ପୁଣି ଚକିତ କଲେ ନବୀନ

ଭୁବନେଶ୍ୱର: ରାଜ୍ୟସଭା ପାଇଁ ସବୁ କଳ୍ପନାଜଳ୍ପନା ଓ ଆକଳନକୁ ଭୁଲ୍ ପ୍ରମାଣିତ କରିଛନ୍ତି ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକ । ୪ଟି ଯାକ ଆସନ ପାଇଁ ବିଜେଡ଼ିର ପ୍ରାର୍ଥୀ ଘୋଷଣା କରିଥିବା ବେଳେ ଚର୍ଚ୍ଚାରେ ନ ଥିବା ନେତାଙ୍କୁ ପ୍ରାର୍ଥୀ କରି ସମସ୍ତଙ୍କୁ ଚକିତ କରିଛନ୍ତି । ସୁବାସ ସିଂ, ମୁନ୍ନା ଖାଁ, ସୁଜିତ୍ କୁମାର ଏବଂ ଶ୍ରୀମତୀ ମମତା ମହନ୍ତଙ୍କୁ ରାଜ୍ୟସଭା ପ୍ରାର୍ଥୀ ଭାବେ ଘୋଷଣା କରାଯାଇଛି । ସୁଜିତ୍ କୁମାରଙ୍କ ଛଡ଼ା ଅନ୍ୟମାନଙ୍କ ନାଁ ଏଥର ରାଜ୍ୟସଭା ଆସନ ପାଇଁ ଆଦୌ ଚର୍ଚ୍ଚାରେ ନ ଥିଲା । ରାଜ୍ୟ ରାଜନୀତିରେ ଅପରିଚିତ ଥିବା ଶ୍ରୀମତୀ ମମତା ମହନ୍ତଙ୍କୁ ରାଜ୍ୟସଭା ପ୍ରାର୍ଥୀ କରି ବଡ଼ ସରପ୍ରାଇଜ୍ ଦେଇଛନ୍ତି ନବୀନ । ସରୋଜିନୀ ହେମ୍ବ୍ରମ୍ ଙ୍କ ଜାଗାରେ ତାଙ୍କୁ ପ୍ରାର୍ଥୀ କରାଯାଇଛି ।

ନିର୍ମାଣ ଶ୍ରମିକ କଲ୍ୟାଣ ବୋର୍ଡ ଅଧ୍ୟକ୍ଷ ପଦରେ ସୁବାସ ସିଂ କାର୍ଯ୍ୟ କରୁଥିଲେ । ରାଜ୍ୟସଭା ଆସନରୁ ତାଙ୍କୁ ପ୍ରାର୍ଥୀ କରିବା ସହ ତାଙ୍କ ଜାଗାରେ ବରିଷ୍ଠ ନେତା ତଥା ବ୍ରହ୍ମପୁରର ପୂର୍ବତନ ବିଧାୟକ ରମେଶ ଚନ୍ଦ୍ର ଚ୍ୟାଉପଟ୍ଟନାୟକଙ୍କୁ ନିର୍ମାଣ ଶ୍ରମିକ କଲ୍ୟାଣ ବୋର୍ଡ ଅଧ୍ୟକ୍ଷ ଭାବେ ନିଯୁକ୍ତି ଦିଆଯାଇଛି । ସେ କ୍ୟାବିନେଟ୍ ପଦବୀରେ କାର୍ଯ୍ୟ କରିବେ ।

ଦୀର୍ଘ ବର୍ଷ ଧରି ଦଳ ପାଇଁ କାର୍ଯ୍ୟ କରୁଥିବା ମୁନ୍ନା ଖାଁଙ୍କ ନାଁ ସବୁଥର ରାଜ୍ୟସଭା ପାଇଁ ଚର୍ଚ୍ଚା ହେଉଥିଲେ ମଧ୍ୟ ଏଥର କିନ୍ତୁ ଚର୍ଚ୍ଚାରେ ନ ଥିଲେ । ତେବେ ବିଳମ୍ବରେ ହେଲେ ମଧ୍ୟ ତାଙ୍କୁ ଆନୁଗତ୍ୟ, ଧୈର୍ଯ୍ୟ ଓ ପରିଶ୍ରମର ଫଳ ଦେଇଛନ୍ତି ନବୀନ । ଏଥିସହ ରାଜ୍ୟସଭାରେ ଓଡ଼ିଶାରୁ ସଂଖ୍ୟାଲଘୁ ପ୍ରତିନିଧିତ୍ୱ ଦେଇଛନ୍ତି । ରାଜ୍ୟ ସରକାରଙ୍କ ସଂଖ୍ୟାଲଘୁ ବ୍ୟାପାରର ଉପଦେଷ୍ଟା ଭାବେ ମୁନ୍ନା ଖାଁ ବର୍ତ୍ତମାନ କାର୍ଯ୍ୟ କରୁଛନ୍ତି ।

ତୃତୀୟ ପ୍ରାର୍ଥୀ ସୁଜିତ୍ କୁମାରଙ୍କ ନାଁ କିନ୍ତୁ ବହୁ ଆଗରୁ ଚର୍ଚ୍ଚାରେ ଥିଲା । ଅକ୍ସଫୋର୍ଡ ବିଶ୍ୱବିଦ୍ୟାଳୟରୁ ଏମବିଏ ଏବଂ ହାର୍ଭଡ୍ ବିଶ୍ୱବିଦ୍ୟାଳୟରୁ ପବ୍ଲିକ୍ ଆଡମିନିଷ୍ଟ୍ରେସନ୍ ଡିଗ୍ରୀଧାରୀ ସୁଜିତ୍ କୁମାର ଅଭିବକ୍ତ କଳାହାଣ୍ଡି ଜିଲ୍ଲାରେ ବିଜେଡ଼ି ସଂଗଠନ ପାଇଁ କାର୍ଯ୍ୟ କରୁଥିଲେ । ସ୍ପେଶାଲ୍ ଡେଭେଲପମେଣ୍ଟ କାଉନସିଲ୍ ର ଉପଦେଷ୍ଟା ଭାବେ ସରକାର ତାଙ୍କୁ ନିଯୁକ୍ତି ଦେଇଥିଲେ ।

ନବୀନଙ୍କର ସବୁଠାରୁ ବଡ଼ ସରପ୍ରାଇଜ୍ ହେଉଛନ୍ତି ଶ୍ରୀମତୀ ମମତା ମହାନ୍ତ । ମୟୁରଭଞ୍ଜ ଜିଲ୍ଲା ବିଜେଡ଼ି ମହିଳା ସଂଗଠନର ଜଣେ ସାଧାରଣ କର୍ମୀ ସେ । ମହିଳା ସ୍ୱଂୟ ସହାୟିକା ଗୋଷ୍ଠୀ ସହ ଜଡ଼ିତ । ଗତ ଲୋକସଭା ନିର୍ବାଚନରେ ଆସ୍କାରୁ ପ୍ରମିଳା ବିଶୋୟୀଙ୍କୁ ପ୍ରାର୍ଥୀ କଲା ଭଳି ନବୀନ ମମତାଙ୍କୁ ରାଜ୍ୟସଭା ପ୍ରାର୍ଥୀ କରି ସମସ୍ତଙ୍କୁ ଚକିତ କରିଛନ୍ତି । ସରୋଜିନୀ ହେମ୍ବ୍ରମ୍ ଙ୍କ ଜାଗାରେ ତାଙ୍କୁ ପ୍ରାର୍ଥୀ କରି ନବୀନ ଜିଲ୍ଲା ଓ ମହିଳା ସମୀକରଣକୁ ଅତୁଟ ରଖିଛନ୍ତି ।

ବିଧାନସଭାରେ ବିଜେଡ଼ିର ୧୧୩ ଜଣ ବିଧାୟକ, ବିଜେପିର ୨୩, କଂଗ୍ରେସର ୯, ଜଣେ ସ୍ୱାଧୀନ ବିଧାୟକ ଏବଂ ଜଣେ ବାମଦଳ ବିଧାୟକ ଅଛନ୍ତି । ଗୋଟିଏ ଆସନ ଜିତିବା ଲାଗି ଜଣେ ପ୍ରାର୍ଥୀଙ୍କୁ ୩୦ ଜଣ ବିଧାୟକଙ୍କ ସମର୍ଥନ ଦରକାର । ଏହି ଦୃଷ୍ଟିରୁ ବିଜେଡ଼ି ୩ଟି ଆସନରେ ଅନାୟାସରେ ଜିତୁଥିବା ବେଳେ ଚତୁର୍ଥ ଆସନ ଲାଗି ୭ ଜଣ ସଦସ୍ୟଙ୍କ ସମର୍ଥନ ନିଅଣ୍ଟ ପଡୁଛି ।

ସୁଚନାଥାଉକି, ବିଜେଡ଼ି-ବିଜେପି ପରିବର୍ତ୍ତିତ ସମୀକରଣରେ ଗତଥର ବିଜେପିକୁ ଗୋଟିଏ ରାଜ୍ୟସଭା ଆସନ ଛାଡ଼ି ଦେଇଥିଲା । ନିଜର ସୁନିଶ୍ଚିତ ବିଜୟ ଆସନରେ ପ୍ରାର୍ଥୀ ନ ଦେଇ ବିଜେପି ପ୍ରାର୍ଥୀ ଅଶ୍ୱିନୀ ବୈଷ୍ଣବଙ୍କୁ ସମର୍ଥନ ଦେଇଥିଲା ।

ନିକଟରେ ଅମିତ୍ ଶାହା ନବୀନ ନିବାସ ଆସି ନବୀନଙ୍କ ସହ ମଧ୍ୟାହ୍ନଭୋଜନ କରିବା ରାଜ୍ୟସଭା ନିର୍ବାଚନ ବାତାବରଣକୁ ଉଷ୍ଣତା ଯୋଗାଇଥିଲା । ଚତୁର୍ଥ ଆସନଟି ବିଜେପି ହାତକୁ ନବୀନ ଛାଡ଼ିଦେବେ ବୋଲି ଚର୍ଚ୍ଚା ହେଉଥିଲା । ଏପରିକି ବିଜେପିକୁ ଦୁଇଟି ଆସନ ଛଡ଼ା ଯାଇପାରେ ବୋଲି ବିଶ୍ୱାସ କରାଯାଉଥିଲା । ଉଭୟ ବିଜେଡ଼ି ଓ ବିଜେପିର ତୁଙ୍ଗ ନେତାମାନଙ୍କ ମଧ୍ୟରେ ଏହାକୁ ନେଇ ଗୁଞ୍ଜରଣ ସୃଷ୍ଟି ହୋଇଥିଲା । ଶୀର୍ଷସ୍ତରରେ ସତରେ କ’ଣ ବିଚାର ଆଲୋଚନା ହୋଇଛି ନା ନାହିଁ ତାହାର କେହି ଟେର୍ ପାଉ ନ ଥିଲେ । ତେଣୁ ନବୀନଙ୍କ ଘୋଷଣାକୁ ସମସ୍ତେ ଉତ୍କଣ୍ଠାର ସହ ଚାହିଁ ବସିଥିଲେ । ଚତୁର୍ଥ ଆସନ ପାଇଁ ବିଜେଡ଼ି ପ୍ରାର୍ଥୀ ଘୋଷଣା କରିସାରିଥିବାରୁ ବିଜେପିର ପଦକ୍ଷେପକୁ ଏବେ ସମସ୍ତଙ୍କ ନଜର ଚାଲିଯାଇଛି । ବିଜେପି ଏହି ଆସନ ଲାଗି ପ୍ରାର୍ଥୀ ଦେଇ ବିଜେଡ଼ି ସହ ପ୍ରତିଦ୍ୱନ୍ଦିତାକୁ ଓହ୍ଲାଇବ ନା ନାହିଁ ତାହା ସ୍ପଷ୍ଟ ଜଣାପଡ଼ିନାହିଁ ।

ତେବେ ସେ ଯାହା ହେଉ, ଏଥର ରାଜ୍ୟସଭା ପାଇଁ ବିଜେଡ଼ିର ଅନେକ ଷ୍ଟଲୱର୍ଟ ଆଶା ବାନ୍ଧିଥିଲେ ମଧ୍ୟ ସେମାନଙ୍କୁ ନିରାଶ ହେବାକୁ ପଡ଼ିଛି । ମହେଶ୍ୱର ମହାନ୍ତି, ପୁଷ୍ପେନ୍ଦ୍ର ସିଂହଦେଓ, ରବି ଜେନା, କଳିକେଶ ସିଂହଦେଓ, ଅରୂପ ପଟ୍ଟନାୟକ, ନଳିନୀ ପ୍ରଧାନଙ୍କ ଭଳି ଗତ ନିର୍ବାଚନରେ ପରାଜିତ ନେତାଙ୍କ ମଧ୍ୟରୁ ପ୍ରାର୍ଥୀ ହୋଇପାରନ୍ତି ବୋଲି ଚର୍ଚ୍ଚା ହୋଇଥିଲା । ସେହିଭଳି ଗତ ନିର୍ବାଚନରେ ଟିକେଟରୁ ବଞ୍ଚିତ ପ୍ରସନ୍ନ ପାଟ୍ଟଶାଣୀ, ରମେଶ ଚନ୍ଦ୍ର ଚ୍ୟାଉପଟ୍ଟନାୟକ, ଅନଙ୍ଗ ଉଦୟ ସିଂହଦେଓ, ପ୍ରଫୁଲ୍ଲ ଘଡ଼ାଇଙ୍କ ଭଳି ବରିଷ୍ଠ ନେତାଙ୍କ ନାଁ ମଧ୍ୟ ଚର୍ଚ୍ଚାରେ ଥିଲା । ତେବେ ନବୀନ ଏମାନଙ୍କ ନାଁ ବିଚାରକୁ ନେଇନାହାନ୍ତି ।