ମହିଳା ଆଇଏଏସ୍ ଙ୍କ ବଙ୍ଗଳା ସଉକ !

ରାଉରକେଲା: ସରକାରୀ ଅର୍ଥରେ ବଡ଼ବଡ଼ିଆ ମନ୍ତ୍ରୀ, ଅଫିସରଙ୍କ ବିଳାସ ବ୍ୟସନର ଅନେକ କାହାଣୀ ଆଗରୁ ଶୁଣିଥିଲୁ । ମାତ୍ର ସମସ୍ତଙ୍କୁ ଚକିତ କଲା ଭଳି ଜଣେ ମହିଳା ଆଇଏଏସ୍ ଙ୍କ ବିଳାସ କାହାଣୀ ସାମନାକୁ ଆସିଛି । ବର୍ତ୍ତମାନର ସୁନ୍ଦରଗଡ଼ ଜିଲ୍ଲାପାଳ ରଶ୍ମିତା ପଣ୍ଡା ବର୍ଷେ ତଳେ ରାଉରକେଲା ଉନ୍ନୟନ କର୍ତ୍ତୃପକ୍ଷର ଉପାଧ୍ୟକ୍ଷା ଥିଲା ବେଳେ ତାଙ୍କ ସରକାରୀ କ୍ୱାର୍ଟର(ବଙ୍ଗଳା) ଆଧୁନିକୀକରଣରେ ଖର୍ଚ୍ଚ କରିଥିଲେ ପ୍ରାୟ ୭୦ ଲକ୍ଷ ଟଙ୍କା । ସେଥିରୁ କେବଳ ପାଚେରୀ ବାବଦ ଖର୍ଚ୍ଚ ରହିଛି ୮ ଲକ୍ଷ ଏବଂ ମଶା ଜାଲି ପାଇଁ ୪ ଲକ୍ଷ ଟଙ୍କା । ରାଉରକେଲା ଉନ୍ନୟନ କର୍ତ୍ତୃପକ୍ଷ ପାଣ୍ଠିରୁ ଏହି ଅର୍ଥ ଖର୍ଚ୍ଚ ହୋଇଥିଲା । ସୂଚନା ଅଧିକାର ଆଇନ ବଳରେ ଏହି ତଥ୍ୟ ହସ୍ତଗତ ହୋଇଛି ।

ରାଉରକେଲାର ଉଦିତନଗରସ୍ଥିତ ସରକାରୀ କ୍ୱାର୍ଟର ନଂ ୪ଆର/୧ । ଏଠାରେ ରହୁଥିଲେ ରଶ୍ମିତା ପଣ୍ଡା । ଏକକାଳୀନ ରାଉରକେଲା ଉନ୍ନୟନ କର୍ତ୍ତୃପକ୍ଷର ଉପାଧ୍ୟକ୍ଷ, ରାଉରକେଲା ମ୍ୟୁନିସପାଲ୍ କର୍ପୋରେସନ୍ ର କମିଶନର ତଥା ରାଉରକେଲା ସ୍ମାର୍ଟ ସିଟି ଅଥରିଟିର ସିଇଓ ଦାୟିତ୍ୱରେ ଥିଲେ । ଗତବର୍ଷ(୨୦୧୮) ଏପ୍ରିଲ୍ ରୁ ଅଗଷ୍ଟ ମାସ ମଧ୍ୟରେ ସେ ତାଙ୍କ କ୍ୱାର୍ଟରର ନବୀକରଣ କରାଇଥିଲେ । ସରକାରୀ ନିୟମ ଅନୁଯାୟୀ ୫ ଲକ୍ଷ ଟଙ୍କାରୁ ଅଧିକ କାମ ପାଇଁ ଖୋଲା ଟେଣ୍ଡର ହେବା କଥା । ମାତ୍ର ଶ୍ରୀମତୀ ପଣ୍ଡାଙ୍କ କ୍ୱାର୍ଟର ମରାମତିରେ ସମୁଦାୟ ୬୮ ଲକ୍ଷ ୫୭ ହଜାର ୯୫୦ ଟଙ୍କା ଖର୍ଚ୍ଚ ହୋଇଥିଲେ ମଧ୍ୟ ଟେଣ୍ଡର ହୋଇ ନ ଥିଲା । ଟେଣ୍ଡର ଏଡ଼ାଇବା ପାଇଁ ୫ ଲକ୍ଷ ହିସାବରେ କାମକୁ ବାଣ୍ଟି ଦିଆଯାଇଥିଲା ।

ଉକ୍ତ କ୍ୱାର୍ଟର ନବୀକରଣରେ ସରକାରୀ ଅର୍ଥର ବ୍ୟାପକ ଅପବ୍ୟବହାର ଓ ଅର୍ଥ ତୋଷରପାତ ଅଭିଯୋଗ ହେବା ପରେ ରାଉରକେଲାର ସୂଚନା ଅଧିକାର କର୍ମୀ ରଶ୍ମିରଞ୍ଜନ ପାଢ଼ୀ ଆରଟିଆଇ ବଳରେ ଏହି କ୍ୱାର୍ଟର ନବୀକରଣ ବାବଦ ଖର୍ଚ୍ଚର ହିସାବ ମାଗିଥିଲେ । ଯାହା ଏବେ ହସ୍ତଗତ ହୋଇଛି ।

ଆଇଏଏସ୍ ମହୋଦୟାଙ୍କ ସରକାରୀ କ୍ୱାର୍ଟର ମରାମତିରେ କେଉଁଥିପାଇଁ କେତେ ଖର୍ଚ୍ଚ ହୋଇଛି ତାହା ଏଠି ଉଲ୍ଲେଖ କରାଗଲା ।

୧. ଅତିରିକ୍ତ ଡାଇନିଂ ରୁମ୍- ୪ ଲକ୍ଷ ୫ ହଜାର
୨.ପାଚେରୀ ନବୀକରଣ(ମରାମତି ଓ ଉଚ୍ଚତା ବୃଦ୍ଧି)- ୪ ଲକ୍ଷ ୪୨ ହଜାର
୩. ପାଚେରୀ ନିର୍ମାଣ- ୩ ଲକ୍ଷ ୯୪ ହଜାର
୪. ଗାର୍ଡରୁମ୍ ଓ ଟଏଲେଟ୍ ନିର୍ମାଣ- ୪ ଲକ୍ଷ
୫. କ୍ୱାର୍ଟର ମରାମତି/ନବୀକରଣ- ୩ ଲକ୍ଷ ୮୦ ହଜାର
୬. କୋର୍ଟୟାର୍ଡ ଏବଂ ବେଡରୁମ୍ ପାଇଁ ଅତିରିକ୍ତ ଟଏଲେଟ୍-  ୩ ଲକ୍ଷ ୮୫ ହଜାର
୭. ଅତିରିକ୍ତ ବେଡରୁମ୍ ନିର୍ମାଣ- ୪ ଲକ୍ଷ ୩୪ ହଜାର
୮. ଆବାସିକ ଘର ଏବଂ ବୋରୱେଲ୍ ନିର୍ମାଣ- ୪ ଲକ୍ଷ ୨୩ ହଜାର
୯. ଡ୍ରେନ୍ ଏବଂ ପୋର୍ଟିକୋ ନିର୍ମାଣ- ୪ ଲକ୍ଷ ୪୪ ହଜାର
୧୦. ବାହ୍ୟ ବିଦ୍ୟୁତିକରଣ- ୪ ଲକ୍ଷ ୯୭ ହଜାର
୧୧. ଭିତର ବିଦ୍ୟୁତିକରଣ- ୪ ଲକ୍ଷ ୯୧ ହଜାର
୧୨. ଫାବ୍ରିକେସନ୍ କାମ – ୪ ଲକ୍ଷ ୪୦ ହଜାର
୧୩. ଟଏଲେଟ୍ ମରାମତି ଏବଂ ପାଣି ଯୋଗାଣ- ୪ ଲକ୍ଷ ୩୯ ହଜାର
୧୪. ମଶା ଜାଲି- ୪ ଲକ୍ଷ ୪ ହଜାର
୧୫. ସ୍ଲାଇଡିଂ ଉଇଣ୍ଡୋ ଏବଂ ଇଟାଲି ଟାଇଲସ୍- ୪ ଲକ୍ଷ ୨୭ ହଜାର
୧୬. ପେଣ୍ଟ/ ପଛପଟ ଗାର୍ଡରୁମ୍- ୪ ଲକ୍ଷ ୪୫ ହଜାର

ଆରଟିଆଇ ତଥ୍ୟ ପଦାକୁ ଆସିଲା ପରେ ଆଜି ଗଣମାଧ୍ୟମ ପ୍ରତିନିଧିମାନେ ଶ୍ରୀମତୀ ପଣ୍ଡାଙ୍କ ପ୍ରତିକ୍ରିୟା ଆଣିବାକୁ ଚେଷ୍ଟା କରିଥିଲେ । ମାତ୍ର କାର୍ଯ୍ୟବ୍ୟସ୍ତତା ଯୋଗୁଁ ସେ ପ୍ରତିକ୍ରିୟା ଦେଇନାହାନ୍ତି ।