ଭୁବନେଶ୍ୱର: ଆଉ ମାତ୍ର ୪୨ ଦିନ ପରେ ବିଶ୍ୱକପ୍ ହକି । କଳିଙ୍ଗ ଷ୍ଟାଡ଼ିୟମ୍ ଏଥିପାଇଁ ପୂରା ପ୍ରସ୍ତୁତ ହୋଇଆସିଲାଣି । ପ୍ରସ୍ତୁତିରେ ଯେଭଳି କୌଣସି ତ୍ରୁଟି ନ ରହେ ସେଥିପାଇଁ ପ୍ରଶାସନ ଅକ୍ଲାନ୍ତ ପରିଶ୍ରମରେ ଲାଗିଛନ୍ତି । କ୍ରୀଡ଼ା ଓ ଯୁବ ବ୍ୟାପାର ବିଭାଗ ସଚିବ ବିଶାଳ ଦେବ, ବିଡ଼ିଏ ଉପାଧ୍ୟକ୍ଷ ଡ. କ୍ରିଷାନ କୁମାର ଏବଂ କ୍ରୀଡ଼ା ନିର୍ଦ୍ଦେଶକ ଭିନିଲ୍ କ୍ରିଷ୍ଣା ଅଧିକାଂଶ ସମୟ ନିଜେ ଉପସ୍ଥିତ ରହି ପ୍ରସ୍ତୁତିର ତଦାରଖ କରୁଛନ୍ତି । ଗତ ସପ୍ତାହରେ ମୁଖ୍ୟ ଶାସନ ସଚିବ ଆଦିତ୍ୟ ପ୍ରସାଦ ପାଢ଼ୀ କଳିଙ୍ଗ ଷ୍ଟାଡ଼ିୟମ୍ ନିର୍ମାଣ କାର୍ଯ୍ୟକୁ ବୁଲି ଦେଖିବା ପରେ କାର୍ଯ୍ୟର ଅଗ୍ରଗତି ନେଇ ସନ୍ତୋଷ ପ୍ରକାଶ କରିଛନ୍ତି ।
ଇତିମଧ୍ୟରେ ଷ୍ଟାଡ଼ିୟମ ଦର୍ଶକ ଗ୍ୟାଲେରି କ୍ଷମତା ୭ ହଜାରରୁ ୧୫ ହଜାରକୁ ବୃଦ୍ଧି କରାଯାଇଛି । ଖେଳ ସମୟରେ ଦର୍ଶକମାନଙ୍କର ଯେଭଳି କୌଣସି ଅସୁବିଧା ନହୁଏ, ସେଥିପ୍ରତି ବିଶେଷ ଯତ୍ନ ନିଆଯାଉଛି । ଓଡ଼ିଶାରେ ପ୍ରଥମ ଥର ପାଇଁ ଆୟାଜିତ ଏହି ହକି କୁମ୍ଭମେଳାର ପ୍ରଚାର କାର୍ଯ୍ୟକୁ ବି ଗୁରୁତ୍ୱ ଦିଆଯାଇଛି । ଦର୍ଶକଙ୍କୁ ଆକୃଷ୍ଟ କରିବା ପାଇଁ କୋଲକତା ବିମାନବନ୍ଦରରେ ବଡ଼ ବଡ଼ ବିଜ୍ଞାପନ ହୋର୍ଡିଂ ଲଗାଯାଇଛି । ଡିଜିଟାଲ୍ ଲାଇଟ୍ ରେ ବିଶ୍ୱକପ ହକିର ଚିତ୍ର ଓ ଓଡ଼ିଶା ପର୍ଯ୍ୟଟନର ଆକର୍ଷଣୀୟ ବିଜ୍ଞାପନ ଏଥିରେ ସ୍ଥାନ ପାଇଛି । ଏହା ଦର୍ଶକଙ୍କୁ ବେଶ୍ ଆକୃଷ୍ଟ କରାଯାଉଥିବା ଲକ୍ଷ୍ୟ କରାଯାଉଛି । ଦେଶର ଅନ୍ୟାନ୍ୟ ସହରଗୁଡ଼ିକରେ ସେଭଳି ବିଜ୍ଞାପନ ହୋର୍ଡିଂ ମାରିବାକୁ ଯୋଜନା କରାଯାଇଥିବା କ୍ରୀଡ଼ା ସଚିବ ବିଶାଳ ଦେବ କହିଛନ୍ତି ।
ସୂଚନାଯୋଗ୍ୟ, ବିଶ୍ୱକପ ହକିର ସଫଳ ଆୟୋଜନ ପାଇଁ ରାଜ୍ୟ ସରକାର ଓ ନିଜେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବେଶ୍ ଆଗ୍ରହ ଦେଖାଇଛନ୍ତି । ରାଜ୍ୟ ସରକାରଙ୍କ କ୍ରୀଡ଼ା ବିଭାଗ, ଇଡକୋ ଓ ବିଡ଼ିଏ ମିଳିତ ଭାବେ ଏହାର ତଦାରଖ କରୁଛନ୍ତି । ଆସନ୍ତା ନଭେମ୍ବର ୧୮ ତାରିଖରୁ ଆରମ୍ଭ ହେବ ଏହି ବହୁ ପ୍ରତୀକ୍ଷିତ ବିଶ୍ୱକପ୍ ହକି ।
