ଭୁବନେଶ୍ୱର: ୭୮ ବର୍ଷ ବୟସରେ ବି କ୍ଷମତାଲୋଭ ଛାଡ଼ି ପାରିଲେନି ଡାକ୍ତର ଦାମୋଦର ରାଉତ । ବିଜେପିର ଘୋର ବିରୋଧୀ ବୋଲି କହି ବୁଲୁଥିଲେ । ବିଜୁବାବୁଙ୍କ ନୀତି ଓ ଆଦର୍ଶରେ ନିଜକୁ ପରିଚିତ କରାଉଥିଲେ । ଜୀବନ ଥିଲା ଯାଏଁ ସେହି ନୀତି, ଆଦର୍ଶରୁ ହଟିବେନି ବୋଲି ହଲପ୍ କରିଥିଲେ । ମାତ୍ର ନିର୍ବାଚନ ବେଳରେ କ୍ଷମତାର ମୋହ ତାଙ୍କର ନୈତିକତାକୁ ଆଖି ମାରିଦେଲାଣି । ଯେଉଁ ଦଳକୁ ନାକ ଟେକୁଥିଲେ ସେହି ଦଳର ଶରଣ ପଶିବାକୁ କାଲି ସକାଳୁ ଦିଲ୍ଲୀ ଧାଇଁଗଲେ । ଦିଲ୍ଲୀରେ ଅମିତ୍ ଶାହାଙ୍କୁ ଭେଟି ନ ପାରି ଧର୍ମେନ୍ଦ୍ର ପ୍ରଧାନଙ୍କଠାରେ ଅଳି କରି ସଂଧ୍ୟାରେ ଫେରି ଆସିଛନ୍ତି । ଖୁବ୍ ଶୀଘ୍ର ତାଙ୍କର ବିଜେପି ଯୋଗଦାନ ଚୂଡ଼ାନ୍ତ ହେବ, ଏଇ ବିଶ୍ୱାସ ଅଛି ତାଙ୍କର ।
ଗଲା ୪ ତାରିଖ ପର୍ଯ୍ୟନ୍ତ ଦାମଙ୍କର ବିଜେପି ସ୍ୱର ଶବଦ୍ ନ ଥିଲା । ବୈଜୟନ୍ତ ପଣ୍ଡା ବିଜେପିରେ ଯୋଗଦେବା ପରେ କାଳେ ମନ ତାଙ୍କର ଉଛନ୍ନ ହୋଇଛି । ବୈଜୟନ୍ତଙ୍କ ଆମନ୍ତ୍ରଣକୁ ଚାହିଁ ବସିଥିଲେ । ସଂଯୋଗକୁ ବୈଜୟନ୍ତ ରାଷ୍ଟ୍ରୀୟ ଉପସଭାପତି ପଦ ପାଇଲା ପରେ ବାଟ ସହଜ ହୋଇଯାଇଛି । କନକ ବର୍ଦ୍ଧନ ସିଂହଦେଓ ଓ ମନମୋହନ ସାମଲ ତାଙ୍କୁ ବିଜେପିକୁ ଆମନ୍ତ୍ରଣ କରିବାର ବାହାନା ଧରି ଆଗକୁ ବଢ଼ିଛନ୍ତି । ନିଜ ଦମ୍ଭରେ ଛିଡ଼ା ହେବାର ସାମର୍ଥ ନ ଥିବା ଅନୁଭବ ପରେ ସମ୍ଭବତଃ ବିଜେପିକୁ ଶେଷ ରାସ୍ତା ବାଛି ନେଇଛନ୍ତି । ମାନ ଇଜ୍ଜତକୁ ଜଗି ବସିଲେ ଆଉ ହବନି । ବୈଜୟନ୍ତଙ୍କ ଭଳି ବିଜେପିକୁ ଗଲେ ଗୋଟେ ଗୁଳିରେ ଦି ଦିଇଟା ଶିକାର କରିପାରିବେ । ନବୀନ ପଟ୍ଟନାୟକଙ୍କ ବିରୋଧରେ ଲଢ଼ି ପ୍ରତିଶୋଧ ନେବେ ଏବଂ ନିଜେ କ୍ଷମତା ଫେରିପାଇବେ । ଅବଶ୍ୟ, ଦାମଙ୍କର ଏହି ଅଭିଳାଷ ପୂରଣ ଯେ ନହେବ ତାହା ଏବେଠୁଁ କହିହେବନି । ୨୨ ବର୍ଷ ଧରି ସେ ବି ବିଜେପି ଆସିବାକୁ ଚାହିଁ ବସିଥିଲେ ବୋଲି ଯେ କହିବେନି, କିଏ କହିପାରିବ!
ସାତ ଥର ବିଧାୟକ, ଚାରି ଚାରି ଥର ମନ୍ତ୍ରୀ ପଦ ଚାଖିଥିବା ଦାମ ଗତବର୍ଷ ସେପ୍ଟେମ୍ବର ୧୨ରେ ବିଜେଡ଼ିରୁ ତଡ଼ା ଖାଇଥିଲେ । ୨୦୧୭ ଡିସେମ୍ବର ୨୨ ପର୍ଯ୍ୟନ୍ତ ତାଙ୍କର ସବୁ ଠିକଠାକ୍ ଥିଲା । ମାତ୍ର ସେଦିନ ତାଙ୍କ ମନ୍ତ୍ରୀପଦ ଚାଲିଗଲା ପରେ ତାଙ୍କୁ ସବୁ ଅବାଗିଆ ଦିଶିଲା । ରାଜ୍ୟ ସରକାର ଦୁର୍ନୀତିରେ ବୁଡ଼ିଥିବା ଅନୁଭବ ହେଲା । ଓଡ଼ିଶାରୁ ନବୀନ ପଟ୍ଟନାୟକ ଶାସନ ବିଲୋପ କରିବା ଟାଣମୁହଁ ଦେଖାଇଲେ । ତେବେ ବିଜେପି ଓ କଂଗ୍ରେସରେ ଯୋଗଦେବାର ପ୍ରଶ୍ନ ଉଠୁନି ବୋଲି ବାରମ୍ବାର କହିଚାଲିଲେ । ବିଜେପି ନାଁ ଶୁଣିଲେ ତାଙ୍କର ନାହି ଡେଉଁଥିଲା । ଗତ ଗାନ୍ଧୀ ଜୟନ୍ତୀ ଦିନ କଂଗ୍ରେସ ଭବନରେ ‘ସମ୍ବିଧାନ ବଞ୍ଚାଓ’ ସମ୍ମିଳନୀରେ ଯୋଗଦେବାକୁ ଯାଇଥିବା ଦାମ ବିଜେପି ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ କୁର୍ଚ୍ଛତ ଗାଳି କରିଥିଲେ । ମୋଦିଙ୍କୁ ସେ ବାଚାଳ ବୋଲି କହିଥିଲା ବେଳେ ବିଜେପି ବାଲାଙ୍କର ଛୁଆ ନାହିଁ ସେମାନେ ପରଛୁଆ ଉପରେ ଆଖି ପକାଉଛନ୍ତି ବୋଲି କଟାକ୍ଷ କରିଥିଲେ । ବର୍ଷ ବର୍ଷ ଧରି ଅମିତ୍ ଶାହା ଓ ଧର୍ମେନ୍ଦ୍ର ପ୍ରଧାନଙ୍କୁ ତ ଯାଛା ତା ଗାଳି କରୁଥିଲେ ।
ବିଜେପିକୁ ପସନ୍ଦ କରୁ ନ ଥିବା ଦାମବାବୁ ବିଜୁପ୍ରେମୀଙ୍କୁ ଏକାଠି କରି ଏକ ଆଞ୍ଚଳିକ ଦଳ ଗଠନ କରିବାକୁ ଉଦ୍ୟମ କରିଥିଲେ । ମାତ୍ର ଫେଲ୍ ମାରିଲେ । ତାଙ୍କ ସାଙ୍ଗରେ ରହିବାକୁ ଅଧିକାଂଶ ନାକ ଟେକିଲେ । ବୈଜୟନ୍ତ ପଣ୍ଡା, ବିଜୟ ମହାପାତ୍ର, ଦିଲ୍ଲୀପ ରାୟ, ପଂଚାନନ କାନୁନଗୋଙ୍କ ଭଳି ନେତା ତାଙ୍କୁ ଧରାଛୁଆଁ ଦେଲେନି । ବ୍ରଜ ତ୍ରିପାଠୀଙ୍କୁ ପାଲେଇ ତାଙ୍କ ସମତା କ୍ରାନ୍ତି ଦଳକୁ ବିଜୁ ସମତା କ୍ରାନ୍ତି ନାଁ ଦେଇ ଦାମ ନୂଆ ଦଳ ଗଠନ ଘୋଷଣା କରିଥିଲେ ମଧ୍ୟ ତାହା ସପ୍ତାହେ ଚାଲିପାରିଲାନି । ପରେ ବ୍ରଜ ତ୍ରିପାଠୀ ଓ ଖାରବେଳ ସ୍ୱାଇଁ ଏକାଠି ହୋଇଥିଲେ ବି ଦାମ ଅଲୋଡ଼ା ହୋଇ ରହିଗଲେ ।
ନିରାଟ ସତ ଯେ ବିଜେଡ଼ିରୁ ଗଲା ପରେ ନିଜର ସ୍ଥିତି କ’ଣ ତାହା ଭଲଭାବେ ଅନୁଭବ କରିଥିଲେ ଦାମ । ତେଣୁ ୪୪ ବର୍ଷ ଧରି ରାଜନୀତି ଓ କ୍ଷମତାର ସ୍ୱାଦ ଜାଣିଥିବା ଦାମଙ୍କୁ ବୟସର ଅପରାହ୍ନ ଏବଂ ତଥାକଥିତ ନିଜର ନୀତି,ଆଦର୍ଶ ଅଟକାଇ ପାରିନି । ଶେଷ ଜୀବନରେ ପଦ୍ମ ଧରି ଭୋଟରଙ୍କଠାରୁ ଭୋଟଭିକ୍ଷା କରିବେ । ନରେନ୍ଦ୍ର ମୋଦି, ଅମିତ୍ ଶାହା ଓ ଧର୍ମେନ୍ଦ୍ର ପ୍ରଧାନଙ୍କ ସ୍ତୁତିଗାନ କରିବେ । ତେବେ ତାଙ୍କର ରାଜନୈତିକ ଗୁରୁ ବିଜୁବାବୁଙ୍କ ନୀତି, ଆଦର୍ଶ ଜପ କରିବେ ନା ନାହିଁ ତାହା ସେଇ ଦାମ ହିଁ କହିପାରିବେ ।