ଭୁବନେଶ୍ୱର: ଆଉଟଲୁକ୍ ପତ୍ରିକା ପକ୍ଷରୁ ଦେଶର ‘ଶ୍ରେଷ୍ଠ ପ୍ରଶାସକ’ ଉପାଧି ଧରି ଫେରିଥିବା ମୁଖ୍ୟମନ୍ତ୍ରୀଙ୍କୁ ଅଭିନନ୍ଦନର ସୁଅ ଛୁଟିଛି । ତିନି ଦିନ ହେଲାଣି ଉଭୟ ନବୀନ ନିବାସ ଓ ସଚିବାଳୟରେ ଚାଲିଛି ଯାତ୍ରା । ଦଳୀୟ କର୍ମୀଙ୍କ କୋଳାହଳରେ ଖୋଦ୍ ମୁଖ୍ୟମନ୍ତ୍ରୀଙ୍କ ହାତରେ ନବୀନ ନିବାସରେ କଟାଯାଇଛି କେକ୍ । ମୁଖ୍ୟମନ୍ତ୍ରୀଙ୍କୁ ସ୍ୱାଗତ ଜଣାଇବା ପାଇଁ ସଚିବାଳୟ ତ ଦୁଲୁକୁଛି । ମୁଖ୍ୟ ଶାସନ ସଚିବ, ପୁଲିସ ଡିଜିଙ୍କଠାରୁ ଆରମ୍ଭ କରି ସବୁ ବିଭାଗର କର୍ମଚାରୀ, ବିଭିନ୍ନ ସାମାଜିକ ସଂଗଠନ ଫୁଲତୋଡ଼ା ଦେଇ ମୁଖ୍ୟମନ୍ତ୍ରୀଙ୍କୁ ସ୍ୱାଗତ କରିଛନ୍ତି । ତୃତୀୟ ମହଲାରେ ମୁଖ୍ୟମନ୍ତ୍ରୀଙ୍କ ନିବୁଜ ଘର ସମସ୍ତଙ୍କ ପାଇଁ ଖୋଲିଯାଇଛି । ମୁଖ୍ୟମନ୍ତ୍ରୀଙ୍କୁ ଖୁସି କରିବାକୁ ଚାଲିଛି ପ୍ରତିଯୋଗିତା । ଏଇ ମଉକାରେ ଅଫିସ କାମ ଛାଡ଼ି ଅଫିସର ଓ କର୍ମଚାରୀମାନେ ଯିଏ ଯୁଆଡେ ବୁଲିବାର ବାହାନା ମିଳିଯାଇଛି । ଫୁଲ ଦୋକାନୀଙ୍କ ବେପାର ବି ବଢ଼ିଯାଇଛି ।
ମୁଖ୍ୟମନ୍ତ୍ରୀଙ୍କୁ ଆଉଟଲୁକ୍ ପତ୍ରିକାର ଉପାଧିକୁ ନେଇ ଦଳୀୟ ଓ ସରକାରୀ ମାହୋଲରେ ଏଭଳି ଯାତ୍ରାକୁ ବୁଦ୍ଧିଜୀବୀ ମହଲ ନାପସନ୍ଦ କରିଛନ୍ତି । ଖୋଦ୍ ସଚିବାଳୟର ଅଧିକାଂଶ ଅଫିସର ଓ କର୍ମଚାରୀ ଏହାକୁ ଥଟ୍ଟାମଜ୍ଜା କରିଛନ୍ତି । ଆଉଟଲୁକ୍ ପତ୍ରିକାର ସାର୍ଟିଫିକେଟ୍ କୁ ବିଜେଡ଼ି ନୋବେଲ ପୁରସ୍କାର ସଦୃଶ ଉପସ୍ଥାପିତ କରିବା ଉଦ୍ୟମକୁ ସେମାନେ ଗ୍ରହଣ କରିନାହାନ୍ତି । ମାଛ ତେଲରେ ମାଛ ଭାଜିବା ନ୍ୟାୟରେ ମୁଖ୍ୟମନ୍ତ୍ରୀଙ୍କୁ ସମ୍ବର୍ଦ୍ଧନା ଆଳରେ ସରକାରୀ ରାଜକୋଷକୁ ଲୁଟ୍ କରାଯାଉଛି ବୋଲି ସେମାନଙ୍କ ମତ । ସେ ଯାହା ବି ହେଉ, ଆଉଟଲୁକ୍ ଉପାଧିକୁ ବିଜେଡ଼ି ଭୋଟପ୍ରଚାରର ବଢ଼ିଆ ଅସ୍ତ୍ର କରିଦେଇଛି । ଖାଲି ଭୁବନେଶ୍ୱର ନୁହେଁ, ରାଜ୍ୟର ଗାଁଗଣ୍ଡାରେ ଏହାକୁ ବ୍ୟାପକ ପ୍ରଚାର କରିବାକୁ ନିଷ୍ପତ୍ତି ନେଇଛି । ସବୁ ନିର୍ବାଚନ ମଣ୍ଡଳୀରେ ପ୍ରଚାର ତୋରଣ ଛାଇ କରିଦିଆଯିବ । ଲୋକଙ୍କୁ କୁହାଯିବ ଆମ ମୁଖ୍ୟମନ୍ତ୍ରୀ କେତେ ପାରିବାର । ସେଥିପାଇଁ ହେବାକୁ ଥିବା ବିପୁଳ ଖର୍ଚ୍ଚବାଚକୁ ବିଜେଡ଼ି ପରୱା କରିନାହିଁ ।
ସେପଟେ ବିଜେପି ଏହାକୁ ନବୀନ ବିରୋଧୀ ପ୍ରଚାରର ଆୟୁଧ କରିବାକୁ ବି ପଛାଇନାହିଁ । ଆଉଟଲୁକ୍ ପତ୍ରିକାକୁ ଅନାମଧ୍ୟେୟ ଦର୍ଶାଇବା ସହ ନବୀନ ପଟ୍ଟନାୟକଙ୍କ ‘ଶ୍ରେଷ୍ଠ ପ୍ରଶାସକ’ ଉପାଧିକୁ ପ୍ରାୟୋଜିତ ବୋଲି ତୁମ୍ବିତୋଫାନ କରୁଛି । ନିଜେ ଧର୍ମେନ୍ଦ୍ର ପ୍ରଧାନ ଏଭଳି ମନ୍ତବ୍ୟ ରଖି ନବୀନଙ୍କୁ କଟୁ ସମାଲୋଚନା କରିଛନ୍ତି । ତେବେ ଆଉଟଲୁକ୍ ପତ୍ରିକାକୁ ଅନାମେଧ୍ୟୟ ଦର୍ଶାଉଥିବା ବିଜେପି ଜାଣତରେ ହେଉ କି ଅଜାଣତରେ ହେଉ ଏହାର ଗୁରୁତ୍ୱ ବଢ଼ାଇ ଦେଇଛି । ଗତକାଲି ବିଜେପି ରାଜ୍ୟ କାର୍ଯ୍ୟକାରିଣୀରେ ଏହି ପ୍ରସଙ୍ଗ ତୁଚ୍ଛ ହୋଇଥିଲେ ମଧ୍ୟ ବାହାରେ ଏହାକୁ ଦମଦାର କରିଛି । ଭୁବନେଶ୍ୱର ସହରର ବିଭିନ୍ନ ଜାଗାରେ ଦଳ ପକ୍ଷରୁ ୧୦ ଫୁଟିଆ ହୋର୍ଡିଂ ଲଗାଯାଇଛି । ଲାଇନ୍ ରହିଛି- ନବୀନ ଆଉଟଲୁକ୍ ଦ୍ୱାରା ସମ୍ମାନିତ…ବିଜେଡ଼ି ଉତଫୁଲ୍ଲିତ..ରାଜ୍ୟବାସୀ ବିପର୍ଯ୍ୟସ୍ତ.. । ଯେଉଁ ଆଉଟଲୁକ୍ କୁ ଅନାମଧ୍ୟେୟ କହି ବିଜେପି ବାଏଁ ବାଏଁ ଉଡାଉଛି, ସେହି ଆଉଟଲୁକ୍ ଉପାଧିକୁ ନେଇ ବ୍ୟତିବ୍ୟସ୍ତ କାହିଁକି ? କି ଆବଶ୍ୟକତା ପଡ଼ିଲା ଏଭଳି ହୋର୍ଡିଂର ? ବିଜେପି ଭୟଭୀତ କି ? ନବୀନଙ୍କ ଛାଇକୁ ବିଜେପିର ଡର କିି ? ବୁଦ୍ଧିଜୀବୀ ମହଲକୁ ଆଜି ଏହି ପ୍ରଶ୍ନ ଆନ୍ଦୋଳିତ କରିଛି ।
