ଭୁବନେଶ୍ୱର: ଗୁରୁବାର ଦିନ ଦେଓଗାଁର ଦଳିତ ମହେଶ୍ୱର ସୁନାଙ୍କ ଘରେ ଅମିତ୍ ଶାହାଙ୍କ ମଧ୍ୟାହ୍ନ ଭୋଜନକୁ ଜବରଦସ୍ତ ଲାଇଭ୍ କରିଥିଲା ବୈଜୟନ୍ତ ପଣ୍ଡାଙ୍କ ଓଟିଭି । ଅମିତ୍ ଶାହା ଖାଇ ବସିଛନ୍ତି.. ଚଟାଣରେ ବସି ଖଲିପତ୍ର ଧରିଛନ୍ତି..ଏଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଖାଇସାରି ବାହାରକୁ ଆସିଲେ..ଧର୍ମେନ୍ଦ୍ର ଗୋଟେ ପାଣିପାତ୍ରରୁ ପାଣି ଢ଼ାଳି ହାତ ଧୋଉଛନ୍ତି..ଆଉ କିଛି ସମୟ ପରେ ଅମିତ୍ ଖାଇବାରୁ ଉଠିବେ… । ସାମ୍ବାଦିକ ଓ ଆଙ୍କର୍ ଙ୍କ ଏମିତିକା ବର୍ଣ୍ଣନା ଭାରତ ପାକିସ୍ଥାନ ମଧ୍ୟରେ ଉତ୍କଣ୍ଠାପୂର୍ଣ୍ଣ କ୍ରିକେଟ୍ ମ୍ୟାଚ୍ ର ଧାରା ବିବରଣୀ ଭଳି ମନେ ହେଉଥିଲା । ଓଟିଭିର ଉକ୍ତ ନିଉଜ୍ କ୍ଲିପିଂ ଏବେ ସୋସିଆଲ୍ ମିଡ଼ିଆରେ ଭାଇରାଲ୍ ହୋଇଛି । ବୈଜୟନ୍ତ ଓ ଜାଗୀ ପଣ୍ଡାଙ୍କୁ ଟୁଇଟ୍ ବର୍ଷା ହେଉଛି । ଏହା କି ପ୍ରକାର ସାମ୍ବାଦିକତା ବୋଲି ଟୁଇଟକାରୀ ପ୍ରଶ୍ନ ପରେ ପ୍ରଶ୍ନ ପଚାରି ଚାଲିଛନ୍ତି ।
ଓଟିଭିର ଏହାକୁ ଚାଟୁକାରିତା ଆଖ୍ୟା ଦେଇ ବୁଦ୍ଧିଜୀବୀମହଲ ମଧ୍ୟ ଗ୍ରହଣ କରିନାହାନ୍ତି । ବଲାଙ୍ଗୀର ଗସ୍ତରେ ଆସିଥିବା ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଅମିତ୍ ଶାହା ପ୍ରଥମ ଥର ପାଇଁ ଦଳିତଙ୍କ ଘରେ ମଧ୍ୟାହ୍ନ ଭୋଜନ କରିନାହାନ୍ତି । ପୂର୍ବରୁ ଓଡ଼ିଶାର ବିଭିନ୍ନ ଜାଗାରେ ଦଳିତଙ୍କ ଘରେ ଶାହା ଏବଂ ତାଙ୍କ ଟିମ୍ ଯାଇ ଭୋଜନ କରିଛନ୍ତି । ସଂଘ ପରିବାର ସଦସ୍ୟମାନେ ଦଳିତଙ୍କ ଘରେ ଭୋଜନ କରିବା ଏକ ମାମୁଲି ଘଟଣା । ତେବେ ଓଡ଼ିଶାରେ ଅମିତ୍ ଶାହାଙ୍କ ଦଳିତ ଘରେ ଭୋଜନ ସୋ’କୁ ଭୋଟ ଚାଲ୍ ବୋଲି ବିରୋଧୀ କହୁଛନ୍ତି ।ସାମ୍ବାଦିକତା ଧର୍ମର ଦ୍ୱାହି ରଖୁଥିବା ବୈଜୟନ୍ତଙ୍କ ଟିଭି ଏହି ମାମୁଲି ଘଟଣା ଉପରେ ମାତ୍ରାଧିକ ଆଗ୍ରହ ଢ଼ାଳିବା ଅନେକଙ୍କୁ ବିସ୍ମିତ କରିଛି ।
ବୁଦ୍ଧିଜୀବୀଙ୍କ ମତରେ ଅମିତ୍ ଶାହାଙ୍କ ଭୋଜନ କାର୍ଯ୍ୟକ୍ରମର ଲାଇଭ୍ ଧାରାବିବରଣୀ ଦେଇ ଓଟିଭି ନିଜର ଏଜେଣ୍ଡା ପ୍ରତିପାଦିତ କରିଛି । ସେଦିନ ସେହି ସମୟରେ ସଲମାନ୍ ଖାଁ ଙ୍କ କୋର୍ଟ ଦଣ୍ଡ ଖବର ଆସିଯିବାରୁ ଅମିତ୍ ଶାହାଙ୍କ ଭୋଜନ୍ ବ୍ରେକିଂ ଖବରଟି ବାଧ୍ୟରେ ହଟିଥିଲା । ନହେଲେ ଶାହାଙ୍କ ଭୋଜନ୍ ଲାଇଭ୍ କୁ ଓଟିଭି ଆହୁରି ଜମେଇ ଥାଆନ୍ତା । ଓଟିଭିର ଏଭଳି ଆଭିମୁଖ୍ୟରୁ ରାଜନୈତିକ ବାତ୍ସ୍ନା ବାରି ହେଉଛି ବୋଲି ଜଣେ ବରିଷ୍ଠ ସାମ୍ବାଦିକ ଓ ସମ୍ଭକାର କହିଛନ୍ତି । ଓଟିଭି ବିରୋଧରେ ବିଜେଡ଼ିର ପକ୍ଷପାତିତା ଅଭିଯୋଗକୁ ଏହା ସ୍ପଷ୍ଟ ପ୍ରମାଣିତ କରୁଛି ବୋଲି ସେ କହିଛନ୍ତି ।
ସେପଟେ ଓଟିଭିରେ ଶାହାଙ୍କ ଭୋଜନ୍ ଲାଇଭ୍ କମେଣ୍ଟ୍ରି ସୋସିଆଲ୍ ମିଡ଼ିଆରେ ଭାଇରାଲ୍ ହେବାରେ ଲାଗିଛି । ଫେସବୁକ୍ ଓ ଟୁଇଟରରେ ଏହା ଉପରେ ବିଭିନ୍ନ ଟିପ୍ପଣୀ ଆସିଲାଣି । ଏହା କି ପ୍ରକାର ସାମ୍ବାଦିକତା ବୋଲି ବୈଜୟନ୍ତ ଓ ଜାଗୀଙ୍କୁ ପ୍ରଶ୍ନ ହୋଇଛି । ଅବଶ୍ୟ ଓଟିଭି ସପକ୍ଷରେ ମତଦେବାକୁ ଅନେକ ଅଣ୍ଟା ଭିଡ଼ିଛନ୍ତି । ବୈଜୟନ୍ତଙ୍କୁ ପ୍ରଶ୍ନ କରୁଥିବା ଲୋକଙ୍କୁ ବିଜେଡ଼ି ଚାମଚା ବୋଲି ଆଖ୍ୟା ଦିଆଯାଉଛି । ତେବେ ଯାହା ବି ହେଉ, ଓଟିଭିର ଏହି କ୍ଲିପିଂକୁ ଦେଖି ରାଜନୈତିକ ଉଦ୍ଧ୍ୱର୍ରେ ଥିବା ଅନେକ ଲୋକ ହସି ହସି ବେଦମ୍ ହେଉଛନ୍ତି ।
