‘ପାଟକୁରା’ ମିଶନ୍ ରେ ୩ ବରିଷ୍ଠ ଅଧିକାରୀ, କୁଟ୍ଟେଙ୍କ ଆକ୍ସନ୍ ଅନ୍ ସ୍ପଟ୍

ଭୁୁବନେଶ୍ୱର: ପାଟକୁରା ନିର୍ବାଚନମଣ୍ଡଳୀକୁ ସ୍ୱତନ୍ତ୍ର ଧ୍ୟାନ ଦେବେ ବୋଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗତ ଉପନିର୍ବାଚନ ବେଳେ ଅଞ୍ଚଳବାସୀଙ୍କୁ ପ୍ରତିଶ୍ରୁତି ଦେଇଥିଲେ । ସେହି ପ୍ରତିଶ୍ରୁତିର କାର୍ଯ୍ୟକାରିତା ଆରମ୍ଭ ହୋଇଯାଇଛି । ମୁଖ୍ୟମନ୍ତ୍ରୀଙ୍କ ଦପ୍ତରର ତିନି ବରିଷ୍ଠ ଅଧିକାରୀଙ୍କ ନେତୃତ୍ୱରେ ୩ଟି ଟିମ୍ ଆଜି ଅଚାନକ ପାଟକୁରା ନିର୍ବାଚନମଣ୍ଡଳୀ ବୁଲି ଅଞ୍ଚଳର ଶିକ୍ଷା, ସ୍ୱାସ୍ଥ୍ୟ, ଗମନାଗମନ, ବିଦ୍ୟୁତ ଯୋଗାଣ ଆଦିର ସ୍ଥିତି ପରଖିଛନ୍ତି । ପାଟକୁରା ସର୍ବାଙ୍ଗୀନ ବିକାଶର ନକ୍ସା ଧରି ଭୁବନେଶ୍ୱର ଫେରିଛନ୍ତି ।

ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ଗଠିତ ତିନୋଟି ପୃଥକ୍ ଟିମ୍ ର ନେତୃତ୍ୱ ନେଇଥିଲେ ସ୍ୱତନ୍ତ୍ର ସଚିବ ଡି.ଏସ୍.କୁଟ୍ଟେ, ଅତିରିକ୍ତ ସଚିବ ରୂପା ରୋଶନ ସାହୁ ଏବଂ ଅତିରିକ୍ତ ସଚିବ ପ୍ରଦୀପ୍ତ ମହାପାତ୍ର । ଏହି ବରିଷ୍ଠ ଅଧିକାରୀମାନଙ୍କ ନେତୃତ୍ୱରେ ପୃଥକ୍ ଟିମ୍ ପ୍ରତି ପଞ୍ଚାୟତର ବିଦ୍ୟାଳୟଗୁଡ଼ିକ ପରିଦର୍ଶନ କରି ଆନୁସଙ୍ଗିକ ବ୍ୟବସ୍ଥା ଅନୁଧ୍ୟାନ କରିଥିଲେ । ପ୍ରତି ପଞ୍ଚାୟତରେ ସରପଞ୍ଚ, ସମିତି ସଭ୍ୟଙ୍କ ସମେତ ସବୁ ନିର୍ବାଚିତ ପ୍ରତିନିଧିମାନଙ୍କୁ ସିଧାସଳଖ ଭେଟି ଆଲୋଚନା କରିଥିଲେ । ସେମାନଙ୍କ ଅଞ୍ଚଳରେ କାର୍ଯ୍ୟକାରୀ ହେଉଥିବା ଶିକ୍ଷା, ସ୍ୱାସ୍ଥ୍ୟସେବା, ପାନୀୟ ଜଳ, ସଡ଼କ ଯୋଗାଯୋଗ ଓ ବିଦୁ୍ୟତସେବା ସଂକ୍ରାନ୍ତରେ ପୁଙ୍ଖାନୁପୁଙ୍ଖ ଆଲୋଚନା କରିଥିଲେ । ବରିଷ୍ଠ ଅଧିକାରୀମାନେ ବିଭିନ୍ନ ସ୍କୁଲରେ ପିଲାଙ୍କ ସହ ବସି ମଧ୍ୟାହ୍ନ ଭୋଜନ କରିଥିଲେ ।

ଲୋକପ୍ରତିନିଧିମାନଙ୍କ ସହ ଆଲୋଚନା କାଳରେ ସେମାନଙ୍କ ଦୃଷ୍ଟିକୁ ଆସିଥିବା କିଛି ଛୋଟ ଛୋଟ ସମସ୍ୟାର ତ୍ୱରିତ ସମାଧାନ କରାଯାଇଥିଲା । କେନ୍ଦ୍ରାପଡ଼ା ଜିଲ୍ଲାପାଳଙ୍କ ସହ ସ୍ୱତନ୍ତ୍ର ସଚିବ ଶ୍ରୀ କୁଟ୍ଟେ ସାନ ଅଢ଼ଙ୍ଗ ଗ୍ରାମ ପଞ୍ଚାୟତ ଯାଇଥିବା ବେଳେ ସ୍ଥାନୀୟ ଲୋକମାନେ ଏକ ସଙ୍ଗୀନ ଅଭିଯୋଗ ଆଣିଥିଲେ । ଅନ୍ୟ ଜାଗାରେ ଲାଇସେନ୍ସ ପାଇଥିବା ଏକ ମଦ ଦୋକାନ ଏଠି ଏକ ବିଦ୍ୟାଳୟ ନିକଟରେ ଚାଲୁଥିବା ସେମାନେ ଅଭିଯୋଗ କରିଥିଲେ । ଲୋକଙ୍କ ଅଭିଯୋଗକୁ ଶ୍ରୀ କୁଟ୍ଟେ ଗୁରୁତର ସହ ଗ୍ରହଣ କରି ତୁରନ୍ତ ଏହି ମଦ ଦୋକାନକୁ ସିଲ୍ କରିଥିଲେ ।

ଗୋଟିଏ ପଟେ ୫-ଟି ସଚିବ ଭି.କେ.ପାଣ୍ଡିଆନ୍ ଆଜି ଦିନ ତମାମ ମୁଖ୍ୟମନ୍ତ୍ରୀଙ୍କ ନିର୍ବାଚନମଣ୍ଡଳୀ ହିଞ୍ଜିଳିକାଟୁ ବୁଲି ସେଠା ବିକାଶର ନକ୍ସା ଆଙ୍କିଥିବା ବେଳେ ଏପଟେ ମୁଖ୍ୟମନ୍ତ୍ରୀଙ୍କ ଦପ୍ତରର ସ୍ୱତନ୍ତ୍ର ସଚିବ ଶ୍ରୀ କୁଟ୍ଟେଙ୍କ ସମେତ ତିନି ବରିଷ୍ଠ ଅଧିକାରୀ ମୁଖ୍ୟମନ୍ତ୍ରୀଙ୍କ ପାଟକୁରା ପ୍ରତିଶ୍ରୁତିକୁ ଅକ୍ଷରେ ଅକ୍ଷରେ ପାଳିବା ପାଇଁ ଆକ୍ସନ୍ ମୋଡ୍ ରେ କାର୍ଯ୍ୟ କରିବା ସବୁଆଡ଼େ ଚର୍ଚ୍ଚାର ବିଷୟ ହୋଇଛି ।