ଭୁବନେଶ୍ୱର: ଶୁକ୍ରବାର ଦିନ ଏକ ଟିଭି ପ୍ରାଇମ୍ ଟାଇମ୍ ଡିବେଟ୍ ରେ ବସିଥିଲେ ବିଜେଡ଼ି ମୁଖପାତ୍ର ଡକ୍ଟର ଅରୁଣ ସାହୁ, ବିଜେପି ସମ୍ପାଦିକା ଲେଖାଶ୍ରୀ ସାମନ୍ତସିଂହାର ଏବଂ କଂଗ୍ରେସ ବିଧାୟକ ଡାକ୍ତର ପ୍ରଫୁଲ୍ଲ ମାଝୀ । ଅମିତ୍ ଶାହାଙ୍କ ଓଡ଼ିଶା ଗସ୍ତ, ନବୀନଙ୍କୁ କଟାକ୍ଷ ଓ ବିଜେପି-ବିଜେଡ଼ି କଥା କଟାକଟିକୁ ନେଇ ଆଲୋଚନାର ବିଷୟବସ୍ତୁ ଥିଲା ‘କାହାର କେତେ ଦମ୍ ’ । ଆଉ ଅଧଘଣ୍ଟିଆ ଏହି ଆଲୋଚନାରେ ନିଜର ଦମ୍ ଦେଖାଇଥିଲେ ଲେଖାଶ୍ରୀ । ପୂର୍ବଦିନ ଏକ ସାମ୍ବାଦିକ ସମ୍ମିଳନୀରେ ଅମିତ୍ ଶାହାଙ୍କୁ ଶାଳୀନତାର ପାଠ ପଢ଼ାଇଥିବା ଅରୁଣଙ୍କୁ ଫ୍ୟୁଜ୍ କରିଦେଲେ ଲେଖାଶ୍ରୀ ।
ନିଜ ଯୁକ୍ତିର ଦମ୍ ବଳରେ ଲେଖାଶ୍ରୀ ନିଜ ଦଳ ପକ୍ଷକୁ ଆଲୋଚନା ହାଇଜାକ୍ କରୁଥିବା ବେଳେ ଅରୁଣ ଗୋବେଲସ୍ ଥିଓରି,ରଘୁରାମ୍ ରାଜନ୍ ରିପୋର୍ଟ ଭଳି ପୁରୁଣା କଥାରେ ନିଜ ଯୁକ୍ତିକୁ ସୀମିତ ରଖିଥିଲେ । ଲେଖାଶ୍ରୀ ଦମଦାର ହୋଇ ନିଜ ପାଟି, ହାତ ଝାଡୁଥିବା ବେଳେ ଅରୁଣ ମୁରୁକା ସହ ଦେଇ ଦମ୍ ନ ଥିବା ଯୁକ୍ତି କରୁଥିଲେ । ଲେଖାଶ୍ରୀ ଦୁଇଟି ଫଟୋ ଦେଖାଇ ଅରୁଣଙ୍କ ବ୍ୟକ୍ତିଗତ ଚରିତ୍ରକୁ ଆକ୍ଷେପ କରୁଥିବା ବେଳେ ଅରୁଣଙ୍କ ପାଟିରୁ କଥା ବାହାରୁ ନ ଥିଲା । ଓଲଟି ମୁରୁକା ହସ ପକାଉଥିଲେ । ଲେଖାଶ୍ରୀଙ୍କ ଭଳି ବିଜେପିର ଜଣେ ତଳସ୍ତରର କର୍ମକର୍ତ୍ତାଙ୍କ ଆଗରେ ଅରୁଣଙ୍କ ଭଳି ଟାଣୁଆ ଯୁବ ସଂଗଠକ, ଅଭିଜ୍ଞ ନେତା ତଥା ପୂର୍ବତନ ମନ୍ତ୍ରୀଙ୍କର ଏଭଳି ଯୁକ୍ତି ଓ ବଡ଼ି ଲାଙ୍ଗୁଏଜ୍ ବିଜେଡ଼ିର ଦମ୍ ଖସାଇଦେଇଥିଲା ଟିଭିରେ ।
ଖାଲି ଅରୁଣ କାହିଁକି ଟିଭିରେ ମୁହଁ ଦେଖାଉଥିବା ବିଜେଡ଼ିର ଅନେକ ନେତାଙ୍କ ଅବସ୍ଥା ସେୟା । ଦମଦାର କଥାକୁ ଦମହୀନ କରି ଉପସ୍ଥାପିତ କରିବା ସେମାନଙ୍କର ବଡ଼ ଦୁର୍ବଳତା । ବିଜେପି ନେତାମାନେ ଆଗ୍ରେସିଭ୍ ହୋଇ ଲାଙ୍ଗୁଏଜ୍ ଓ ବଡ଼ି ଲାଙ୍ଗୁଏଜ୍ ରେ ନିଜର ଶକ୍ତି ଦେଖାଉଥିବା ବେଳେ ଅଧିକାଂଶ ବିଜେଡ଼ି ନେତାଙ୍କର ଲାଙ୍ଗୁଏଜ୍ ନାହିଁ କି ବଡ଼ି ଲାଙ୍ଗୁଏଜ୍ ନାହିଁ । ଖାଲି ଟିଭିରେ ନୁହେଁ, ଟିଭି ବାହାରେ ବି ସେଇ ଅବସ୍ଥା । କେନ୍ଦ୍ର ବିରୋଧୀ ନାରାବାଜିରେ ବିଧାନସଭା ଅଚଳ କରୁଥିଲେ ମଧ୍ୟ ସେଥିରେ ଦମ୍ ନାହିଁ । ହସଗପ, ଗୁଲିଖଟିରେ ବିଧାୟକ ନାରାବାଜି କରୁଛନ୍ତି । ଦୁଇଦିନ ତଳେ ଧାନର ସର୍ବନିମ୍ନ ସହାୟକ ମୂଲ୍ୟ ବୃଦ୍ଧି ଦାବିରେ ବିଧାନସଭାରେ ବିଜେଡ଼ିର ଆନ୍ଦୋଳନରେ ନେତାଙ୍କ ବଡ଼ି ଲାଙ୍ଗୁଏଜ୍ ଦେଖିଲେ ତାହା ଆପେ ବାରି ହୋଇଯାଉଛି । ଠିକ୍ ସେହିଭଳି ନବୀନଙ୍କ ପ୍ରତି ଅମିତ୍ ଶାହାଙ୍କ କଟୁ ମନ୍ତବ୍ୟର ପ୍ରତିବାଦରେ ବିଜେଡ଼ିର ମଟରସାଇକେଲ୍ ରାଲି ଏବଂ ମାଷ୍ଟରକ୍ୟାଣ୍ଟିନ୍ ରେ ପ୍ରତିବାଦ ସଭାରେ ଆଦୌ ଦମ୍ ନ ଥିଲା । ଏହାର ଏକମାତ୍ର କାରଣ ଥିଲା ନେତାଙ୍କ ଆଚରଣ ଓ ଉଚ୍ଚାରଣ । ଆନ୍ଦୋଳନର ନେତୃତ୍ୱ ନେଉଥିବା ପୂର୍ବତନ ମନ୍ତ୍ରୀ ତଥା ଦଳର ଟାଣୁଆ ଯୁବନେତା ପ୍ରଣବପ୍ରକାଶ ଦାସ(ବବି)ଙ୍କ ବଡ଼ି ଲାଙ୍ଗୁଏଜ୍ ସାଧାରଣ ଲୋକଙ୍କୁ ଅସହ୍ୟ ହୋଇଥିଲା । ମୋଟାମୋଟି ଭାବେ, ଲାଙ୍ଗୁଏଜ୍ ଓ ବଡ଼ି ଲାଙ୍ଗୁଏଜ୍ ରେ ବିଜେପି ନେତାଙ୍କ ଦମଦାର ପ୍ରଦର୍ଶନ ଆଗରେ ବିଜେଡ଼ି ନେତାଙ୍କ ହାର୍ ହୋଇଛି ।
