ଭୁବନେଶ୍ୱର: ବୈଜୟନ୍ତ ପଣ୍ଡା ଓ ନବୀନ ନନ୍ଦଙ୍କ ମଧ୍ୟରେ ବନ୍ଧୁତା ଖୁବ୍ ନିବିଡ଼ । ଢ଼େଙ୍କାନାଳରେ ବୈଜୟନ୍ତ ହେଲିକପ୍ଟରରେ ଯୁଆଡେ ଯାଉଥିଲେ ସାଙ୍ଗରେ ନବୀନ ରହୁଥିଲେ । ବୈଜୟନ୍ତଙ୍କ ବିପଦ ବେଳେ ନବୀନ ଛିଡ଼ା ହେଉଥିଲା ବେଳେ ନବୀନଙ୍କ ବିପଦରେ ବୈଜୟନ୍ତ ଛିଡ଼ା ହେଉଥିଲେ । କୋଲକତାରେ ଏକ ବିୟୁଟି ପାର୍ଲରରୁ ନବୀନ ଗିରଫ ହେବା ବେଳେ ବୈଜୟନ୍ତଙ୍କ ଟୁଇଟର ତାଙ୍କ ପାଇଁ ସାହା ହୋଇଥିଲା । ତେବେ ଯେଉଁ ରାଜନୈତିକ ସ୍ୱାର୍ଥରେ ଦୁହିଁଙ୍କ ବନ୍ଧୁତା ନିବିଡ଼ ହୋଇଥିଲା ନବୀନ ନନ୍ଦ ତାହାର ଫାଇଦା ପାଇପାରିନାହାନ୍ତି । ଗତ ୪ ତାରିଖରେ ବୈଜୟନ୍ତ ପଣ୍ଡା ବିଜେପିରେ ଯୋଗଦେଇ ରାଷ୍ଟ୍ରୀୟ ଉପସଭାପତି ପଦ ମଣ୍ଡନ କଲା ପରେ ନବୀନଙ୍କ ପଦ୍ମଧରାକୁ ସମସ୍ତଙ୍କର ଅପେକ୍ଷା ଥିଲା । ମାତ୍ର ତାହା ହୋଇନାହିଁ । ନିରାଶ ନବୀନ ଶେଷରେ କଂଗ୍ରେସ ଚାଲିଯାଇଛନ୍ତି । ଆଜି କଂଗ୍ରେସ ଭବନରେ ନିରଞ୍ଜନ ପଟ୍ଟନାୟକ ତାଙ୍କୁ ପୁଷ୍ପଗୁଛ ଦେଇ ଦଳରେ ସାମିଲ କରିଛନ୍ତି ।
ବୈଜୟନ୍ତଙ୍କ ବନ୍ଧୁ ତଥା ଢ଼େଙ୍କାନାଳର ଏହି ପୁର୍ବତନ ବିଧାୟକ ବିଜେପି ଯାଇ ନ ପାରିବାର କାରଣକୁ ନେଇ ଅନେକ ଚର୍ଚ୍ଚା ହେଉଛି । ବୈଜୟନ୍ତ ତାଙ୍କୁ ବିଜେପିକୁ ନେଇ ଢ଼େଙ୍କାନାଳ ଆସନରେ ଟିକେଟ ଦେବାକୁ କୁଆଡ଼େ କଥା ଦେଇଥିଲେ । ବୈଜୟନ୍ତ ଦିଲ୍ଲୀରେ ସେଥିପାଇଁ ପ୍ରବଳ ଚେଷ୍ଟା କରିଥିଲେ । ହେଲେ ଧର୍ମେନ୍ଦ୍ର ପ୍ରଧାନଙ୍କ ଇଚ୍ଛା ଥିଲା ଅଲଗା । ଧର୍ମେନ୍ଦ୍ରଙ୍କ ପ୍ରଭାବ ଆଗରେ ଫିକା ପଡ଼ିଗଲେ ବୈଜୟନ୍ତ । ନିରୁପାୟ ନବୀନ ଶେଷରେ କଂଗ୍ରେସ ଆସିବା ଛଡ଼ା ଅନ୍ୟ ବାଟ ନ ଥିଲା ।
