ଭୁବନେଶ୍ୱର: ଗତକାଲି ସଂଧ୍ୟା ସୁଦ୍ଧା ନବୀନ ନିବାସରେ ପ୍ରାୟ ୩୦ ହଜାର ବାୟୋଡାଟା ପହଞ୍ଚିସାରିଲାଣି । ହିଂଜିଳିକାଟୁକୁ ଛାଡ଼ିଦେଲେ ୧୪୬ ଟି ବିଧାନସଭା ଓ ୨୧ଟି ଲୋକସଭା ଆସନରୁ ଏମାନେ ବିଜେଡ଼ି ଟିକେଟ ପାଇଁ ଆବେଦନ କରିଛନ୍ତି । ଏବେ ବି ପ୍ରତିଦିନ ହଜାର ହଜାର ସଂଖ୍ୟାରେ ଆଶାୟୀଙ୍କ ଆବେଦନ ନବୀନ ନିବାସରେ ପହଞ୍ଚୁଛି ଏବଂ ଏହି ଧାରା ଜାରି ରହିଲେ ସମ୍ପୂର୍ଣ୍ଣ ପ୍ରାର୍ଥୀ ତାଲିକା ଘୋଷଣା ବେଳକୁ ଆଶାୟୀଙ୍କ ସଂଖ୍ୟା ୫୦ ହଜାର ଛୁଇଁଯିବ ବୋଲି ଆକଳନ କରାଯାଉଛି । ଓଡ଼ିଶା ରାଜନୀତି ଇତିହାସରେ ଗୋଟିଏ ଦଳରୁ ଏତେ ସଂଖ୍ୟକ ଆଶାୟୀ ଏକ ସର୍ବକାଳୀନ ରେକର୍ଡ ବୋଲି କୁହାଗଲାଣି ।
ନବୀନ ନିବାସର କିଛି ସୂତ୍ରରୁ ମିଳୁଥିବା ଏହି ଆଶାୟୀ ସଂଖ୍ୟାକୁ ବିଶ୍ୱାସ କରାଗଲେ, ଅଧିକାଂଶ ନିର୍ବାଚନମଣ୍ଡଳୀରୁ ବିଧାୟକଙ୍କ ଚେଲାଚାମଣ୍ଡା, କୁଜି କର୍ମୀ/ନେତାଙ୍କଠାରୁ ଆରମ୍ଭ କରି ୱାର୍ଡ ମେମ୍ବର, ସମିତି ସଭ୍ୟ, ସରପଞ୍ଚ , ବିଭିନ୍ନ ସଂସ୍ଥା ଓ ସରକାରୀ ଅଫିସରେ କାମ କରୁଥିବା କିଛି ବାବୁ, ତାଙ୍କ ପତ୍ନୀ ସମସ୍ତେ ଗୋଟିଏ ଗୋଟିଏ ଆବେଦନ ପତ୍ର ପକାଇ ଦେଇଛନ୍ତି । ଉପର ନେତାଙ୍କ କଳିରୁ କାଳେ ତାଙ୍କ ଭାଗ ପଡ଼ିଯିବ ସେହି ଆଶାରେ ଈଶ୍ୱରଙ୍କୁ ମୁଣ୍ଡିଆ ମାରି ବସିଛନ୍ତି । ନବୀନ ନିବାସ ଆଗରେ ଚକ୍କର କାଟୁଥିବା ଭଦ୍ରକ ଅଞ୍ଚଳର ଜଣେ ଆଶାୟୀ କହିଛନ୍ତି, ମୁଁ ବିଜେଡ଼ି ପାଇଁ ଦିନରାତି ଖଟି ଆସିଛି । ମୋର ବିଶ୍ୱାସ ନବୀନବାବୁ ଏଥର ମୋ କଥା ବୁଝିବେ । ସେହିଭଳି କଳାହାଣ୍ଡିରୁ ଜଣେ ମହିଳା ଆଶାୟୀ କହିଛନ୍ତି, ନବୀନବାବୁ ମହିଳା ସଶକ୍ତିକରଣ ଉପରେ ଗୁରୁତ୍ୱ ଦେଉଥିବାରୁ ମୋ କଥା ବିଚାର କରିବେ ବୋଲି ଆଶା ରଖିଛି ।
ତେବେ ସିରିୟସ୍ ଆଶାୟୀଙ୍କ ମଧ୍ୟରେ ଟିକେଟକୁ ନେଇ ଛକାପଂଝା କିନ୍ତୁ ତୀବ୍ର ହୋଇଛି । ଏଭଳି ସ୍ଥିତି ନୂଆ ନହେଲେ ମଧ୍ୟ ପୂର୍ବର ସବୁଥରଠାରୁ ଏଥର ଜଟିଳ ହୋଇଛି । ଦୃଢ଼ ଆଶାରେ ବସିଥିବା ବହୁତ ଆଶାୟୀ ଟିକେଟ ନ ପାଇଲେ ବିଜେପିକୁ ଚାଲିଯିବେ ନଚେତ୍ ସ୍ୱାଧୀନ ଭାବେ ଲଢ଼ି ଦଳୀୟ ପ୍ରାର୍ଥୀଙ୍କୁ ହରାଇଦେବେ କହି ବ୍ଲାକମେଲିଂ କରୁଛନ୍ତି । ସିଧାସଳଖ ମୁଖିଆଙ୍କୁ ଗୁହାରି କରିବାର ସୁଯୋଗ ଓ ସାହାସ ନ ଥିଲେ ମଧ୍ୟ ଦଳର ମୁଣ୍ଡିଆଳ ନେତାଙ୍କୁ ଭେଟି ଗୁହାରି ଓ ଦରକାର ପଡ଼ିଲେ ଧମକ ଦେଉଛନ୍ତି ।
ବିଜେଡ଼ି ଆଶାୟୀଙ୍କ ଏଭଳି ଅବସ୍ଥାକୁ ଦେଖି ଟିକେଟ ଘୋଷଣା ପରେ ଦଳରେ ବିଦ୍ରୋହ ସୁନିଶ୍ଚିତ ବୋଲି ବିରୋଧୀ ଦଳ ଚାହିଁବସିଛନ୍ତି । ବିଶେଷକରି ବିଜେଡ଼ିର ଏହି ସମ୍ଭାବ୍ୟ ସ୍ଥିତିରୁ ନିଜ ଦଳର ନିର୍ବାଚନ ଅଙ୍କ କଷୁଛି ବିଜେପି । ଅନେକ ନିର୍ବାଚନମଣ୍ଡଳୀରେ ବିଜେପିର ସାଂଗଠନିକ ସ୍ଥିତି ସଳଖ ନ ଥିବାରୁ ସେମାନେ ନିଜ ବଳରେ ଜିତିବେ ବୋଲି ଦଳୀୟ ନେତୃତ୍ୱର ବିଶ୍ୱାସ ନାହିଁ । ତେଣୁ ବିଜେଡ଼ି ବିଦ୍ରୋହୀଙ୍କୁ ଅସ୍ତ୍ର କରି ରାଜ୍ୟରେ ବିଜେପିକୁ ଜିତାପଟ କରିବେ ଏବଂ କ୍ଷମତା ଦଖଲ କରିବେ ବୋଲି ଆକଳନ କରୁଛନ୍ତି ।
ବର୍ଷକ ତଳୁ ରାଜ୍ୟ ବିଜେପି ଶକ୍ତି ଉପରୁ ଭରସା ତୁଟିଯିବା ପରେ ଅମିତ୍ ଶାହା ଓ ଧର୍ମେନ୍ଦ୍ର ପ୍ରଧାନ ଏହି ବିକଳ୍ପ ଯୋଜନା କରିଛନ୍ତି ବୋଲି ବିଜେପିର ଜଣେ ବରିଷ୍ଠ ଅସନ୍ତୁଷ୍ଟ ନେତା କହିଛନ୍ତି । ତାଙ୍କର କହିବା କଥା, ଆମ ନିଜ ଶକ୍ତିରେ ଆମେ ୧୦ ଟି ଆସନ ପାଇବୁ କି ନାହିଁ ସନ୍ଦେହ। ଆମ ଦଳରେ ବି ପ୍ରବଳ ଗୋଷ୍ଠୀକନ୍ଦଳ ରହିଛି । ଧର୍ମେନ୍ଦ୍ର ପ୍ରଧାନଙ୍କ ନେତୃତ୍ୱକୁ ଅନେକ ପୁରୁଖା ନେତା ଗ୍ରହଣ କରିନାହାନ୍ତି । ଅଧିକାଂଶ ଜିଲ୍ଲାରେ ନୂଆ ପୁରୁଣା ଲଢ଼େଇ ତୀବ୍ର ରହିଛି । ତେଣୁ ବିଜେଡ଼ି ଟିକେଟରୁ ବଞ୍ଚିତ ଆଶାୟୀଙ୍କୁ ଧରି ଯାହା ହେବା କଥା ହେବ । ସେଇ ଭରସାରେ ଆମେ ରହିଛୁ ବୋଲି ସେ କହିଛନ୍ତି ।
