୩୫ ମିନିଟ୍ ପୂର୍ବରୁ ରଥଟଣା, ସିଂହଦ୍ୱାର ସମ୍ମୁଖରେ ତିନି ରଥ
ପୁରୀ: ପୁରୀରେ ବିନା ଭକ୍ତରେ ମହାପ୍ରଭୁଙ୍କ ଶୃଙ୍ଖଳିତ ରଥଯାତ୍ରା ଦେଖିଥିବା କୋଟି କୋଟି ଜଗନ୍ନାଥପ୍ରେମୀ ଆଜି ବାହୁଡ଼ା ଯାତ୍ରାରେ ବି ଅନୁରୂପ ଅନୁଭବ ପାଇଛନ୍ତି । କୋଭିଡ୍ କଟକଣା ପାଳନ ସହ ସେବାୟତମାନେ ନିର୍ଦ୍ଧାରିତ ସମୟ ପୂର୍ବରୁ ତିନି ରଥକୁ ଗୁଣ୍ଡିଚା ମନ୍ଦିରରୁ ଟାଣି ଆଣିଛନ୍ତି ସିଂହଦ୍ୱାର ସମ୍ମୁଖକୁ । ମହାପ୍ରଭୁଙ୍କ ନୀତିକାନ୍ତିଠାରୁ ଆରମ୍ଭ କରି ରଣଟଣା କେଉଁଥିରେ ବି ସାମାନ୍ୟ ବିଶୃଙ୍ଖଳା ସୃଷ୍ଟି ହୋଇନାହିଁ । କୋଭିଡ୍ କଟକଣା ମାନି ଅତ୍ୟନ୍ତ ଶୃଙ୍ଖଳାର ସହ ସେବାୟତ ଓ ପୁଲିସ ସେମାନଙ୍କ ଦାୟିତ୍ୱ ତୁଲାଇଛନ୍ତି ।
ଅସମ୍ଭବରୁ ସମ୍ଭବ ପାଲଟିଥିବା ଏବର୍ଷର ରଥଯାତ୍ରା ଓ ବାହୁଡ଼ା ଯାତ୍ରା ଖାଲି ସଫଳ ହୋଇନାହିଁ ବରଂ ଟିଭିରେ ମହାପ୍ରଭୁଙ୍କ ଯାତ୍ରାର ସିଧା ପ୍ରସାରଣ ଦେଖୁଥିବା କୋଟି କୋଟି ଭକ୍ତଙ୍କ ଭାବକୁ ଅଧିକ ଜୀବନ୍ତ କରିଛି । ଇତିହାସ ଫର୍ଦ୍ଦରେ ଯୋଡି ହୋଇଛି ଆଉ ଏକ ଫର୍ଦ୍ଦ ।
ସକାଳ ୭ଟା ୪୫ରେ ମଙ୍ଗଳାର୍ପଣ କରାଯାଇ ବାହୁଡ଼ା ପହଣ୍ଡି ଆରମ୍ଭ ହେବାକୁ ସମୟ ନିର୍ଘଣ୍ଟ ହୋଇଥିଲେ ହେଁ ୭.୨୦ରେ ପହଣ୍ଡି ଆରମ୍ଭ ହୋଇଥିଲା । ପ୍ରଥମେ ଚକ୍ରରାଜ ସୁଦର୍ଶନ, ପରେ ଶ୍ରୀ ବଳଭଦ୍ର, ଦେବୀ ସୁଭଦ୍ରା ଏବଂ ଶେଷରେ ମହାପ୍ରଭୁ କାଳିଆ ଠାକରୁଙ୍କର ପହଣ୍ଡି ହୋଇଥିଲା ।
୧୦.୩୫ ରେ ଛେରାପହଁରା କରିଥିଲେ ଗଜପତି ମହାରାଜା । ୧୧.୧୫ ମିନିଟ୍ ରେ ଛେରାପହଁରା ସରିଥିଲା ।
