ଭୁବନେଶ୍ୱର(ମିଡ-ଡେ ଓଡ଼ିଶା): ବିଜେଡିରେ କିଏ ବିଶୃଙ୍ଖଳା ସୃଷ୍ଟି କରିଛି ? ବୈଜୟନ୍ତ ‘ଜୟ’ ପଣ୍ଡା ନା ଅତନୁ ସବ୍ୟସାଚୀ ନାୟକ ? ଏ ପ୍ରଶ୍ନ ଏବେ ବିଜେଡି ମହଲରେ ଉଙ୍କି ମାରିଛି । ପୂର୍ବରୁ ବୈଜୟନ୍ତ, ମୋଦିଙ୍କ ସପକ୍ଷରେ ଘନଘନ ଟୁଇଟ୍ କରିଥିଲେ ମଧ୍ୟ ଦଳ ନୀରବ ରହିଥିଲା । କେବଳ ସାଂସଦ ନୁହନ୍ତି, ସେ ଜଣେ ବ୍ୟବସାୟୀ ମଧ୍ୟ ହୋଇଥିବାରୁ ନିଜର ବ୍ୟାବସାୟିକ ସ୍ୱାର୍ଥ ପାଇଁ ମୋଦିଙ୍କୁ ସମର୍ଥନ କରୁଥାଇ ପାରନ୍ତି ବୋଲି ବିଜେଡି ମହଲରେ କଥା ଖେଳିଥିଲା । କାରଣ ତାଙ୍କର କଂପାନୀ ପାଇଁ ପରିବେଶ ମଂଜୁରୀଠାରୁ ଆରମ୍ଭ କରି ରପ୍ତାନୀ, ଆମଦାନୀ ସବୁ କେନ୍ଦ୍ର ସରକାର ହାତରେ ରହିଛି । ନିଜ ସ୍ୱାର୍ଥ ପାଇଁ ଯଦି ଜଣେ ମୋଦିଙ୍କୁ ସମର୍ଥନ କରେ, ତେବେ ତାହା ଗର୍ହିତ ଅପରାଧ ନୁହେଁ ବୋଲି ଦଳ ଧରି ନେଇଥିଲା । ତେବେ ହଠାତ୍ ମୁଖ୍ୟମନ୍ତ୍ରୀଙ୍କ ଗସ୍ତ ବେଳେ ମହାକାଳପଡାରେ ଯେଉଁ ମାରପିଟ୍ ଘଟଣା ଘଟିଲା, ତାହା ଏବେ ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।
ମୋଦିଙ୍କୁ ସମର୍ଥନ କରିବାରେ କାହାର ଆପତ୍ତିି ନଥିଲା, ତେବେ ମୋଦି ବଢ଼ିବା ପାଇଁ ନବୀନଙ୍କୁ ପାନେ ଦେବା ପାଇଁ ଚକ୍ରାନ୍ତ ଆରମ୍ଭ ହୋଇଛି କି ? ଏ ପ୍ରଶ୍ନ ମଧ୍ୟ ଉଙ୍କି ମାରିଲାଣି ? ଶୃଙ୍ଖଳା କିଏ ଭାଙ୍ଗିଛି ? ଜୟ ନା ଅତନୁ ? ଏ ପ୍ରଶ୍ନ ଏବେ ବିଜେଡି କର୍ମୀଙ୍କୁ ଘାରିଛି । ଘରର ମୁରବୀଙ୍କ ଆଗରେ ଯେପରି “ୟେ ମୋ ସମର୍ଥକ, ସିଏ ତୋ ସମର୍ଥକ”, “ଜିନ୍ଦାବାଦ, ମୁର୍ଦ୍ଦାବାଦ”ର ନାରା ଦିଆଗଲା, ତାହା ଅନେକଙ୍କୁ ତଟସ୍ଥ କରିଛି । ମୋଦି ମନର କଥା “ମନ୍ କୀ ବାତ୍” ମାଧ୍ୟମରେ ଜଣାଉଥିବା ବେଳେ ଜୟ୍ ମନର କଥା ଟୁଇଟର ମାଧ୍ୟମରେ ଜଣାନ୍ତି । ଏକଥା କାହାକୁ ଅଛପା ନୁହେଁ । ମହାକାଳପଡା ସଭାର ଠିକ୍ ପୂର୍ବଦିନ (୭ ତାରିଖ) ଦିନ ହଠାତ୍ ଜୟ ପଣ୍ଡାଙ୍କୁ ଟୁଇଟର ହାଣ୍ଡଲ୍ ଟୁଁ ଟୁଁ ବୋବେଇ ଉଠିଲା । ମହାକାଳପଡା ସଭାକୁ ସେ ସମସ୍ତ ବିରୋଧ ସତ୍ତ୍ୱେ ଯାଉଛନ୍ତି ବୋଲି ସଦର୍ପ ଘୋଷଣା କଲେ । ଏ “ବିରୋଧ” କୁଆଡୁ ଆସିଲା, ତାହା ଏବେ ସେ କହିବା ନିହାତି ଦରକାର । ତା’ପରେ ମହାକାଳପଡା ସଭା ଦିନ ସକାଳୁ ୩ଟି ଟ୍ୱିଟ୍ କଲେ ବୈଜୟନ୍ତ । କହିଲେ “ନୈତିକତା ଦୃଷ୍ଟିରୁ ଇସ୍ତଫା ଦେଇଥିବା ଜଣେ “କଲିଗ୍’ ଗୁଣ୍ଡା ନିୟୋଜିତ କରିଛନ୍ତି, କିନ୍ତୁ ସେ ଏହାକୁ ନ ଡରି ନିଶ୍ଚିତ ଯିବେ । ଏଥରୁ ଜଣା ପଡୁଛି ଯେ ପବ୍ଲିକ ପ୍ଲାଟଫର୍ମରେ ଜୟ ଖୋଲାଖୋଲି ଯୁଦ୍ଧ ଘୋଷଣା କରିଥିଲେ । ନବୀନଙ୍କୁ ଲୋକ ହାତ ହଲାଉଥିବାର ଭିଜୁଆଲ୍ କପି କରି ଜୟ ମଧ୍ୟ ତାଙ୍କ ଚ୍ୟାନେଲରେ ଦେଖାଇଲେ । ନବୀନଙ୍କ ଜାଗାରେ ସେ ହାତ ହଲାଉଥିବାକୁ ଯୋଡି ଦିଆଗଲା । ରାଜନୀତି କେତେ ତଳକୁ ଯାଇ ପାରେ, ତା’ର ଏହା ଏକ ନିଦର୍ଶନ । ଆହୁରି ପାଦେ ଆଗକୁ ଯାଇ, ତାଙ୍କ ଚ୍ୟାନେଲ୍ ଦେଖାଇଲା ଯେ ପ୍ରତି ଜିଲ୍ଲାରେ ଏବେ ବିଜେଡି ଦୁଇଫାଳ । ଏଥିରୁ କାହାର ଲାଭ ହେଲା ? କିନ୍ତୁ ବିଜେଡିର ତ କ୍ଷତି ହୋଇଛି ଜରୁର୍ ।
ଅନ୍ୟ ପକ୍ଷରେ ଅତନୁଙ୍କୁ ମଧ୍ୟ ଉତ୍ତର ଦେବାକୁ ପଡିବ । ସେ ବୈଜୟନ୍ତଙ୍କୁ ବିରୋଧ କରିବା ପାଇଁ ଗୁଣ୍ଡା ନିୟୋଜିତ କରିଥିଲେ କି ? ଜୟଙ୍କ କହିବା ମୁତାବକ ସଭାକୁ ନଯିବା ପାଇଁ ଯଦି ପୁଲିସ ତାଙ୍କୁ ବାରଣ କରିଥିଲା, ତେବେ ପୁଲିସକୁ ଅତନୁ ସେମିତି କିଛି ନିର୍ଦ୍ଦେଶ ଦେଇଥିଲେ କି ? ଶୃଙ୍ଖଳା କମିଟି ବୈଠକରେ ଏ ପ୍ରସଙ୍ଗ ମଧ୍ୟ ଉତଥାପିତ ହୋଇ ପାରେ । ସବା ଶେଷରେ ଏ କଳିରେ ଦାମ ରାଉତ ମୁଣ୍ଡ ପୂରାଇ ଯେଉଁ କଜଳପାତିଆ ଭଦ୍ରଲୋକ ସାଜିଲେ, ତାହା କେତେଦୂର ଶୃଙ୍ଖଳିତ ଆଚରଣ ? ଯଦି ଏ ଶୃଙ୍ଖଳା ରକ୍ଷା ପାଇଁ କାର୍ଯାନୁଷ୍ଠାନ ନିଆ ନଯାଏ, ତେବେ ବିଶୃଙ୍ଖଳାର ଜୟ ହେଲା ବୋଲି ବିଚାର କରାଯିବ ।
