ନବୀନ ମାରିନେଲେ, ବିଜେପି ଜଳକା !

ଭୁବନେଶ୍ୱର: ପରୋକ୍ଷରେ ହେଲେ ବି ଓଡ଼ିଶାର ଦାରିଦ୍ରତାକୁ ବିଜୁ ଜନତା ଦଳ ଭୋଟ ଭିକ୍ଷାର ବଡ଼ ଅସ୍ତ୍ର କରିଆସିଛି । କେନ୍ଦ୍ରର ଅବହେଳା ଯୋଗୁଁ ରାଜ୍ୟ ପଛରେ ପଡ଼ିଛି ବୋଲି ଦଳ ଫଟୋଉଛି । ସ୍ୱତନ୍ତ୍ର ରାଜ୍ୟ ପାହ୍ୟା ଦାବି ଧରି ଦିଲ୍ଲୀରୁ ପଲ୍ଲୀ ଯାଏଁ କମ୍ପୋଉଛି । ଠିକ୍ ସେତିକିବେଳେ, ରାଜ୍ୟ ସରକାର ଦିଲ୍ଲୀରେ ଓଡ଼ିଶାର ଆର୍ଥିକ ଓ ସାମାଜିକ ପ୍ରଗତିର ଚିତ୍ର ରଖିଛନ୍ତି । ଓଡ଼ିଶାକୁ ଦେଶରେ ବିକାଶ ଓ ଅର୍ଥନୈତିକ ଅଭିବୃଦ୍ଧିର ଉଦାହରଣ ବୋଲି ଦର୍ଶାଇଛନ୍ତି । ଓଡ଼ିଶା ଏକ ଆର୍ଥିକ ବଳକା ରାଜ୍ୟ ହେବା ସହ ପୁଞ୍ଜିନିବେଶକାରୀଙ୍କୁ ଆକର୍ଷିତ କରିବାରେ ସଫଳ ହୋଇପାରିଛି । ସରକାରଙ୍କ ବିଭିନ୍ନ କାର୍ଯ୍ୟକ୍ରମ ଯୋଗୁଁ ୮୦ ଲକ୍ଷ ଲୋକ ଆଜି ଦାରିଦ୍ର୍ୟ ସୀମାରେଖା ଉପରକୁ ଉଠିଛନ୍ତି । କୃଷିକ୍ଷେତ୍ରରେ ଉନ୍ନତି ଯୋଗୁଁ ଚାଷୀଙ୍କ ରୋଜଗାର ଦୁଇଗୁଣା ହୋଇଛି । ଶିଶୁ ମୃତ୍ୟୁହାର, ସାମାଜିକ ନିରାପତ୍ତା, ଯୁବ ଓ ମହିଳା ସଶକ୍ତିକରଣ ଇତ୍ୟାଦି ଇତ୍ୟାଦିରେ ଓଡ଼ିଶାର ପ୍ରଗତିକୁ ସରକାର ବଖାଣିଛନ୍ତି । ରାଜ୍ୟ ସରକାର ଖାଲି ଏହା ବଖାଣିନାହାନ୍ତି ବରଂ ଏହି ମାପକାଠିରେ ଆଉଟଲୁକ୍ ପତ୍ରିକା ସର୍ଭେରେ ନବୀନ ‘ଶ୍ରେଷ୍ଠ ପ୍ରଶାସକ’ ଉପାଧି ପାଇଛନ୍ତି ।

ବିରୋଧୀ ଦଳ ଏହାକୁ ପ୍ରାୟୋଜିତ ବୋଲି ଯେତେ ପାଟି କଲେ ମଧ୍ୟ ବିଜେଡ଼ି ପାଇଁ ଫରକ୍ ନାହିଁ । ଲୋକଙ୍କୁ ଭକୁଆ ବନେଇବାର କୌଶଳ ଜାଣିଥିବା ଏହି ଦଳ ଆଉଟଲୁକ୍ ପତ୍ରିକା ସାର୍ଟିଫିକେଟକୁ ଭୋଟଭିକ୍ଷାର ଆଉ ଏକ ଅସ୍ତ୍ର କରିଛି । ଓଡ଼ିଶା ପ୍ରଗତିର ଜଟିଳ ଗଣିତରେ ମଳିମୁଣ୍ଡିଆଙ୍କ ମୁଣ୍ଡ ପଶିବନି ବୋଲି ବିଜେଡ଼ି ନିଶ୍ଚିତ ରହିଛି । ରାଜ୍ୟରେ କ୍ଷମତା ଦଖଲ ପାଇଁ ଅମିତ୍ ଶାହା ଓ ଧର୍ମେନ୍ଦ୍ର ପ୍ରଧାନ ଯେତେ କୁସ୍ତି କଲେ ମଧ୍ୟ ତାହାକୁ ଫସର ଫଟାଇ ଉଦ୍ୟମ ଚାଲିଛି । ବିଜେପିର ମାଷ୍ଟର ପ୍ରଚାରକୁ ନବୀନଙ୍କ ମାଷ୍ଟରଷ୍ଟ୍ରୋକ୍ ବଢ଼ିଆ କାମରେ ଲାଗିଛି ।

ସେପଟେ ଧର୍ମେନ୍ଦ୍ରଙ୍କ ଯୋଗୁଁ ଆଇଓସିଏଲ୍ ବିବାଦର ସମାଧାନ ହୋଇଥିବା ବିଜେପି ପ୍ରଚାର ଆରମ୍ଭ କରିଥିଲେ ମଧ୍ୟ ନବୀନ ଚୁପଚାପ ଏହାର ଫାଇଦା ହାସଲ କରିନେଇଛନ୍ତି । ଧର୍ମେନ୍ଦ୍ରଙ୍କ ସହ ଅଧଘଣ୍ଟା ଆଲୋଚନା କରି ସମାଧାନର ଫର୍ମୂଲା ବାହାର କରିଥିବା ନବୀନ ସେଥିରେ ପୁଣି ଏକ ମାଷ୍ଟରଷ୍ଟ୍ରୋକ୍ ଖେଳିଛନ୍ତି । ଚଳିତ ଆର୍ଥିକ ବର୍ଷଠାରୁୁ ପାରାଦ୍ୱୀପ ରିଫାଇନାରିକୁ ୧୫ ବର୍ଷ ପର୍ଯ୍ୟନ୍ତ ରାଜ୍ୟ ସରକାର ବର୍ଷକୁ ୭୦୦ କୋଟି ସୁଧମୁକ୍ତ ଋଣ ଦେବା ପାଇଁ ରାଜି ହେବା ପରେ ବିବାଦ ସମାଧାନ ହୋଇଛି । ତେବେ ଏହି ସର୍ତ୍ତରେ ନଗଦ ରାଜ୍ୟ ସରକାରଙ୍କୁ ୨୭୪୫ କୋଟି ନଗଦ ରାଜସ୍ୱ ମିଳିଯିବ । ଏହି ଟଙ୍କା ମିଳିଗଲେ ସରକାର କେମିତି ଖେଳ କରିବେ ତାହାର ବ୍ଲୁ ପ୍ରିଣ୍ଟ ବନାଇଛନ୍ତି । ଆଇଓସିଏଲ୍ ସହ ଚୁକ୍ତି ଜରିଆରେ ନବୀନ ଧର୍ମେନ୍ଦ୍ରଙ୍କୁ ବୋକା ବନେଇପାରିଛନ୍ତି ବୋଲି ରାଜନୈତିକ ମହଲରେ ଆଲୋଚନା ହେଉଛି ।

ସେପଟେ ଡିସେମ୍ବର ୩୧ ସୁଦ୍ଧା ଖଣି ମାଲିକଙ୍କଠାରୁ ପାଖାପାଖି ୨୦ ହଜାର କୋଟି ଟଙ୍କା ଜରିମାନା ଅର୍ଥ ରାଜ୍ୟ ସରକାରଙ୍କ ତହବିଲକୁ ଆସିବ । ଏହି ହିସାବରେ ସାଧାରଣ ନିର୍ବାଚନ ପୂର୍ବରୁ ରାଜ୍ୟ ସରକାରଙ୍କ ଭଣ୍ଡାରରେ ହଜାର ହଜାର କୋଟି ପଶିବ । ଏହି ଅଙ୍କକୁ ଧରି ନବୀନ ତାଙ୍କର ନିର୍ବାଚନ ଷ୍ଟ୍ରାଟେଜି ତୟାର୍ କରୁଛନ୍ତି । ଯାହା ଜଣାପଡ଼ିଛି, ସବୁ ବର୍ଗକୁ ଖୁସି କରେଇବାକୁ ନବୀନ ଯୋଜନା ପ୍ରସ୍ତୁତ କରିଦେଇଛନ୍ତି । ବ୍ଲକ୍ ଗ୍ରାଣ୍ଟ ଉଚ୍ଛେଦ ଦାବିରେ ଆନ୍ଦୋଳନରତ ସ୍କୁଲ ଓ କଲେଜ ଶିକ୍ଷକମାନଙ୍କୁ ଖୁସି କରି ନବୀନ ତାଙ୍କର ନିର୍ବାଚନୀ ମାଷ୍ଟରଷ୍ଟ୍ରୋକ୍ ଖେଳିବେ । ତେଲ ପଇସାରେ ଉବୁଟୁବୁ ଧର୍ମେନ୍ଦ୍ର ପରିଚାଳିତ ବିଜେପି ଏହାକୁ କିଭଳି ମୁକାବିଲା କରିବ ତାହା ଏବେ ଦେଖିବାର କଥା ।