ନାଣ୍ଡୁ ବିଜେଡ଼ି ନା ବିଜେପିର ?

ଭୁୁବନେଶ୍ୱର: ଧର୍ମଶାଳା ବ୍ଲକ୍ ହରିଦାସପୁର ପଞ୍ଚାୟତର ଭିଏଲଡବ୍ଲୁ ସ୍ମିତାରାଣୀ ବିଶ୍ୱାଳଙ୍କ ମୃତ୍ୟୁ ଅଭିଯୁକ୍ତ ଭାବେ ପୁଲିସ ଦ୍ୱାରା ଗିରଫ ନାଣ୍ଡୁ ଓରଫ ରୂପେଶ ଭଦ୍ରର ରାଜନୈତିକ ଲିଙ୍କ୍ ନେଇ ଏବେ ଜୋରଦାର ଚର୍ଚ୍ଚା । ସ୍ମିତାରାଣୀଙ୍କୁ ଗଣଦୁଷ୍କର୍ମ ପରେ ହତ୍ୟା କରାଯାଇଛି ବୋଲି ବିଜେପି ସାମ୍ବାଦିକ ସମ୍ମିଳନୀରେ ଅଭିଯୋଗ କରି ମାମଲାରେ ଶାସକ ଦଳର ନେତାଙ୍କୁ ଯୋଡିବାକୁ ଉଦ୍ୟମ କରିଛି ।

ଆଜି ଭୁବନେଶ୍ୱରରେ ଏକ ସାମ୍ବାଦିକ ସମ୍ମିଳନୀରେ ବିଜେପି ନେତ୍ରୀ ଲେଖାଶ୍ରୀ ସାମନ୍ତସିଂହାର ମନ୍ତ୍ରୀ ଅରୁଣ ସାହୁ ଏବଂ ସ୍ଥାନୀୟ ବିଧାୟକ ପ୍ରଣବ ବଳବନ୍ତରାୟଙ୍କ ସହ ରୂପେଶର ଏକ ଫଟୋକୁ ଦେଖାଇଥିଲେ । ରୂପେଶ ସହ ଶାସକଦଳର ଏହି ପ୍ରଭାବଶାଳୀ ନେତାଙ୍କ ନିବିଡ଼ ସମ୍ପର୍କ ରହିଥିବା ଦର୍ଶାଇ ଜୋର୍ ବର୍ଷିଥିଲେ ।

ତେବେ ଲେଖାଶ୍ରୀଙ୍କ ଏହି ଫଟୋ ଗଣମାଧ୍ୟମରେ ପ୍ରଚାର ହେବାର କିଛି ସମୟ ପରେ ସୋସିଆଲ୍ ମିଡ଼ିଆରେ ଆଉ ଦୁଇଟି ଫଟୋ ଭାଇରାଲ୍ ହୋଇଛି । ସେଥିରେ କୋଟିପତି ରୂପେଶଙ୍କ ସହ ବିଜେପିର ବରିଷ୍ଠ ନେତା ସଜ୍ଜନ ଶର୍ମାଙ୍କ ନିବିଡ଼ତା ଦେଖିବାକୁ ମିଳିଛି । ଏକ ରେଷ୍ଟେୁରାଣ୍ଟରେ ଏହି ଫଟୋ ଉଠାଯାଇଛି । ଏହି ଫଟୋ ଦୁଇଟି ଦେଖିଲା ପରେ ରୂପେଶ ଯେ କେବଳ ବିଜେଡ଼ି ନେତାଙ୍କ ସହ ସମ୍ପର୍କରେ ଥିଲା ତାହା ଭୁଲ୍ ବୋଲି ପ୍ରମାଣିତ ହୋଇଛି ।

ଏକଥା ଲେଖାଶ୍ରୀ ଜାଣିଥିଲେ କି ନାହିଁ ତାହା ଜଣାନାହିଁ । ତେବେ ତାଙ୍କ ବାଣଟି ତାଙ୍କ ଦଳ ପାଇଁ ବୁମେରାଂ ହୋଇଛି । ସୁତରାଂ ଲେଖାଶ୍ରୀ ଭାଣ୍ଡିଆ ହୋଇଯାଇଛନ୍ତି । ଏହାର ସେ କ’ଣ ଜବାବ ଦେଉଛନ୍ତି ତାହା ଦେଖିବାର କଥା ।