‘ହାତ’ ଧରିଲେ ସାମ୍ବାଦିକ ସତ୍ୟ ପ୍ରକାଶ

ପିସିସି ମିଡ଼ିଆ ସେଲ୍ ମୁଖ୍ୟ ଦାୟିତ୍ୱ

ଭୁବନେଶ୍ୱର: ଓଡ଼ିଶାର ଜଣାଶୁଣା ସାମ୍ବାଦିକ ତଥା ଟିଭି ଫେସ୍ ସତ୍ୟ ପ୍ରକାଶ ନାୟକ ଆଜି କଂଗ୍ରେସରେ ଯୋଗ ଦେଇଛନ୍ତି । ସକାଳ ୧୦.୩୦ ମିନିଟ୍ ରେ ରାମ ମନ୍ଦିର ଛକରୁ ଏକ ବିରାଟ ଶୋଭାଯାତ୍ରାରେ ବାହାରି ସେ କଂଗ୍ରେସ ଭବନରେ ପହଞ୍ଚିଥିଲେ । ସେଠାରେ ପିସିସି ସଭାପତି ନିରଞ୍ଜନ ପଟ୍ଟନାୟକ,ବରିଷ୍ଠ ନେତା ସୁରେଶ ରାଉତରାୟ, ଅନନ୍ତ ସେଠୀ, ମହମ୍ମଦ ମକିମ୍, ବିଧାୟକ ଭୁଜବଳ ମାଝୀ, ଭୁବନେଶ୍ୱର ଜିଲ୍ଲା ସଭାପତି ମାନସ ଚୌଧୁରୀ ତଥା ଅନ୍ୟମାନଙ୍କ ଗହଣରେ ବିଧିବଦ୍ଧ ଭାବେ କଂଗ୍ରେସରେ ଯୋଗ ଦେଇଥିଲେ । ଦଳରେ ମିଶିବା କ୍ଷଣି ତାଙ୍କୁ କଂଗ୍ରେସ ମିଡ଼ିଆ ସେଲ୍ ର ମୁଖ୍ୟ ଦାୟିତ୍ୱ ଦିଆଯାଇଛି । ମିଶ୍ରଣ ପର୍ବରେ ପିସିସି ସଭାପତି ଏହି ଘୋଷଣା କରିଥିଲେ । ଏହି ଅବସରରେ ସତ୍ୟ ପ୍ରକାଶ କହିଛନ୍ତି, ଦୁର୍ନୀତି ଓ ଭ୍ରଷ୍ଟାଚାର ବିରୋଧରେ ସେ ତାଙ୍କର ଲଢ଼େଇ ଜାରି ରଖିବେ ।

ଉଭୟ ଜାତୀୟ ଓ ଘରୋଇ ମିଡ଼ିଆରେ ଦୀର୍ଘ ୨୦ରୁ ଅଧିକ ବର୍ଷର ଅଭିଜ୍ଞତା ରହିଛି ସତ୍ୟ ପ୍ରକାଶଙ୍କର । ଜଣେ ଫାୟାରବ୍ରାଣ୍ଡ ଜର୍ଣ୍ଣାଲିଷ୍ଟ ଭାବେ ସେ ଓଡ଼ିଶାରେ ବେଶ୍ ପରିଚତ । ଜୀ କଳିଙ୍ଗ ଟିଭିରେ ତାଙ୍କର ପ୍ରାଇମ୍ ଟାଇମ୍ ସୋ ‘ସତ୍ୟର ସାମନା’ ବେଶ୍ ଲୋକପ୍ରିୟ ହୋଇଥିଲା । ଜୀ କଳିଙ୍ଗ ଚାନେଲ୍ ସମେତ ସେ କନକ ଟିଭି ଓ ଇ ଟିଭି ଓଡ଼ିଆରେ ମୁଖ୍ୟ ସମ୍ପାଦକ ଦାୟିତ୍ୱ ତୁଲାଇଥିଲେ ।

ସତ୍ୟ ପ୍ରକାଶଙ୍କ ଯୋଗଦାନ କଂଗ୍ରେସ ମହଲରେ ଉତ୍ସାହ ସୃଷ୍ଟି କରିଛି । ତାଙ୍କୁ ସ୍ୱାଗତ କରିବା ପାଇଁ ଆଜି ଯୁବ ଓ ଛାତ୍ର କଂଗ୍ରେସ କର୍ମୀଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳିଥିଲା । ଗତ ସୋମବାର ଦିନ କଂଗ୍ରେସ ପ୍ରଭାରୀ ଜିତେନ୍ଦ୍ର ସିଂଙ୍କ ସହ ସତ୍ୟ ପ୍ରକାଶଙ୍କ ଦିଲ୍ଲୀରେ ଭେଟଘାଟ ପରେ କଂଗ୍ରେସରେ ତାଙ୍କ ଯୋଗଦାନ ସ୍ପଷ୍ଟ ହୋଇଥିଲା ।