୟ ଯାହା ହେଉ ନା କାହିଁକି, ଧର୍ମେନ୍ଦ୍ରଙ୍କୁ ଚେକ୍ ଦେବା ପାଇଁ ଅପରାଜିତା ଯେ ଉଦ୍ୟମ କରୁଛନ୍ତି ତାହା ସମସ୍ତେ ଅନୁଭବ କଲେଣି । ଏହାକୁ ନେଇ ରାଜନୈତିକ ମହଲରେ ଗରମାଗରମ ଚର୍ଚ୍ଚା ହେଉଛି । ପରିବର୍ତ୍ତିତ ରାଜନୈତିକ ସମୀକରଣରେ ଶକ୍ତିଶାଳୀ କେନ୍ଦ୍ରମନ୍ତ୍ରୀଙ୍କ ଭୂମିକା ଆଡକୁ ସମସ୍ତଙ୍କ ନଜର ଯାଇଛି ।