ବୈଜୟନ୍ତଙ୍କ ପାଇଁ ବିଜେପି ବାଟ ବନ୍ଦ !

ଭୁବନେଶ୍ୱର: ବୈଜୟନ୍ତ ପଣ୍ଡାଙ୍କ ବିଜେପି ଚକ୍କର ମଉଳିବାକୁ ଯାଉଛି । ଅଗଷ୍ଟ ୧୦ ପୂର୍ବରୁ ସେ ବିଜେପିରେ ମିଶିବାକୁ କ୍ଷେତ୍ର ପ୍ରସ୍ତୁତ ସରିଥିଲା । ଭୁବନେଶ୍ୱର କି କେନ୍ଦ୍ରାପଡ଼ା ନୁହେଁ, ସିଧା ଦିଲ୍ଲୀରେ ଧରିଥାଆନ୍ତେ ପଦ୍ମ ହାତ । ମାତ୍ର ରାଜ୍ୟସଭା ଉପାଧ୍ୟକ୍ଷ ନିର୍ବାଚନ ତାହାକୁ ବିଗାଡ଼ି ଦେଇଛି । ଏହି ନିର୍ବାଚନରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମର୍ଥନ ଗୋଟାଇଥିବା ବିଜେପି ଏବେ ବୈଜୟନ୍ତଙ୍କୁ ଦଳରେ ମିଶାଇ କୁଆଡ଼େ ନବୀନଙ୍କ ଗାତ୍ରଦାହ ହେବାକୁ ଚାହୁଁ ନାହିଁ । ବୈଜୟନ୍ତଙ୍କ ବିଜେପି ମୁଖ୍ୟ ଯୋଗସୂତ୍ରଧାରୀ ରାମ ମାଧବ ଇତିମଧ୍ୟରେ ହାତ ଟେକି ଦେଇଥିବା ଜଣାପଡ଼ିଛି ।

ବିଜେପିରେ ମିଶିବା ପାଇଁ ବୈଜୟନ୍ତ ବହୁ ପୂର୍ବରୁ ଗ୍ରୀନ୍ ସିଗନାଲ୍ ପାଇସାରିଥିଲେ । ମାତ୍ର ହେଭି ବାର୍ଗେନିଂ(ମୂଲଚାଲ)ରେ ରହି ନିଜର ପ୍ରବେଶକୁ ଅଟକେଇ ରଖିଥିଲେ । ମଝିରେ ଏକ ରାଜନୈତିକ ଦଳ ଗଢ଼ିବାକୁ ମନ ବି ବଳାଇଥିଲେ । ମାତ୍ର ସେଥିପାଇଁ ସମର୍ଥନ ଯୋଗାଡ଼ କରିପାରିଲେନି । ଚାରିଆଡୁ ହତାଶ ହେଲା ପରେ ବିଜେପି ସହ ବାର୍ଗେନିଂରେ ଅଟକି ରହିବାକୁ ଚାହିଁ ନ ଥିଲେ । ବିଜେପିରେ ଜଲଦି ଯୋଗଦେବାକୁ ସମୟ ଧାର୍ଯ୍ୟ କରିସାରିଥିଲେ । ଯାହା ଏବେ ଫସର ଫାଟିଯାଇଛି ।

ରାଜନୈତିକ ମହଲର ଆଲୋଚନା ଅନୁଯାୟୀ, ବିଜେଡ଼ିରୁ ତଡ଼ା ଖାଇ ଇସ୍ତଫା ଦେଇଥିବା ବୈଜୟନ୍ତଙ୍କର ମୁଖ୍ୟ ଶତ୍ରୁ ହୋଇଛନ୍ତି ମୁଖ୍ୟମନ୍ତ୍ରୀ । ମୁଖ୍ୟମନ୍ତ୍ରୀ ଓ ତାଙ୍କ ବ୍ୟକ୍ତିଗତ ସଚିବଙ୍କୁ ଜନମାନସରେ ନିନ୍ଦିତ କରିବାକୁ ସେ କୌଣସି ସୁଯୋଗ ହାତଛଡ଼ା କରୁନାହାନ୍ତି । ରାଜନୈତିକସ୍ତରରେ ନବୀନଙ୍କୁ କଡ଼ା ଟକ୍କର ଦେବାକୁ ବୈଜୟନ୍ତ ବିଜେପିକୁ ଶ୍ରେଷ୍ଠ ବିକଳ୍ପ ଧରି ନେଇଥିଲେ । ବିଜେପିକୁ ନେଇ ଭବିଷ୍ୟତ କାର୍ଯ୍ୟପନ୍ଥା ସ୍ଥିର ବି କରିଥିଲେ । ତେବେ ରାଜ୍ୟସଭା ଉପାଧ୍ୟକ୍ଷ ନିର୍ବାଚନରେ ଏନଡିଏ- ନବୀନ ଅଙ୍କ ତାଙ୍କୁ ଅକଳରେ ପକାଇଛି ।

ଏନଡିଏ ପ୍ରାର୍ଥୀଙ୍କୁ ସମର୍ଥନ କରିବା ପାଇଁ ପ୍ରଧାନମନ୍ତ୍ରୀ ମୋଦି, ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ୍ ଶାହା ନବୀନ ପଟ୍ଟନାୟକଙ୍କ ସହ ବରାବର ଯୋଗାଯୋଗରେ ରହିବା, ନବୀନଙ୍କୁ ଫୋନ୍ କରି ସମର୍ଥନ ମାଗିବା ଏବଂ ନବୀନ ସମର୍ଥନ ଦେବା କଥାଟି ବିଜେଡ଼ି-ବିଜେପି ସମ୍ପର୍କର ରହସ୍ୟ ଖୋଜୁଥିଲା ବେଳେ ବୈଜୟନ୍ତଙ୍କୁ ଭୀଷଣ ଘାଟାରେ ପକାଇଛି । ବୈଜୟନ୍ତଙ୍କୁ ଦଳରେ ନେଇ ମୋଦି ଓ ଅମିତ୍ ଶାହା ନବୀନଙ୍କୁ କ୍ଷୁବ୍ଧ କରିବାକୁ ଚାହିଁବେନି ବୋଲି କୁହାଯାଉଛି । ବ୍ୟକ୍ତିଗତ ସୌଜନ୍ୟତା ଆଉ ରାଜନୈତିକ ବାଧ୍ୟବାଧକତା କାରଣରୁ ନବୀନଙ୍କୁ ସେମାନେ ଅସନ୍ତୁଷ୍ଟ କରିବାକୁ ନ ଚାହିଁବା ସ୍ୱାଭାବିକ । ଦେଶର ରାଜନୈତିକ ପରିସ୍ଥିତି ଯାହା ସେଥିରେ ନବୀନ ସେମାନଙ୍କ ପାଇଁ ଗୁରୁତ୍ୱପୂର୍ଣ୍ଣ, ବୈଜୟନ୍ତ ନୁହଁନ୍ତି ।

ବିଜେପିର ଇଙ୍ଗିତ ବୁଝିସାରିଥିବା ବୈଜୟନ୍ତ ଏବେ କୋଉ କୂଳର ହୋଇନାହାନ୍ତି । ବିଜେପିକୁ ନେଇ ସେ ଯେଉଁ ସ୍ୱପ୍ନ ଦେଖିଥିଲେ ତାହା ଚୁରମାର୍ ହୋଇଯାଇଛି । ନିଜେ ଏକ ରାଜନୈତିକ ଦଳ ଗଢ଼ିବାକୁ ତାଙ୍କର ପ୍ରୟାସ ବି ସଫଳ ହୋଇନି । ସୁତରାଂ ବୈଜୟନ୍ତ ନିଜର ଭବିଷ୍ୟତକୁ ନେଇ ତ୍ରିଶଙ୍କୁ ଅବସ୍ଥାରେ ପଡ଼ିଛନ୍ତି । ଆଗକୁ ତାଙ୍କର ପଦକ୍ଷେପ କ’ଣ ହେବ ତାହା ସମସ୍ତଙ୍କ ଅପେକ୍ଷାରେ ।