ଭୁବନେଶ୍ୱର: ସୋମବାର ଖୋଲିବ ମଦ ଦୋକାନ । କରୋନା ଯୋଗୁଁ ସାରା ଦେଶକୁ 3 ପ୍ରକାର ରଙ୍ଗୀନ ଜୋନରେ ବିଭକ୍ତ କରାଯାଇଥିବା ବେଳେ କେବଳ ଗ୍ରୀନ୍ ଜୋନରେ ମଦ ବିକ୍ରି ହେବ ବୋଲି କେନ୍ଦ୍ର ଗୃହ ମନ୍ତ୍ରଣାଳୟ ଶୁକ୍ରବାର ଅନୁମତି ଦେଇଥିଲେ । ତେବେ ମଦରେ ଏଭଳି ପାତର ଅନ୍ତରକୁ ସହ୍ୟ କରିପାରି ନାହାନ୍ତି ରାଜ୍ୟ ସରକାର ଗୁଡ଼ିକ । ଫଳରେ କେନ୍ଦ୍ର ସରକାର ବାଧ୍ୟ ହୋଇ ସବୁ ଜୋନରେ ମଦ ବିକ୍ରି ପାଇଁ ସାନି ଅନୁମତି ଦେଇଛନ୍ତି । ଗ୍ରୀନ୍ ଏବଂ ଅରେଞ୍ଜ ଜୋନରେ ସ୍ୱାଭାବିକ ଭାବେ ବିକ୍ରି ହେବ ନାଲିପାଣି ।
ରେଡ୍ ଜୋନରେ କେବଳ ଷ୍ଟାଣ୍ଡ ଏଲୋନ୍ ବା ପୃଥକ ଭାବେ ଥିବା ଦୋକାନ ଅର୍ଥାତ୍ ଅଫ୍ ସପ୍ କୁ ହିଁ ଅନୁମତି ମିଳିଛି । କିନ୍ତୁ ରେଡ୍ ଜୋନର କଣ୍ଟେନମେଣ୍ଟ ଜୋନ୍ ପାଇଁ ମଦ ସମ୍ପୂର୍ଣ୍ଣ ନିଷିଦ୍ଧ ରହିଛି । ତେବେ ମଦ ବିକ୍ରି ପୂର୍ବରୁ ଆମ ରାଜ୍ୟରେ ଭିନ୍ନ ଆଭାସ ଦେଖିବାକୁ ମିଳିଛି । ଲୋକଙ୍କ ଜୀବନ ଓ ସାମାଜିକ ଶୃଙ୍ଖଳକୁ ବରବାଦ୍ କରି କୋଟି କୋଟି ଟଙ୍କା ମୁନାଫା କମାଉଥିବା ମଦ ବେପାରୀଙ୍କର ଜ୍ଞାନ ଉଦୟ ହୋଇଛି । ସେମାନଙ୍କର କ୍ଷତି ହେଉ ପଛେ, ସରକାର ଆଉ 15 ଦିନ ମଦ ଦୋକାନ ବନ୍ଦ ରଖନ୍ତୁ ବୋଲି ସେମାନେ ଦାବି କରିଛନ୍ତି । ମଦ୍ୟ ପାନ ସ୍ୱାସ୍ଥ୍ୟ ପକ୍ଷେ କ୍ଷତିକାରକ ବୋଲି ଦୋକାନ ଆଗରେ ବଡ଼ ବଡ଼ ଅକ୍ଷରରେ ଲେଖି ସ୍ଲୋ ପଏଜନ୍ ବିକୁଥିବା ଏ ବେପାରୀମାନେ କେବେ ଠାରୁ ସମାଜର ମଙ୍ଗଳ ଚିନ୍ତା କଲେଣି ?
ମାର୍ଚ୍ଚ 25ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପ୍ରଥମ ପର୍ଯ୍ୟାୟ ଲକ୍ ଡାଉନ୍ ଘୋଷଣା କରିବା ପରେ ସାରା ଦେଶରେ ମଦ ଦୋକାନରେ ସଟର୍ ପଡ଼ିଲା । ଗଚ୍ଛିତ ମଦର ପରିମାଣ ହିସାବ କରି ଅବକାରୀ ବିଭାଗ ଦୋକାନରେ ଜଉ ମୁଦ ଲଗାଇଛି । କିନ୍ତୁ ଦୋକାନ ଭିତରେ ଖାଲି ଖୋଳ ଅଛି ସିନା, ମଦ ନାହିଁ । ଲକ୍ ଡାଉନ୍ ସମୟରେ 3-4 ଗୁଣା ଅଧିକ ଦାମରେ ସବୁ ମାଲ୍ ବିକି ଦେଇଛନ୍ତି ବେପାରୀ । ତେଣୁ ବର୍ତ୍ତମାନ ସେମାନଙ୍କ ପାଖରେ ଆଦୌ ଷ୍ଟକ୍ ନଥିବା ବେଳେ ଅସମ୍ଭବ ଭିଡ଼ ହେବା ମଧ୍ୟ ସମ୍ଭାବନା ରହୁଛି । ଯେଉଁଥି ପାଇଁ ସେମାନେ ସମାଜ ମଙ୍ଗଳର ବାହାନା ଆପଣାଇଥିବା କୁହାଯାଉଛି । ସେପଟେ କିଛି ମଦ ବେପାରୀ ଭିନ୍ନ ଯୋଜନାରେ ଅଛନ୍ତି । ଦୁର୍ବୃତ୍ତମାନେ ସେମାନଙ୍କ ଦୋକାନର ପଛ ତାଡ଼ି ସବୁ ମଦ ଚୋରି କରି ନେଇଥିବା, ଥାନାରେ ଏତଲା ଦେବାକୁ ସେମାନେ ପ୍ରସ୍ତୁତ ହୋଇଗଲେଣି ।
ଲକ୍ ଡାଉନ୍ ବେଳେ ମଦର ବ୍ୟାପକ କଳାବଜାରୀ ନେଇ ବରିଷ୍ଠ କଂଗ୍ରେସ ନେତା ତଥା ଜୟପୁର ବିଧାୟକ ତାରାପ୍ରସାଦ ବାହିନୀପତି ଆପତ୍ତି ଉଠାଇଥିଲେ । ସରକାର, ଯଦି କଳାବଜାରୀ ସମ୍ପୂର୍ଣ୍ଣ ରୋକିପାରୁ ନାହାନ୍ତି, ତେବେ ରାଜ୍ୟରେ ମଦ ବିକ୍ରି ନିଷିଦ୍ଧ କରି ଅଯଥା ରାଜସ୍ୱ ନହରାନ୍ତୁ ବୋଲି ତାରା କହିଥିଲେ । ଏପରିକି ଅବକାରୀ ବିଭାଗର ସ୍ୱତନ୍ତ୍ର ସ୍କ୍ୱାଡ୍ ଦ୍ୱାରା ଦୋକାନରେ ଗଚ୍ଛିତ ମଦର ପରିମାଣ ଯାଞ୍ଚ କରାଇବାକୁ ସରକାରଙ୍କୁ ଚ୍ୟାଲେଞ୍ଜ ଦେଇଥିଲେ । ତାରାଙ୍କ ଅନୁମାନ ଏବେ ସତ ଲାଗୁଥିବା ବେଳେ ମଦ ବେପାରୀଙ୍କ ସମାଜ ମଙ୍ଗଳ ଚିନ୍ତାଧାରା ନିଶ୍ଚିତ ରୂପେ ସନ୍ଦେହରେ ।
(ବରେନ୍ଦ୍ର କୃଷ୍ଣ ସାହୁଙ୍କ ରିପୋର୍ଟ)
