ଭୁବନେଶ୍ୱର: ରଥଯାତ୍ରା ପ୍ରସ୍ତୁତିର ପ୍ରାରମ୍ଭିକ ବିଧି ଚଳିତବର୍ଷର ଅକ୍ଷୟ ତୃତୀୟା ଶ୍ରୀମନ୍ଦିର ଭିତରେ ପାଳନ ହେବ । କରୋନା ସଙ୍କଟରୁ ରକ୍ଷା ସକାଶେ ସାମାଜିକ ଦୂରତ୍ୱ ପାଳନ କରାଯାଉଥିବାରୁ ମହାପ୍ରଭୁଙ୍କ ଏହି ପରମ୍ପରା ରଥଖଳାରେ ଅନୁଷ୍ଠିତ ହେବା ସମ୍ଭବ ହେଉନାହିଁ । ତେବେ ବିଧି ରକ୍ଷା ପାଇଁ ଜଗଦଗୁରୁ ଶଙ୍କରାଚାର୍ଯ୍ୟ ପରାମର୍ଶ ଦେବା ପରେ ଅକ୍ଷୟ ତୃତୀୟାର ରଥକାଠ ଅନୁକୂଳ ବିଧି ଶ୍ରୀମନ୍ଦିର ମେଘନାଦ ପାଚେରୀ ଭିତରେ କରାଯିବାକୁ ନିଷ୍ପତ୍ତି ହୋଇଛି । ୨୧ ଦିନିଆ ଚନ୍ଦନ ଯାତ୍ରା ବି ଶ୍ରୀମନ୍ଦିର ଭିତରେ ପାଳନ କରିବାକୁ ଯୋଜନା କରାଯାଇଛି । ସେବାୟତମାନଙ୍କ ସହ ଆଲୋଚନା ପରେ ଆସନ୍ତାକାଲି ଚୂଡ଼ାନ୍ତ ନିଷ୍ପତ୍ତି ନିଆଯିବ ।
ଦିନକ ପରେ ଅକ୍ଷୟ ତୃତୀୟା ଥିବାରୁ ତାହା ପାଳନ ହୋଇପାରିବ କି ନାହିଁ ତାହାକୁ ନେଇ ଦ୍ୱନ୍ଦ ଓ ଅନିଶ୍ଚିତତା ସୃଷ୍ଟି ହୋଇଥିଲା । ଆଜି ଦିନବେଳେ ପୁରୀ ଗଜପତି ମହାରାଜା ଶ୍ରୀ ଦିବ୍ୟସିଂହ ଦେବ, ଶ୍ରୀମନ୍ଦିର ପ୍ରଶାସନ, ପରିଚାଳନା କମିଟି ସଦସ୍ୟ ଏବଂ ସେବାୟତମାନଙ୍କର ବୈଠକ ବସିଥିଲେ ମଧ୍ୟ ନିଷ୍କର୍ସ ବାହାରି ପାରି ନ ଥିଲା । ମେ ୩ ପର୍ଯ୍ୟନ୍ତ ସମଗ୍ର ଦେଶରେ ଲକ୍ ଡାଉନ୍ କଟକଣା ଥିବାରୁ ରଥଯାତ୍ରା ପରମ୍ପରା କିଭଳି ସମ୍ଭବ ହେବ ତାହାର ବିକଳ୍ପ ଖୋଜାଯାଇଥିଲା । ପରମ୍ପରା ବନ୍ଦ ନ ହେଉ ବୋଲି ସମସ୍ତଙ୍କର ମତ ଥିଲା । ତେବେ ଚୂଡ଼ାନ୍ତ ନିଷ୍ପତ୍ତିରେ ଉପନୀତ ହେବା ପାଇଁ ଜଗଦଗୁରୁ ଶଙ୍କରାଚାର୍ଯ୍ୟଙ୍କ ପରାମର୍ଶ ଲୋଡ଼ାଯାଇଥିଲା ।
