ବନ୍ଧାପଡ଼ିଲା ସୌମ୍ୟଙ୍କ ସ୍ୱାଭିମାନ

ଭୁବନେଶ୍ୱର: ବିଜେଡ଼ି ରଙ୍ଗରେ ନିଜକୁ ରଙ୍ଗେଇ ସୌମ୍ୟ ନବୀନ ନିବାସ ଗଲେ । ଚାଷୀ ସମସ୍ୟା, ଚିଟଫଣ୍ଡ କ୍ଷତିଗ୍ରସ୍ତଙ୍କ ସମସ୍ୟା, ଭାଷା ଆନ୍ଦୋଳନ ଓ ନିଶା ନିବାରଣ ସମ୍ପର୍କରେ କୁଆଡେ ମୁଖ୍ୟମନ୍ତ୍ରୀଙ୍କ ସହ ଆଲୋଚନା କଲେ । ତାଙ୍କ ସହ ଟିଙ୍କ ହୋଇ ଚାଷୀ ଓ ଚିଟଫଣ୍ଡ ଆନ୍ଦୋଳନର ନେତୃତ୍ୱ ନେଉଥିବା ଅକ୍ଷୟ, ଶେଷଦେବ ନନ୍ଦ, ସୁଭାଷ ପଟ୍ଟନାୟକ କି ରବି ଦାସ କିନ୍ତୁ ସାଙ୍ଗରେ ନ ଥିଲେ । ଏକା ଏକା ନବୀନ ନିବାସ ଯାଇ ନବୀନଙ୍କୁ ଭେଟିବା ଏବଂ ବାହାରକୁ ଆସି ରାଜ୍ୟ ସ୍ୱାର୍ଥ ପ୍ରସଙ୍ଗ ଆଲୋଚନାର ବାହାନା ନେବା ଆଦୌ ବିଶ୍ୱାସଯୋଗ୍ୟ ନୁହେଁ । ବରଂ ଇଷ୍ଟର୍ଣ୍ଣ ଡ୍ରାମା ଭଳିଆ କଥାଟି ଲାଗୁଛି । ତେବେ ନିଜର ରାଜନୈତିକ ଭବିଷ୍ୟତ ପାଇଁ ଶାସକ ଦଳର ଜଣେ ଚିଟଫଣ୍ଡ କଳଙ୍କିତ ସାଂସଦଙ୍କ ମଧ୍ୟସ୍ଥତାରେ ସୌମ୍ୟ ନବୀନ ନିବାସକୁ ଯିବା ଖବର “ମିଡ଼-ଡ଼େ ଓଡ଼ିଶା” ଲେଖିବା ପରେ ରାଜ୍ୟ ରାଜନୀତିରେ ହଇଚଇ ସୃଷ୍ଟି ହୋଇଛି ।

ନିଜର ବ୍ୟକ୍ତିଗତ ଅଭିସନ୍ଧି ଧରାପଡ଼ିଯିବା ପରେ ସୌମ୍ୟ ଫାଙ୍କିବାକୁ ଉଦ୍ୟମ ଆରମ୍ଭ କରିଛନ୍ତି । ଆଜି କହିଛନ୍ତି ଯେ ସେ ଶାଗ ମାଛ ଦରରେ ବିକ୍ରୀ ହେବା ଲୋକ ନୁହଁନ୍ତି କି ସହଜରେ ବିକ୍ରୀ ହୋଇପାରିବେ ନାହିଁ । ରାଜନୈତିକ ପର୍ଯ୍ୟବେକ୍ଷକଙ୍କ ମତରେ ସୌମ୍ୟ ବିଲକୁଲ୍ ଭୁଲ୍ କହିନାହାନ୍ତି । ତାଙ୍କ ଭଳି ଦାମୀ ମଣିଷକୁ ଶାଗ ମାଛ ଦରରେ କାହିଁକି ବା କିଏ ନବ ? ଯାହା ହବ ଚଢ଼ା ମୂଲଚାଲରେ । ମନି ଓ ମିଡ଼ିଆ ପାୱାରରେ ବୈଜୟନ୍ତ ପଣ୍ଡା ଓ ଭର୍ତ୍ତୃହରି ମହତାବଙ୍କଠାରୁ ସେ କମ୍ ନୁହଁନ୍ତି । ବିଜେଡ଼ିରେ ଏହି ଦୁଇ ସାଂସଦଙ୍କର ଏବେକାର ଭୂମିକା ଯାହା ସୌମ୍ୟ ହିଁ ଏକମାତ୍ର ବିକଳ୍ପ ଭାବେ ନିଜକୁ ଚିତ୍ରଣ କରିବାରେ ଅସୁବିଧା ନାହିଁ । ଅବଶ୍ୟ ନବୀନ ତାଙ୍କୁ କେମିତି ଗ୍ରହଣ କରୁଛନ୍ତି ତାହା କେବଳ ଦେଖିବାର କଥା । ବଡ଼କଥାଟି ହେଉଛି, ସୌମ୍ୟ ତାଙ୍କ ବୟାନରେ ବିଜେଡ଼ିରେ ମିଶିବା ଚର୍ଚ୍ଚାକୁ ସିଧାସଳଖ ଅସ୍ୱୀକାର କରିନାହାନ୍ତି । କେଉଁଠି ବି ବିଜେଡ଼ି ବିରୋଧରେ ପଦୁଟିଏ କହିନାହାନ୍ତି । ବରଂ ବିଜେଡ଼ି ସପକ୍ଷରେ ଅଧାଅଧି ଓକିଲାତି କରିଛନ୍ତି ।

ପ୍ରଶ୍ନ ଉଠୁଛି, ଚାଷୀ, ଚିଟଫଣ୍ଡ ଜମାକାରୀଙ୍କ ପ୍ରତି ଦରଦ ଦେଖାଉଥିବା ସୌମ୍ୟ ଯଦି ମୁଖ୍ୟମନ୍ତ୍ରୀଙ୍କୁ ସେମାନଙ୍କ ସମସ୍ୟା ଜଣାଇବାକୁ ଚାହୁଁଥିଲେ ତେବେ ଏକୁଟିଆ ଲୁଚିଲା ଭଳି ଯାଇଥିଲେ କାହିଁକି ? ଚାଷୀ ଆନେ୍ଦାଳନର ଅକ୍ଷୟ, ଶେଷଦେବ ନନ୍ଦ, ଭାଷା ଆନ୍ଦୋଳନର ସୁଭାଷ ପଟ୍ଟନାୟକ କି ଚିଟଫଣ୍ଡ ଜମାକାରୀ କ୍ଷତିଗ୍ରସ୍ତ ସୁରକ୍ଷା ଆନ୍ଦୋଳନର ରବି ଦାସଙ୍କୁ ସାଥୀରେ ନେଇଗଲେ ନାହିଁ କାହିଁକି ? ଚାଷୀ ଓ ଚିଟଫଣ୍ଡ ଜମାକାରୀଙ୍କ ପାଇଁ ରାଇଜ ସାରା ବୁଲି ଆଖିରୁ ଲୁହ ଗଡ଼ାଉଥିବା ସୌମ୍ୟଙ୍କୁ ସେଥିପାଇଁ ବାରଣ କଲା କିଏ ? କେଉଁ ପରିସ୍ଥିତି ତାଙ୍କୁ ଏକା ଯିବାକୁ ବାଧ୍ୟ କଲା ? ସମସ୍ତଙ୍କର ମନେଥିବ କିଛି ମାସ ତଳେ ଭୁବନେଶ୍ୱରରେ ଚାଷୀ ସମାବେଶ ଆୟୋଜନକୁ ସରକାର ଅନୁମତି ଦେଇ ନ ଥିଲେ । ଚାଷୀଙ୍କ ସମସ୍ୟା ମୁଖ୍ୟମନ୍ତ୍ରୀଙ୍କୁ ଜଣାଇବାକୁ ଚାହୁଁଛନ୍ତି ବୋଲି ସୌମ୍ୟ ଓ ଅନ୍ୟନେତାମାନେ ଗଳା ଫଟାଇ ଚିତ୍କାର କରିଥିଲେ ମଧ୍ୟ ପୁଲିସ ଅନୁମତି ଦେଲାନି । ଏପରିକି ଚାଷୀ ସମାବେଶକୁ ଆସୁଥିବା ଲୋକଙ୍କୁ ପୁଲିସ ବିଭିନ୍ନ ଜାଗାରେ ଗୋଡେଇ ଗୋଡ଼େଇ ପିଟିଲା । ଏହି ଆନ୍ଦୋଳନର ନେତୃତ୍ୱ ନେଉଥିବା ସୌମ୍ୟ ନବୀନଙ୍କ ଚାଷୀମାରଣ ନୀତିକୁ ମନଭରି ଗାଳି କରିଥିଲେ । ଅକ୍ଷୟ କୁମାର ଓ ଶେଷ ନନ୍ଦଙ୍କୁ ପୁଲିସ ଜେଲରେ ଠୁଙ୍କିଥିବାରୁ ସୌମ୍ୟ ପ୍ରଳାପ କରିଥିଲେ ।

ସେହିଭଳି ଚିଟଫଣ୍ଡ ଜମାକାରୀଙ୍କ ସ୍ୱାର୍ଥରକ୍ଷା ପାଇଁ ସାରା ରାଜ୍ୟରେ ସୌମ୍ୟ ଆନ୍ଦୋଳନ କରୁଛନ୍ତି । ରବି ଦାସ ଓ ଅନ୍ୟମାନଙ୍କୁ ଧରି ଚଢ଼ା ଭାଷଣ ମାରୁଛନ୍ତି । ସେପଟେ ଓଡ଼ିଆ ଭାଷା ପ୍ରୀତି ଦେଖାଇ ରାଜଧାନୀରେ କଳା ପତାକା ପଟୁଆରକୁ ଦୀର୍ଘ ଦିନ ଧରି ପୃଷ୍ଠପୋଷକତା ଦେଉଛନ୍ତି । ନିଶା ନିବାରଣ ଆନ୍ଦୋଳନରରେ ନିଜକୁ ସଂପୃକ୍ତ କରାଇଛନ୍ତି । ଏଥିପାଇଁ ଗଢ଼ି ଉଠିଥିବା ବିଭିନ୍ନ ସଂଗଠନରେ କେଉଁଠି ଆବାହକ ତ ଆଉ କେଉଁଠି ଉପଦେଷ୍ଟା ସାଜିଛନ୍ତି ।

ଭଲକଥା, ଏସବୁ ପ୍ରସଙ୍ଗରେ ମୁଖ୍ୟମନ୍ତ୍ରୀଙ୍କ ସହ ଆଲୋଚନା ପାଇଁ ଆତ୍ମଘୋଷିତ ସ୍ୱାଭିମାନୀ ସୌମ୍ୟ ଯଦି ସୁଯୋଗ ପାଇଲେ ତେବେ ଏହି ସବୁ ଆନ୍ଦୋଳନର ଶୀର୍ଷ ନେତାମାନଙ୍କୁ ସାଙ୍ଗରେ ନେବାରେ ଅସୁବିଧା ରହିଲା କେଉଁଠି ? ଜନସାଧାରଣଙ୍କ ସ୍ୱାର୍ଥରକ୍ଷା ପାଇଁ ମୁଖ୍ୟମନ୍ତ୍ରୀଙ୍କୁ ଭେଟିବାରେ ଯଦି ମହତ୍ ଉଦ୍ଦେଶ୍ୟ ଥିଲା, ତେବେ ନିଜ ଖବରକାଗଜରେ ସିଙ୍ଗଲ୍ କଲମ୍ ବି ନିଉଜ୍ ଛପାଇଲେ ନାହିଁ କାହିଁକି ? ସରକାରୀ କାର୍ଯ୍ୟଦିବସରେ ମୁଖ୍ୟମନ୍ତ୍ରୀଙ୍କ ସଚିବାଳୟ ଅଫିସରେ ତାଙ୍କୁ ଭେଟିବାକୁ ନ ଯାଇ ଛୁଟି ଦିନରେ ନବୀନ ନିବାସ ଏକା ଏକା ଯାଇ ଭେଟିବା ପଛରେ ରହସ୍ୟ କ’ଣ ହୋଇପାରେ ? ଓଡ଼ିଶାବାସୀ ଏତେ ମୁର୍ଖ ନୁହଁନ୍ତି ଯେ ବିଜ୍ଞ ସୌମ୍ୟ ଏମିତି କଥା କହି ସମସ୍ତଙ୍କୁ ଭଣ୍ଡେଇବେ ବୋଲି ସାଧାରଣରେ ଚର୍ଚ୍ଚା ହେଉଛି ।

ସବୁଠାରୁ ସାଂଘାତିକ କଥା ହେଉଛି, ଯେଉଁ ସାଂସଦଙ୍କ ମଧ୍ୟସ୍ଥିରେ ସେ ନବୀନ ନିବାସ ଯାଇଥିବା ସୂଚନା ମିଳିଛି, ସେହି ସାଂସଦଙ୍କ ଦେହରେ ଲାଗିଛି ଚିଟଫଣ୍ଡ କଳଙ୍କ । ବାରମ୍ବାର ସିବିଆଇ ଜେରା ପାଇଥିବା ସାଂସଦ ଆଗୁଆ ଜାମିନ୍ ରେ ଅଛନ୍ତି । ଚିଟଫଣ୍ଡ ଠକେଇ ବିରୋଧରେ ଲଢ଼ୁଥିବା ସୌମ୍ୟ ଶାସକଦଳର ଜଣେ ଚିଟଫଣ୍ଡ କଳଙ୍କିତ ସାଂସଦଙ୍କ ସହଯୋଗ ନେଇ ଏକା ଏକା ନବୀନଙ୍କୁ ଭେଟିବା ତାଙ୍କର ଅସଲ ଚରିତ୍ରକୁ ପଦାରେ ପକାଇଛି ବୋଲି ରାଜନୈତିକ ସମୀକ୍ଷକଙ୍କ ମତ । ସେମାନଙ୍କ ମତରେ, ସାରା ଓଡ଼ିଶା ବୁଲି ସୌମ୍ୟ ଯେ ନାଟକବାଜି କରୁଛନ୍ତି ତାହା ଧରାପଡ଼ିଯାଇଛି । ନିଜର ବ୍ୟବସାୟିକ କିମ୍ବା ବ୍ୟକ୍ତିଗତ ରାଜନୈତିକ ସ୍ୱାର୍ଥ ପାଇଁ ତାଙ୍କ ଦ୍ୱାରା ସବୁ ସମ୍ଭବ ବୋଲି ପ୍ରମାଣିତ କରିଛନ୍ତି । ବରିଷ୍ଠ କଂଗ୍ରେସ ନେତା ଶରତ ରାଉତଙ୍କ ମତରେ ପଟ୍ଟନାୟକ ପରିବାର ବ୍ୟକ୍ତିଗତ ସ୍ୱାର୍ଥ ପାଇଁ ଏକାଠି ହୋଇଯିବାର ଇତିହାସ ୮୦ ଦଶକରୁ ରହିଆସିଛି । ବିଜେପି ମଧ୍ୟ ସୌମ୍ୟଙ୍କ ଆଭିମୁଖ୍ୟକୁ କଟୁ ସମାଲୋଚନା କରିଛି । ଖୋଦ୍ ବିଜେଡ଼ିର ଅନେକ ବରିଷ୍ଠ ନେତା କଳଙ୍କିତ ପଟ୍ଟନାୟକ ବଂଶଧରର ସୌମ୍ୟଙ୍କ ରାଜନୈତିକ ଅଭିଳାଷକୁ ଆକ୍ଷେପ କରିଛନ୍ତି । ଦଳ ପାଇଁ ଏହା ସାଂଘାତିକ ବିପଦ ସୃଷ୍ଟି କରିବ ବୋଲି ସେମାନେ ଚେତାବନୀ ଦେଇଛନ୍ତି ।