ଭୁବନେଶ୍ୱର: ଭୁବନେଶ୍ୱର: ସ୍ୱର୍ଗତ ବିଜୁ ପଟ୍ଟନାୟକଙ୍କର ଏକଦା ଡାହାଣ ହାତ ଭାବେ ପରିଚିତ ପୂର୍ବତନ ମନ୍ତ୍ରୀ ସହରାଇ ଓରାମ୍ ଙ୍କର ଆଜି ପରଲୋକ ହୋଇଯାଇଛି । କେନ୍ଦୁଝର ଜିଲ୍ଲା ବଡ଼ବିଲ ଭଦ୍ରାସାହିସ୍ଥିତ ବାସଭବନରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି । ୯୦ ବର୍ଷ ବୟସ୍କ ଶ୍ରୀ ଓରାମ୍ ୧୦ ବର୍ଷ ତଳୁ ପକ୍ଷାଘାତ ରୋଗରେ ପୀଡ଼ିତ ହୋଇ ଶଯ୍ୟାଶାୟୀ ଥିଲେ । ବିଡ଼ମ୍ବନା ଯେ ଏକଦା କେନ୍ଦୁଝର ରାଜନୀତିରେ ଅତ୍ୟନ୍ତ କ୍ଷମତାଶାଳୀ ତଥା ବିଜୁ ବାବୁଙ୍କର ଏହି ଘନିଷ୍ଠ ସହଯୋଗୀଙ୍କ ଚିକିତ୍ସାରେ ବାଧକ ଥିଲା ପରିବାରର ଆର୍ଥିକ ଅନାଟନ । ଆଜି ବିଜୁବାବୁଙ୍କର ତିରୋଧାନ ଦିବସରେ ତାଙ୍କର ଏହି ପ୍ରିୟ ସହଯୋଗୀଙ୍କ ମୃତ୍ୟୁ ଏକ ସଂଯୋଗ ମାତ୍ର ।
ସ୍ୱର୍ଗତ ଓରାମ୍ ଚମ୍ପୁଆ ବିଧାନସଭା ଆସନରୁ ୫ ଥର ନିର୍ବାଚିତ ହୋଇଥିଲେ । ୧୯୭୧ ମସିହାରେ ଉକ୍ରଳ କଂଗ୍ରେସ ପ୍ରାର୍ଥୀ ଭାବେ ପ୍ରଥମ ଥର ବିଧାନସଭାକୁ ଆସିଥିଲେ । ୧୯୭୭,୧୯୮୦ ଏବଂ ୧୯୯୦ ମସିହାରେ ଜନତା ଦଳ ଟିକେଟରେ ବିଧାୟକ ହୋଇଥିଲେ । ୨୦୦୦ ମସିହାରେ ସ୍ୱାଧୀନ ପ୍ରାର୍ଥୀ ଭାବେ ଲଢ଼ି ଜିତିଥିଲେ । ୧୯୯୦ ମସିହାରେ ବିଜୁବାବୁଙ୍କ ଜନତା ଦଳ ସରକାରରେ ସେ ମନ୍ତ୍ରୀ ଥିଲେ ।
ଶ୍ରୀ ଓରାମ୍ ଙ୍କ ମୃତ୍ୟୁରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଗଭୀର ଶୋକ ପ୍ରକାଶ କରିଛନ୍ତି । ସ୍ୱର୍ଗତ ଓରାମ୍ ବିଜୁବାବୁଙ୍କର ଦୀର୍ଘଦିନର ସହଯୋଗୀ ଥିଲେ । ରାଜ୍ୟର ଆଦିବାସୀ ବର୍ଗଙ୍କ କଲ୍ୟାଣ ପାଇଁ ତାଙ୍କର ଯଥେଷ୍ଟ ଅବଦାନ ଥିଲା ବୋଲି ମୁଖ୍ୟମନ୍ତ୍ରୀ ତାଙ୍କ ଶୋକବାର୍ତ୍ତାରେ ଲେଖି ଶୋକସନ୍ତପ୍ତ ପରବାରବର୍ଗଙ୍କୁ ଗଭୀର ସମବେଦନା ଜଣାଇଛନ୍ତି ।
