ଭୁବନେଶ୍ୱର: ‘ହିଂଜିଳିରେ ଭିତ୍ତିଭୂମିର ବିକାଶ ହୋଇନଥିବାରୁ ଲୋକେ ବିମୁଖ ଅଛନ୍ତି । କାଳିଆରେ ମନଇଚ୍ଛା କାରବାର ନେଇ ଚାଷୀମାନେ ଅସନ୍ତୁଷ୍ଟ ଅଛନ୍ତି । ବାତ୍ୟା ପରବର୍ତ୍ତୀ ସହାୟତା କେବଳ ବିଜେଡ଼ି କର୍ମୀଙ୍କୁ ମିଳିଛି । ତେଣୁ ହିଂଜିଳିରେ ମୁଖ୍ୟମନ୍ତ୍ରୀ ନିର୍ବାଚନ ଲଢ଼ିବା ସେଫ୍ ନୁହେଁ । ରାଉରକେଲା, ବିଜେପୁର, ବଲାଙ୍ଗୀର, ଟିଟିଲାଗଡ଼ ଭିତରୁ କୋଉଥିରେ ଗୋଟେ ମୁଖ୍ୟମନ୍ତ୍ରୀ ଲଢ଼ିବା ଠିକ୍ ହେବ ।’
ରାଜ୍ୟ ଗୁଇନ୍ଦା ବିଭାଗର ସ୍ୱତନ୍ତ୍ର ଡିଜିଙ୍କ ଦସ୍ତଖତରେ ଏମିତି ଲେଖାହୋଇଥିବା ଏକ ଚିଠି ଧରି ବିଜେପି ଯୁବମୋର୍ଚ୍ଚା ସଭାପତି ଟଙ୍କଧର ତ୍ରିପାଠୀ ଆଜି(ସୋମବାର) ଏକ ପ୍ରେସମିଟ୍ କରିଥିଲେ । ପ୍ରେସମିଟ୍ ଠିକ୍ ସଂଧ୍ୟା ୭ଟା ସମୟକୁ ଧାର୍ଯ୍ୟ କରାଯାଇଥିଲା । ସେଇ ସମୟଟି ହେଉଛି ଟିଭି ଚାନେଲମାନଙ୍କର ପ୍ରାଇମ୍ ବୁଲେଟିନ୍ ଟାଇମ୍ । ରାଜ୍ୟର ପ୍ରମୁଖ ଚାନେଲ ଓଟିଭି ବୁଲେଟିନ୍ ଆରମ୍ଭରୁ ହେଡଲାଇନ୍ ଛୁଇଁଦେଇ ସିଧା ପଳାଇଲା ବିଜେପି ଅଫିସ । ସେଠାରୁ ଲାଇଭ୍ କଲା ଟଙ୍କଧର ତ୍ରିପାଠୀଙ୍କ ପ୍ରେସମିଟ୍ । ଖାଲି ସେତିକି ନୁହେଁ, ଆଗରୁ ବ୍ରେକିଂ ଲାଇନ୍ ଲେଖା ସରିଥିଲା । ଟିଭିରେ ଲାଇଭ୍ ଆରମ୍ଭ ହେଲାମାତ୍ରେ ୭/୮ ଲାଇନ୍ ର ବ୍ରେକିଂ ବି ପଡ଼ିଗଲା ।
ଓଟିଭି ଭଳି ବଡ଼ ଚାନେଲ୍ ର ୭ଟା ‘ପ୍ରତିଦିନ’ ଖବର ଆରମ୍ଭରେ ଟଙ୍କଧର ତ୍ରିପାଠୀଙ୍କ ପ୍ରେସମିଟ୍ ର ଲାଇଭ୍ ବେଶ କୌତୁହଳୀ ଥିଲା । କାରଣ ବିଜେପି ପ୍ରେସମିଟ୍ ରେ ତାଙ୍କର ମୁଖପାତ୍ର ବସି ନ ଥିଲେ । ବିନା ମୁଖପାତ୍ର କି ଦଳର ଅନ୍ୟ କୌଣସି ବଡ଼ନେତାଙ୍କୁ ନ ଛାଡ଼ି ବିଜେପି ଟଙ୍କ ତ୍ରିପାଠୀଙ୍କୁ ବସାଇଥିଲା ପ୍ରେସମିଟ୍ ରେ । ଆଉ ଓଟିଭି ତାହା ଲାଇଭ୍ କରିବାକୁ ବ୍ୟାକୁଳ ହୋଇପଡ଼ିଥିଲା ।ସେ ଯାହା ହେଉ, ଟଙ୍କଧର ବାବୁ ଗୁଇନ୍ଦା ବିଭାଗ ସ୍ୱତନ୍ତ୍ର ଡିଜିଙ୍କ ଦସ୍ତଖତ ଥିବା ଯେଉଁ କାଗଜଟି ଦେଖାଉଥିଲେ ତାହାର ବିଷୟବସ୍ତୁ ସ୍ପର୍ଶକାତର ଥିଲା । ଟଙ୍କଧର ବାବୁ କାଗଜଟି ସୋସିଆଲ୍ ମିଡ଼ିଆରୁ ପାଇଥିବା କହୁଥିଲେ । ତାଙ୍କର କହିବା କଥା, ଆଜି ସକାଳୁ ସୋସିଆଲ୍ ମିଡ଼ିଆରେ କାଗଜଟି ବୁଲୁଛି । ସେ ଜାଣିନାହାନ୍ତି ଚିଠିଟି ସତ ଚିଠି ନା ମିଛ ଚିଠି । କିନ୍ତୁ ତାଙ୍କ ପ୍ରେସମିଟ୍ ଓ ପୂର୍ବପ୍ରସ୍ତୁତ ଟିଭି ପ୍ରଚାରରୁ ଲାଗୁଥିଲା ସତେ ଯେମିତି ଚିଠିଟି ନିରାଟ ସତ ।
