ମାର୍କେଟ୍ ର ନୂଆ ପ୍ଲେୟାର୍ ‘ନନ୍ଦିଘୋଷ’, ଚାଲେଞ୍ଜ ଅନେକ

ଭୁୁବନେଶ୍ୱର: ଓଡ଼ିଶା ଗଣମାଧ୍ୟମ ଜଗତରେ ଯୋଡିହୋଇଛି ‘ନନ୍ଦିଘୋଷ’ ଟିଭି । 24×7 ଘଣ୍ଟିଆ ଏହି ନ୍ୟୁଜ୍ ଚାନେଲ୍ ଓଡ଼ିଶାବାସୀଙ୍କ ଉଦ୍ଦେଶ୍ୟରେ ଆଜି ଲୋକାର୍ପିତ ହୋଇଛି । ମେ ଫେୟାର୍ କନଭେନସନ୍ ହଲ୍ ରେ ଆୟୋଜିତ ଭବ୍ୟ ଉତ୍ସବରେ ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ, ବିରୋଧୀ ଦଳ ନେତା ପ୍ରଦୀପ୍ତ ନାୟକ ଏବଂ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ସମ୍ମାନିତ ଅତିଥି ଭାବେ ଉପସ୍ଥିତ ରହି ଏହି ନୂଆ ଟିଭି ଚାନେଲ୍ ର ଶୁଭକାମନା କରିଛନ୍ତି ।

‘ନନ୍ଦିଘୋଷ’ ଟିଭି ସମ୍ପୂର୍ଣ୍ଣ ଭାବେ ନିରପେକ୍ଷ ଖବର ପରିବେଷଣ କରିବ । ଲୋକଙ୍କ ସ୍ୱରକୁ ଚାନେଲ୍ ର ଭାଷା କରି ଗଣମାଧ୍ୟମ ଜଗତରେ ଏକ ନୂଆ ଟ୍ରେଣ୍ଡ ସୃଷ୍ଟି କରିବ । ଚାନେଲ୍ ର ଲୋକାର୍ପଣ ଉତ୍ସବରେ ଏହି ବିଶ୍ୱାସ ଦେଇଛନ୍ତି ଏହାର ସମ୍ପାଦକ ଶିଶିର କୁମାର ଭଟ୍ଟମିଶ୍ର ଏବଂ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ(ସିଇଓ) ଜବର ସିଂ ତନୱାର୍ । ଖାଲି ସେତିକି ନୁହେଁ, ମିଛ ଟିଆରପି ଦୌଡ଼ରୁ ‘ନନ୍ଦିଘୋଷ’ କୁ ପୃଥକ୍ ରଖାଯିବ ବୋଲି ସେମାନେ କହିଛନ୍ତି ।

ସେପଟେ ଟିଆରପି ବା ଦର୍ଶକଙ୍କ ଆଦୃତି ଦୃଷ୍ଟିକୋଣରୁ ପ୍ରମୁଖ ଚାନେଲ୍ ମଧ୍ୟରେ ପ୍ରତିଯୋଗିତା ରୋଚକ ସ୍ଥିତିରେ ପହଞ୍ଚିଛି । ଓଟିଭି ଏକ ନମ୍ବର ସ୍ଥାନ ବଜାୟ ରଖିଥିବା ବେଳେ ଏବେ ଦ୍ୱିତୀୟ ସ୍ଥାନରେ ପହଞ୍ଚିଛି କଳିଙ୍ଗ ଟିଭି । ତୃତୀୟ ସ୍ଥାନରେ କନକ ନ୍ୟୁଜ୍ ରହିଛି । ପୂର୍ବରୁ ବରାବର ସ୍ଥିତିରେ ରହିଥିବା କଳିଙ୍ଗ ଓ କନକ ମଧ୍ୟରେ ଏବେ ଦୂରତା ବଢ଼ିଯାଇଛି । କ୍ରମାଗତ ଚତୁର୍ଥ ସପ୍ତାହ ଲାଗି କନକ ନ୍ୟୁଜ୍ କୁ ପଛରେ ପକାଇଛି କଳିଙ୍ଗ ଟିଭି । ଏଥର ଖାଲି ପଛରେ ପକାଇନି, ବରଂ ବ୍ୟବଧାନ ବହୁ ମାତ୍ରାରେ ବଢ଼େଇ ଦେଇଛି ।

 ଗତସପ୍ତାହର ଟିଆରପି ରେଟିଂ ଆଜି ଆସିଛି । ବାର୍କ ର ସମୁଦାୟ ଦର୍ଶକ(ନମୁନା) ମଧ୍ୟରୁ ଓଟିଭିକୁ ୧୦୬.୩୯% ଦର୍ଶକ ଦେଖିଥିଲା ବେଳେ କଳିଙ୍ଗ ଟିଭିକୁ ୪୨.୨୩% ଦର୍ଶକ ଏବଂ କନକ ନ୍ୟୁଜ୍ ୨୬.୪୮% ଦର୍ଶକ ଦେଖିଛନ୍ତି । ୧୫+ ବର୍ଗ ମଧ୍ୟରେ ଓଟିଭିକୁ ୧୨୦.୪୯% ଦର୍ଶକ, କଳିଙ୍ଗ ଟିଭିକୁ ୪୭.୪୪% ଦର୍ଶକ ଏବଂ କନକ ନ୍ୟୁଜ୍ ୨୯.୬୦% ଦର୍ଶକ ଦେଖିଛନ୍ତି । ଦର୍ଶକ ସଂଖ୍ୟା ଦେଖିଲେ, ଓଟିଭିକୁ ୨,୫୭, ୦୫, ୦୦୦ ଦର୍ଶକ, କଳିଙ୍ଗ ଟିଭିକୁ ୧,୦୨, ୦୪,୦୦୦ ଏବଂ କନକ ନ୍ୟୁଜ୍ କୁ ୬୩,୯,୦୦୦ ଦର୍ଶକ ଦେଖିଛନ୍ତି । ତାଲିକାରେ ନ୍ୟୁଜ୍ ୧୮ ଓଡ଼ିଆ ଚତୁର୍ଥ ସ୍ଥାନ ଏବଂ ନ୍ୟୁଜ୍ ୭ ପଞ୍ଚମ ସ୍ଥାନରେ ଅଛି ।

ଟିଆରପିକୁ ନେଇ ପ୍ରମୁଖ ଓଡ଼ିଆ ଟିଭି ଚାନେଲ୍ ଗୁଡ଼ିକ ମଧ୍ୟରେ ପ୍ରତିଯୋଗିତା ଜୋର ଚାଲିଥିବା ବେଳେ ଅତ୍ୟାଧୁନିକ ଜ୍ଞାନକୌଶଳ ଏବଂ ଭିନ୍ନ ଛାପର ପ୍ରତିଶ୍ରୁତି ସହ ମାର୍କେଟ୍ କୁ ଆସିଛି ‘ନନ୍ଦିଘୋଷ’ ଟିଭି । ବିନା ପ୍ରତିଯୋଗିତାରେ ଚାନେଲ୍ କୁ ନିଜସ୍ୱ ଶୈଳୀରେ ଶୀର୍ଷରେ ପହଞ୍ଚାଇବାର ଲକ୍ଷ୍ୟକୁ ସେମାନେ କିଭଳି ପୂରଣ କରୁଛନ୍ତି ତାହାକୁ ଏବେ ଦର୍ଶକଙ୍କ ଅପେକ୍ଷା ।