ଭୁବନେଶ୍ୱରରୁ ଉଡ଼ିବ ୧୪ ନୂଆ ବିମାନ

ଭୁବନେଶ୍ୱର: ଭୁବନେଶ୍ୱରରୁ ୧୪ଟି ନୂଆ ବିମାନର ଉଡ଼ାଣ ହେବାକୁ ଯାଉଛି । ଦେଶର ବିଭିନ୍ନ ସହର ଓ ବିଦେଶ ମାଟିକୁ ଏହି ବିମାନ ଚଳାଚଳ କରିବ । ନୂଆ ବିମାନଗୁଡ଼ିକ କୋଲକତା-ଝାରସୁଗୁଡ଼ା, ଭୁବନେଶ୍ୱର-ବାରାଣସୀ, ବାରାଣସୀ-ଭୁବନେଶ୍ୱର, ଝାରସୁଗୁଡ଼ା-ମୁମ୍ବାଇ, ପ୍ରୟାଗରାଜ-ଭୁବନେଶ୍ୱର, ଦିଲ୍ଲୀ-ଭୁବନେଶ୍ୱର, ଭୁବନେଶ୍ୱର-ରାଉରକେଲା, ଭୁବନେଶ୍ୱର-କଲାଇକୁଣ୍ଡା, ଭୁବନେଶ୍ୱର-ବ୍ୟାଙ୍ଗକକ୍, ବ୍ୟାଙ୍ଗକକ୍-ଭୁବନେଶ୍ୱର, ସିଙ୍ଗାପୁର-ଭୁବନେଶ୍ୱର ଏବଂ ଭୁବନେଶ୍ୱର- ଆବୁ ଧାବି ମଧ୍ୟରେ ଚଳାଚଳ କରିବାକୁ ଯୋଜନା ହୋଇଛି ।

ବୁଧବାର ଦିନ ଭୁବନେଶ୍ୱରରେ ଅନୁଷ୍ଠିତ ୨୫ରୁ ଅଧିକ ଏୟାରଲାଇନ୍ସ କମ୍ପାନୀର ସିଇଓଙ୍କ ବୈଠକରେ ଏହି ସୂଚନା ଦିଆଯାଇଛି । ଜାନୁଆରୀରୁ ଜୁଲାଇ ମାସ ମଧ୍ୟରେ ଅଧିକାଂଶ ବିମାନର ଉଡ଼ାଣ ଆରମ୍ଭ କରିବାକୁ ଯୋଜନା ହୋଇଛି । ସୂଚନାଥାଉକି, ବର୍ତ୍ତମାନ ଭୁବନେଶ୍ୱରରୁ ବିଭିନ୍ନ ସ୍ଥାନକୁ ୫ଟି ବିମାନ ଚଳାଚଳ କମ୍ପାନୀର ୪୦ଟି ବିମାନ ଚଳାଚଳ କରୁଛି ।

ନୂଆ ରୁଟ୍ ରେ ଯିବାକୁ ଥିବା ଘରୋଇ ବିମାନରେ ଟିକସ କମାଯିବ । ଘରୋଇ ବିମାନ ପାଇଁ ୧ ପ୍ରତିଶତ ଭାଟ୍ ରେ ଇନ୍ଧନ ଯୋଗାଇ ଦିଆଯିବ । ଅନ୍ତର୍ଜତୀୟ ବିମାନର ଇନ୍ଧନ ଉପରେ ଭାଟ୍ ଛାଡ ହେବ ବୋଲି ବୈଠକରେ ଆଲୋଚନା ହୋଇଛି ।

ଉକ୍ତ ବୈଠକକୁ ଉଦଘାଟନ କରିଥିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଓଡ଼ିଶା ସହିତ ବିମାନ ସଂଯୋଗ ବଢ଼ାଇବାକୁ ମୁଖ୍ୟମନ୍ତ୍ରୀ ବିଭିନ୍ନ ଏୟାରଲାଇନ୍ ଅପରେଟରମାନଙ୍କୁ ବୁଝାଇଥିଲେ । ଓଡ଼ିଶାର ସମୃଦ୍ଧି, ଟେକନୋଲୋଜିରେ ଦକ୍ଷତାସମ୍ପନ୍ନ ଓଡ଼ିଆମାନଙ୍କ ବିଭିନ୍ନ ଦେଶରେ ଅବସ୍ଥାନ, ବିଶ୍ୱଭ୍ରମଣ ପାଇଁ ମଧ୍ୟବିତ୍ତ ଶ୍ରେଣୀଙ୍କ ଆଗ୍ରହ, ପର୍ଯ୍ୟଟନ ବିକାଶ ଏବଂ କ୍ଷେତ୍ରୀୟସ୍ତରରେ ଦ୍ରୁତ ଅର୍ଥନୈତିକ ଅଭିବୃଦ୍ଧିର ଅବତାରଣା କରି ମୁଖ୍ୟମନ୍ତ୍ରୀ ଓଡ଼ିଶା ପ୍ରତି ସେମାନଙ୍କର ଦୃଷ୍ଟି ଆକର୍ଷଣ କରିଥିଲେ ।

ଏହି ପରିପ୍ରେକ୍ଷୀରେ ଭାରତ ସରକାର ଏବଂ ଏୟାରଲାଇନ୍ ଅପରେଟରମାନେ ଜାତୀୟ ଓ ଅର୍ନ୍ତଜାତୀୟ ବିମାନ ସେବାରେ ଓଡ଼ିଶାକୁ ଅଧିକ ଧ୍ୟାନ ଦେବାକୁ ମୁଖ୍ୟମନ୍ତ୍ରୀ ଅନୁରୋଧ କରିଥିଲେ । ନିର୍ଦ୍ଦିଷ୍ଟ ଭାବେ ଭୁବନେଶ୍ୱରରୁ ଦୁବାଇ, ଆବୁ ଧାବି, ସିଙ୍ଗାପୁର, ଶ୍ରୀଲଙ୍କା, ହଙ୍ଗକଙ୍ଗ ଏବଂ ବ୍ୟାଙ୍ଗକକ୍ କୁ ବିମାନ ଉଡ଼ାଣ ପାଇଁ ମୁଖ୍ୟମନ୍ତ୍ରୀ ଗୁରୁତ୍ୱ ଦେଇଥିଲେ ।

ଏଥିସହ ଓଡ଼ିଶାକୁ ବିମାନ ଚଳାଚଳ ସଂଖ୍ୟା ବଢ଼ାଇଥିବାରୁ କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରଣାଳୟକୁ ମୁଖ୍ୟମନ୍ତ୍ରୀ ଧନ୍ୟବାଦ ଦେବା ସହ ପୁନେ, ଜୟପୁର, ଲକ୍ଷ୍ମୋ, ଚେନାଇ, ଭାଇଜାଗ୍, କୋଚି ଏବଂ ରାଞ୍ଚି କୁ ନୂଆ ଘରୋଇ ବିମାନ ଚଳାଚଳ କରାଇବାକୁ ଅନୁରୋଧ କରିଥିଲେ । ଉଭୟ ଘରୋଇ ଓ ଅନ୍ତର୍ଜାତୀୟ ବିମାନ ଚଳାଚଳ ପାଇଁ ରାଜ୍ୟ ସରକାର ସମସ୍ତ ସହଯୋଗ ପ୍ରଦାନ କରିବେ ବୋଲି ମୁଖ୍ୟମନ୍ତ୍ରୀ ପ୍ରତିଶ୍ରୁତି ଦେଇଥିଲେ ।

ବେସାମରିକ ବିମାନ ଚଳାଚଳ ମନ୍ତ୍ରଣାଳୟର ସଚିବ ପି.ଏସ.ଖାରୋଲା କହିଥିଲେ, ଜାତୀୟସ୍ତରରେ ବିମାନ ଚଳାଚଳ ବୃଦ୍ଧି ହାର ୧୭% ଥିଲା ବେଳେ ଭୁବନେଶ୍ୱରରେ ଏହି ହାର ୨୯% ରହିଛି । ମନ୍ତ୍ରଣାଳୟର ଯୁଗ୍ମ ସଚିବ ଶ୍ରୀମତୀ ଉଷା ପାଢ଼ୀ ଉଡ଼ାନ୍ ସ୍ମିମ୍ ର ଉପସ୍ଥାପନା କରି ଏହା ଅଧୀନରେ ଭୁବନେଶ୍ୱରକୁ ଆବଶ୍ୟକ ଗ୍ୟାପ୍ ଫଣ୍ଡିଂ ଯୋଗାଇ ଦିଆଯିବ ବୋଲି କହିଥିଲେ । ରାଜ୍ୟ ପରିବହନ ମନ୍ତ୍ରୀ ପଦ୍ମନାଭ ବେହେରା ମଧ୍ୟ ଭାଷଣ ଦେଇଥିଲେ ।

ପରିବହନ ସଚିବ ଡାକ୍ତର ପ୍ରମୋଦ ମେହେର୍ଦ୍ଦା. ଶିଳ୍ପ ସଚିବ ହେମନ୍ତ ଶର୍ମା, କ୍ରୀଡ଼ା, ପର୍ଯ୍ୟଟନ ବିଭାଗର ପ୍ରମୁଖ ସଚିବ ବିଶାଲ ଦେବ ସେମାନଙ୍କ ବିଭାଗର ସକ୍ଷମତା ଉପସ୍ଥାପନ କରିଥିଲେ । ମୁଖ୍ୟ ଶାସନ ସଚିବ ଅସିତ୍ କୁମାର ତ୍ରିପାଠୀ ସ୍ୱାଗତ ଭାଷଣ ଦେଇଥିଲା ବେଳେ ବିଭିନ୍ନ ବିଭାଗର ସଚିବ ଏବଂ ବରିଷ୍ଠ ଅଧିକାରୀମାନେ ବୈଠକରେ ଯୋଗଦେଇଥିଲେ ।