– ମାଉସୀମା ଛକରେ ଚା’ ପିଇଲେ, ଅନ୍ୟଙ୍କୁ ପିଆଇଲେ
– ସୁର ରାଉତରାୟଙ୍କ ଘୋଷଣା: ବୈଜୟନ୍ତ ଏଠୁଁ ପ୍ରାର୍ଥୀ ହେଲେ ସମର୍ଥନ ଦେବୁ
ଭୁବନେଶ୍ୱର: ଭୁବନେଶ୍ୱରର ମାଉସୀମା ଓମଫେଡ଼ ଦୋକାନରେ ହେଇଗଲା ବୈଜୟନ୍ତ ପଣ୍ଡାଙ୍କ ଚାଏ ପେ ଚର୍ଚ୍ଚା ‘ହେଇଯାଉ’ । ଧୂମ୍ ଚା’ ପିଆ ହେଲା ହେଲେ କିଛି ଚର୍ଚ୍ଚା ହେଲାନି । ଯୋଉମାନେ ଆସିଲେ ଚା’ ପିଇଲେ ଆଉ ସେମାନଙ୍କ ମଧ୍ୟରୁ ଅଧିକାଂଶ ଯୁବକ ବୈଜୟନ୍ତଙ୍କ ସହ ସେଲଫି ନେବାକୁ ବ୍ୟାକୁଳ ହେଲେ । ଚା’ ପିଆ ଆସରରେ କିଛି ଚର୍ଚ୍ଚା କରିବାକୁ ସତେଯେମିତି ଭୁଲିଗଲେ ।
ଆଜି ଅପରାହ୍ନ ସାଢ଼େ ୫ଟା ବେଳେ ବୈଜୟନ୍ତ ଆସି ପହଞ୍ଚିଥିଲେ ଓମଫେଡ଼ ଦୋକାନରେ । ଗାଡ଼ିରୁ ଓହ୍ଲାଇ ଦୋକାନ କଡ଼ରେ ପଡ଼ିଥିବା ଚେୟାରରେ ବସୁ ବସୁ ଆସି ପହଞ୍ଚିଥିଲେ ବରିଷ୍ଠ କଂଗ୍ରେସ ନେତା ସୁର ରାଉତରାୟ । ଆରମ୍ଭ କରିଦେଇଥିଲେ ବୋଲିବାଣୀ । “ବୈଜୟନ୍ତ ବାବୁ ବଢ଼ିଆ ଲୋକ । ହୋଃ ଭାରି ଯୋଗ୍ୟ.. ଭୁବନେଶ୍ୱରରୁ ନିର୍ବାଚନ ଲଢ଼ିଲେ ଜମିଯିବ । ତମେ ଲଢ଼ ଆମେ ସାଥୀରେ ଅଛୁ । ସ୍ୱାଧୀନ ଭାବେ ଲଢ଼ିଲେ ଆମେ ସମର୍ଥନ ଦେବୁ । ଖେଳ ଜମେଇଦେବୁ । ଭାଇମାନେ ମାର୍ ତାଳି । ମାଡ଼ିଚାଲ୍..”
ସୁର ରାଉତରାୟଙ୍କ କଥା ଶୁଣି ବୈଜୟନ୍ତ ହସୁଥିଲେ ମଧ୍ୟ ବେଶ୍ ଗମ୍ଭୀର ହୋଇଯାଇଥିଲେ । ତାପରେ ସେହି ଚେୟାରରୁ ଉଠି ନିଜ ଲୋକଙ୍କୁ ଡାକି କହିଲେ.. ସମସ୍ତଙ୍କୁ ଚା’ ଦିଅ । ଦୋକାନୀକୁ ବି କହିଲେ ସମସ୍ତେ ଯେମିତି ଚା ପାଇବେ । ନିଜେ କାଗଜ କପ୍ ରେ ଚା ପିଇଲେ ଏବଂ ସମସ୍ତଙ୍କୁ ଡାକି ଡାକି ଚା ପିଆଇଲେ । ଚା’ ପିଆ ମଜ୍ଜା ନେଉଥିବା ଅଧିକାଂଶ ଯୁବକ ବୈଜୟନ୍ତଙ୍କ ସହ ସେଲଫି ନେଇ ଚାଲିଥିଲେ । ବୈଜୟନ୍ତ ବି କାହାରିକୁ ନିରାଶ କରୁ ନ ଥିଲେ । ଓମଫେଡ଼ ଦୋକାନରେ ଗହଳି ଓ ସାମନାରେ ଟିଭି କ୍ୟାମେରା ଦେଖି ବାଟୋଇମାନେ ଅଟକି ଯାଉଥିଲେ । କ’ଣ ହୋଇଛି ବୋଲି ଉତ୍ସୁକତାର ସହ ପଚାରୁଥିଲେ । ବୈଜୟନ୍ତ ଯାହାକୁ ଦେଖୁଥିଲେ ଚା’ ପିଇବାକୁ ନିମନ୍ତ୍ରଣ କରୁଥିଲେ । ୪୦ ମିନିଟ୍ ଧରି ଏମିତି ଦୃଶ୍ୟ ଚାଲିଲା । ବୈଜୟନ୍ତ ଚା’ ଦୋକାନୀକୁ ଯାଇ ଦିଇଟା ପାଞ୍ଚଶହ ଟଙ୍କିଆ ନୋଟ୍ ବଢ଼ାଇ ସେଠାରୁ ବିଦାୟ ନେଲେ । ନିଜ ବେପାରକୁ ନେଇ ବେଶ୍ ଖୁସି ହୋଇଯାଇଥିଲେ ଦୋକାନୀ କିଶୋର ପ୍ରଧାନ ।
