ଭୁବନେଶ୍ୱର: ବିଜେପିରେ ନୂଆ-ପୁରୁଣା ବିବାଦ ଗୁମୁରୁ ଥିଲା । ନିର୍ବାଚନ ଦିନ ପାଖେଇ ଆସିବା ବେଳକୁ ଏଥିରେ ନିଆଁ ଲାଗିବା ଆରମ୍ଭ କରିଛି । ନୂଆ-ପୁରୁଣା ବିବାଦର ସ୍ରଷ୍ଟା କୁହାଯାଉଥିବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ନିଜ ଗଡ଼ ଅନୁଗୁଳରେ ହିଁ ଏହା ବିସ୍ଫୋରକ ରୂପ ନେଇଛି । ଅଖଣ୍ଡ କ୍ଷମତାଶାଳୀ ତଥା ରାଜ୍ୟ ବିଜେପିର ସର୍ବେସର୍ବା ଧର୍ମେନ୍ଦ୍ରଙ୍କୁ ତାଙ୍କ ଗଡ଼ର ଜଣେ ନେତା ନାଲିଆଖି ଦେଖାଇଛନ୍ତି । ‘ପାର୍ଟି କ’ଣ ତମ ପୈତୃକ ସମ୍ପତ୍ତି’ ବୋଲି ଧର୍ମେନ୍ଦ୍ରଙ୍କ ମୁହଁରେ ଜବାବ ଦେଇଛନ୍ତି । କେବଳ ଅନୁଗୁଳ ନୁହେଁ ଯାଜପୁର, ପଟ୍ଟାମୁଣ୍ଡାଇରେ ବି ଧର୍ମେନ୍ଦ୍ର ବିରୋଧୀ ଅଭିଯାନ ଜୋର୍ ହୋଇଛି । ଭୁବନେଶ୍ୱର ରାଜ୍ୟ ଅଫିସ ଆଗରେ ଯାଜପୁର ଜିଲ୍ଲା ବିଜେପି ନେତାମାନେ ଧାରଣାରେ ବସିଛନ୍ତି । ନୂଆ ଓ ଆମଦାନୀ ନେତାଙ୍କୁ ଧରି ଧର୍ମେନ୍ଦ୍ରଙ୍କ ରାଜନୀତିକୁ ଆଉ ସମ୍ଭାଳିବା ସ୍ଥିତିରେ ନାହାନ୍ତି ଉପେକ୍ଷିତ ପୁରୁଣା ନେତା ।
ଗତକାଲି ଗୋଟିଏ ଦିନରେ ଧର୍ମେନ୍ଦ୍ର ଦୁଇ ଦୁଇଟି ଜାଗାରେ ବିରୋଧର ସମ୍ମୁଖୀନ ହୋଇଥିଲେ । ନିଜ ଗଡ଼ ଅନୁଗୁଳ ଜିଲ୍ଲାର ବଅଁରପାଳସ୍ଥିତ ସରସ୍ୱତୀ ଶିଶୁ ମନ୍ଦିରର ରୌପ୍ୟ ଜୟନ୍ତୀ ଉତ୍ସବରେ ଯୋଗଦେବାକୁ ଯାଇଥିଲେ ଧର୍ମେନ୍ଦ୍ର । ସେଠାରୁ ଫେରି ହେଲିପ୍ୟାଡ୍ ରେ ସେ ଦଳୀୟ ନେତାଙ୍କ ସହ ଆଲୋଚନା କରିଥିଲେ । ଆଲୋଚନାକାଳରେ ପ୍ରତାପ(ନିଲୁ) ପ୍ରଧାନଙ୍କୁ ଏଥର ଏମଏଲଏ ଟିକେଟ ଦିଆଯିବ ଏବଂ ତାଙ୍କୁ ସମସ୍ତେ ସହଯୋଗ କରିବାକୁ ଜିଲ୍ଲାର ବରିଷ୍ଠ ନେତାମାନଙ୍କୁ ଧର୍ମେନ୍ଦ୍ର କହିଦେଇଥିଲେ । ଧର୍ମେନ୍ଦ୍ରଙ୍କ ମୁହଁରୁ ଏକଥା ଶୁଣି ନିଆଁ ହୋଇଯାଇଥିଲେ ଜିଲ୍ଲା ଓବିସି ମୋର୍ଚ୍ଚା ସଭାପତି ଦିଲ୍ଲୀପ ପ୍ରଧାନ । ଜିଲ୍ଲାର ଦଳୀୟ ନେତାଙ୍କ ସହ ଆଲୋଚନା ନ କରି ମନେ ମନେ କେମିତି ଏହି ନିଷ୍ପତ୍ତି ନେଲେ ବୋଲି ଧର୍ମେନ୍ଦ୍ରଙ୍କୁ ପ୍ରଶ୍ନ କରିଥିଲେ ।
ତେବେ ଜଣେ ଜିଲ୍ଲା ନେତାଙ୍କଠାରୁ ଏଭଳି ଜବାବ ଆଶା କରି ନ ଥିବା ଧର୍ମେନ୍ଦ୍ର ରାଗି ପାଚି ଯାଇଥିଲେ । କହିଥିଲେ, ତୁମେ ଦଳରେ ବିଶୃଙ୍ଖଳା କରୁଛ । ମୋ ନିଷ୍ପତ୍ତିରେ ଯିଏ ଏକମତ ହେବନାହିଁ, ଦଳରୁ ବାହାରିଯାଉ । ଆଜି ସଂଧ୍ୟା ସୁଦ୍ଧା ତମେ ପାର୍ଟି ଛାଡ଼ି ଚାଲିଯାଅ ବୋଲି ଦିଲ୍ଲୀପଙ୍କୁ ଧମକାଇଥିଲେ । ତେବେ ଦିଲ୍ଲୀପ ଡରି ନ ଯାଇ ଓଲଟି ଧର୍ମେନ୍ଦ୍ରଙ୍କୁ ନାଲି ଆଖି ଦେଖାଇଥିଲେ । ତମେ କିଏ? ପାର୍ଟି କ’ଣ ତମ ପୈତୃକ ସମ୍ପତ୍ତି ? ତମ କଥାରେ ଆମେ କ’ଣ ପାର୍ଟି ଛାଡ଼ିଦେବୁ କହି ଜୋର୍ ଚିଲ୍ଲାଇଥିଲେ । ଏଭଳି ଜବାବ ଆଶା କରି ନ ଥିବା ଧର୍ମେନ୍ଦ୍ରଙ୍କୁ ଏହା ଭୀଷଣ ଅପମାନିତ କରିଥିଲା । ରାଗ ତମ ତମ ହୋଇ ହେଲିକପ୍ଟରକୁ ପଳାଇ ଯାଇଥିଲେ ।
ସୂଚନାଯୋଗ୍ୟ, କଂଗ୍ରେସରେ ଥିବା ନିଲୁ ପ୍ରଧାନ ଗତ ଏପ୍ରିଲ୍ ମାସରେ ବିଜେପିରେ ମିଶିଛନ୍ତି । ବିଜେପିକୁ ଆସୁ ଆସୁ ଧର୍ମେନ୍ଦ୍ରଙ୍କ ଖୁବ୍ ନିକଟତ୍ତର ହୋଇଛନ୍ତି । ଦଳରେ ନବାଗତ ହୋଇଥିଲେ ମଧ୍ୟ ଧର୍ମେନ୍ଦ୍ରଙ୍କ ବଳରେ ସେ ଦଳର ପୁରୁଖା ନେତାମାନଙ୍କୁ କୁଆଡ଼େ ପାଣି ପିଆଉଛନ୍ତି । ଦଳରେ ବର୍ଷ ବର୍ଷ ଧରି ପଡ଼ି ରହିଥିବା ନେତାମାନେ ଏଥିଯୋଗୁଁ ଧର୍ମେନ୍ଦ୍ରଙ୍କ ଉପରେ ଅସନ୍ତୁଷ୍ଟ ହୋଇ ରହିଛନ୍ତି । ‘ମିଡ଼ଡ଼େ ଓଡ଼ିଶା’ କୁ ଦିଲ୍ଲୀପ ପ୍ରଧାନ କହିଛନ୍ତି, ଧର୍ମେନ୍ଦ୍ର ଏବେ ଏକଛତ୍ରବାଦ ଚଳାଇଛନ୍ତି । ଦଳ ପାଇଁ ରକ୍ତ ଦେଇଥିବା ପୁରୁଖା ନେତାମାନଙ୍କୁ ଅଣଦେଖା କରି ଚାଲିଛନ୍ତି । ଆମେ ତାଙ୍କୁ ବିରୋଧ କରୁନୁ । ମାତ୍ର ତାଙ୍କ ନିଷ୍ପତ୍ତିକୁ ଆମେ ମାନିପାରିବୁ ନାହିଁ । ସମସ୍ତଙ୍କୁ ନେଇ ନ ଚାଲିଲେ ଦଳର ଅସ୍ତିତ୍ୱ ହଜିଯିବ ବୋଲି ସେ ଚେତାବନୀ ଦେଇଛନ୍ତି ।
ଧର୍ମେନ୍ଦ୍ରଙ୍କ ସାମନାରେ ଗତକାଲି କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇରେ ବି ନୂଆ-ପୁରୁଣା ବିବାଦ ଉଗ୍ର ମୋଡ଼ ନେଇଥିଲା । ଧର୍ମେନ୍ଦ୍ର ସେଠାକୁ ଯାଇଥିବା ବେଳେ ନୂଆ-ପୁରୁଣା ନେତା ମୁହାଁମୁହିଁ ହୋଇଥିଲେ । ଉଭୟଙ୍କ ମଧ୍ୟରେ ଧସ୍ତାଧସ୍ତି ଓ ଠେଲାପେଲା ହୋଇ ପରିସ୍ଥିତି ଭୟଙ୍କର ହୋଇଥିଲା ।
ଯାଜପୁର ଜିଲ୍ଲାରେ ନୂଆ-ପୁରୁଣା ବିବାଦ ଜଟିଳ ମୋଡ଼ ନେଇଛି । ପୁରୁଣା ନେତାଙ୍କୁ କୋଣଠେସା କରି ଆମଦାନୀ ନେତାଙ୍କୁ ଗୁରୁତ୍ୱ ଦିଆଯାଉଥିବାରୁ ବହୁ ଦିନରୁ ବିବାଦ ଚାଲିଛି । ଜିଲ୍ଲାରେ ବିଜେପି ଦୁଇଭାଗ ହୋଇ ରହିଛି । ବଡ଼ଚଣାରେ ଏହା ଅଧିକ ଜଟିଳ ହୋଇଛି । ଗତକାଲିଠାରୁ ବିବାଦ ଭୁବନେଶ୍ୱର ଚାଲି ଆସିଛି । ବିଜେପି ପାର୍ଟି ଅଫିସ ଆଗରେ ଅହୋରାତ୍ର ଧାରଣା ଦେଖିବାକୁ ମିଳିଛି । ଜିଲ୍ଲାରେ ନିର୍ବାଚିତ ହୋଇଥିବା ୨୯ ଜଣ ମଣ୍ଡଳ ସଭାପତିଙ୍କୁ ଅଗଣତାନ୍ତ୍ରିକ ଭାବେ ବିଦା କରିଦିଆଯାଇଥିବା ପ୍ରତିବାଦରେ ଦଳର ପୁରୁଣା ସଂଗଠକ ତଥା କର୍ମକର୍ତ୍ତାମାନେ ଏହି ଧାରଣାରେ ବସିଛନ୍ତି । ସେମାନଙ୍କର ମୁଖ୍ୟ ଟାର୍ଗେଟ୍ ରହିଛନ୍ତି ଧର୍ମେନ୍ଦ୍ର । ନ୍ୟାୟ ନ ମିଳିଲା ଯାଏଁ ସେମାନେ ଧାରଣାରେ ବସିବେ ଏବଂ ଆତ୍ମାହୂତି ଭଳି ଚରମ ପଦକ୍ଷେପ ନେବେ ବୋଲି ଧମକ ଦେଇଛନ୍ତି ।
ବିଜେପିର ଏହି ନୂଆ-ପୁରୁଣା ସବୁ ଜିଲ୍ଲାରେ ଜଟିଳ ରୂପ ନେଉଥିବା ଖବର ମିଳିଛି । ଆଗକୁ ନିର୍ବାଚନ ଥିବାରୁ ଟିକେଟ ଆଶାୟୀମାନେ ତତ୍ପର ହୋଇଛନ୍ତି । ଦୁଇ ଗୋଷ୍ଠୀ ଛକାପଂଝା ଅବସ୍ଥାକୁ ଆସିଛନ୍ତି । ଏଭଳି ସ୍ଥିତି ଧର୍ମେନ୍ଦ୍ର ପ୍ରଧାନ ଓ ତାଙ୍କ ଗୋଷ୍ଠୀର ଚିନ୍ତା ବଢ଼ାଇ ଦେଇଛି ।
