ଭୁବନେଶ୍ୱର: ମିଡ଼ିଆ ଯେଉଁଠି ଚେକ୍ ଲଗାଇବା କଥା, ଏବେ ତାହା ଉପରେ ନିର୍ଭରଶୀଳ । ସରକାର, କର୍ପୋରେଟ୍ ହାଉସ୍ ମାନଙ୍କର ଅନୁଗ୍ରହ ଉପରେ ମିଡ଼ିଆ ନିର୍ଭର କରୁଛି । ତେଣୁ ବର୍ତ୍ତମାନ ସ୍ଥିତିରେ ମିଡ଼ିଆଠାରୁ ନିରପେକ୍ଷ ସମ୍ବାଦ ଆଶା କରାଯାଇପାରିବନି । ପ୍ରିଣ୍ଟ ମିଡ଼ିଆଠାରୁ ଟିଭି ମିଡ଼ିଆରେ ଏହି ଟ୍ରେଣ୍ଡ ବହୁତ ଅଧିକା । ଏଠି ନିଉଜ୍ କମ୍, ଭିଉଜ୍ ଅଧିକା । ଗଣତନ୍ତ୍ରରେ ତଥାକଥିତ ଚତୁର୍ଥ ସ୍ତମ୍ଭର ଏଭଳି ଭୂମିକା ଭାରତ ପାଇଁ ସାଂଘାତିକ ବିପଦ ସୃଷ୍ଟି କରିଛି । ମିଡ଼ିଆର ବ୍ୟବସାୟୀକରଣ ବନ୍ଦ ନହେଲେ ଗଣତନ୍ତ୍ର ବଞ୍ଚିବା ସମ୍ଭବ ନୁହେଁ । ଆଜି କଳିଙ୍ଗ ଟିଭିର ପଞ୍ଚମ ବାର୍ଷିକୀ ଉତ୍ସବରେ ମୁଖ୍ୟବକ୍ତା ଭାବେ ଯୋଗଦେଇ ଏଭଳି ରୋକଠୋକ୍ ମତ ଦେଇଛନ୍ତି ଦେଶର ଖ୍ୟାତାନାମା ସାମ୍ବାଦିକ ପ୍ରଭୁ ଚାୱାଲା ।
‘ଗଣତନ୍ତ୍ରରେ ଗଣମାଧ୍ୟମର ଭୂମିକା’ ଉପରେ ଆଲୋଚନା କରି ଶ୍ରୀ ଚାୱାଲା ଭାରତର ସାଂମ୍ପ୍ରତିକ ସ୍ଥିତିର ଅବତାରଣା କରିଥିଲେ । ଗଣତନ୍ତ୍ରର ତିନୋଟି ସ୍ତମ୍ଭ ବ୍ୟବସ୍ଥାପକ(ଲେଜିସଲେଚର), କାର୍ଯ୍ୟନିର୍ବାହୀ(ଏକଜ୍ୟୁଟିଭ୍) ଏବଂ ବିଚାର ବିଭାଗ(ଜୁଡ଼ିସିଆରି) ଏବେ ଦୁର୍ବଳ ହୋଇଯାଇଛି । ଆମର ସାମ୍ବିଧାନିକ ବ୍ୟବସ୍ଥା ଏଭଳି ସ୍ଥିତିକୁ ଡାକିଆଣିଛି । ବ୍ୟବସ୍ଥାପକ ସଭା ପାର୍ଲାମେଣ୍ଟ ଏବଂ ବିଧାନସଭାରେ ଗୃହର ନେତା ହେଉଛନ୍ତି ପ୍ରଧାନମନ୍ତ୍ରୀ ଏବଂ ମୁଖ୍ୟମନ୍ତ୍ରୀ । ପ୍ରଧାନମନ୍ତ୍ରୀ ଓ ମୁଖ୍ୟମନ୍ତ୍ରୀ ହେଉଛନ୍ତି ପ୍ରଶାସନର ମୁଖ୍ୟ । ତେଣୁ କାର୍ଯ୍ୟନିର୍ବାହୀ ସଂସ୍ଥା ଉପରେ ବ୍ୟବସ୍ଥାପକ ସଭା ଚେକ୍ ଲଗାଇବା ସମ୍ଭବ ନୁହେଁ । କଥା ଛଳରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉଦାହରଣ ଦେଇଥିଲେ । ଜଣେ ବହୁତ କହି କହି ଦେଶର ପ୍ରଧାନମନ୍ତ୍ରୀ ହୋଇଛନ୍ତି । କିନ୍ତୁ ଜଣେ କିଛି ନ କହି ଓଡ଼ିଶାର ମୁଖ୍ୟମନ୍ତ୍ରୀ ହୋଇଛନ୍ତି । ଭାରତବର୍ଷରେ ନବୀନ ପଟ୍ଟନାୟକ ଏକମାତ୍ର ନେତା ଯିଏ ଖୁବ କମ କଥା କହି ବହୁତ ଭୋଟ ପାଉଛନ୍ତି ଏବଂ ଲମ୍ବା ସମୟ ଶାସନଗାଦିରେ ବସିଛନ୍ତି । ଯେଉଁ ନେତା କଥା କହନ୍ତି ନାହିଁ ତାଙ୍କୁ ଚେକ୍ ଦେବେ କେମିତି ବୋଲି ଶ୍ରୀ ଚାୱାଲା ପରିହାସ କରିଥିଲେ । ଭାରତବର୍ଷରେ ଗଣତନ୍ତ୍ରର ତିନିଟି ଯାକ ସ୍ତମ୍ଭ(ପିଲାର୍)ର ଅବକ୍ଷୟ ହୋଇଥିବାରୁ ସେ ଉଦବେଗ ପ୍ରକାଶ କରି କହିଥିଲେ, ଆମର ଗଣତନ୍ତ୍ର ଏବେ ବିନା ସ୍ତମ୍ଭରେ ଶୂନ୍ୟରେ ଝୁଲିଛି ।
ଗଣମାଧ୍ୟମର ସ୍ଥିତି ସମ୍ପର୍କରେ ସେ କହିଥିଲେ, ତଥାକଥିତ ଚତୁର୍ଥ ସ୍ତମ୍ଭ ଉପରୁ ଲୋକଙ୍କ ଭରସା ତୁଟିଯାଇଛି । ମିଡ଼ିଆର ଧର୍ମ ସତ୍ୟ ପଦାକୁ ଆଣିବା । ଯାହା ଖବର ତାହାକୁ ପ୍ରକାଶ କରିବା । ମାତ୍ର ମିଡ଼ିଆ ଯାହାକୁ ପ୍ରଶ୍ନ କରି ଚେକ୍ ଲଗାଇବା କଥା, ତାହା ଉପରେ ନିର୍ଭର କରିବାକୁ ପଡୁଛି । ଖବର ପ୍ରସାରଣ ବ୍ୟୟବହୁଳ ହୋଇଯାଇଛି । ପେପର୍ ଖଣ୍ଡିକର ଖର୍ଚ୍ଚ ୧୫/୧୬ ଟଙ୍କା ପଡୁଥିବା ବେଳେ ତାହାକୁ ଗ୍ରାହକ ୪ ଟଙ୍କାରେ କିଣୁଛନ୍ତି । ପାଠକମାନେ ଖବରକାଗଜର ମୂଲ୍ୟ ଦେବାକୁ ପ୍ରସ୍ତୁତ ନ ଥିବାରୁ ଏଭଳି ସମସ୍ୟା ଉପୁଜିଛି । ସତୁରି ଓ ଅଶୀ ଦଶକରେ ଏଭଳି ଅବସ୍ଥା ନ ଥିଲା । ସେହିଭଳି ଟିଭି ଖବର ପ୍ରସାରଣରେ ବି ଅନୁରୂପ ଅବସ୍ଥା ।
ଏଭଳି ପ୍ରତିକୂଳ ସ୍ଥିତିରେ ବି ୮୦/୯୦ ଭାଗ ଖବରକାଗଜ ସାମ୍ବାଦିକତାର ଧର୍ମ ରଖିଛନ୍ତି । ମାତ୍ର ଇଲେକ୍ଟ୍ରୋନିକ୍ସ ମିଡ଼ିଆ ସାମ୍ବାଦିକତାର ଧର୍ମ ରଖିନାହିଁ । ବ୍ୟକ୍ତିଗତ ଏଜେଣ୍ଡାରେ କାମ ହେଉଛି । ପ୍ରକୃତରେ ଯାହାଙ୍କୁ ପ୍ରଶ୍ନ ପଚରାଯିବା କଥା ପଚରାଯାଉନି । ନିଉଜ୍ ରୁମ୍ ରେ ନିଉଜ୍ ଉପରେ ଆଲୋଚନା ନ ହୋଇ ଭିଉଜ୍ ଉପରେ ଚର୍ଚ୍ଚା ହେଉଛି । ପ୍ୟାନେଲିଷ୍ଟଙ୍କୁ ଡାକି ସେମାନଙ୍କ ଭିଉଜ୍ ଉପରେ ତର୍କବିତର୍କ, ହୋ ହଲ୍ଲା କରାଯାଇ ଲୋକଙ୍କୁ ଭକୁଆ ବନାଯାଉଛି । ମିଡ଼ିଆ ତାର ଉତ୍ତର ଦାୟିତ୍ୱରୁ ଦୂରେଇ ଯାଉଛି । ଏହା ଗଣତନ୍ତ୍ର ପ୍ରତି ବିପଦ ସୃଷ୍ଟି କରିଛି ବୋଲି ଶ୍ରୀ ଚାୱାଲା କହିଥିଲେ ।
ତେବେ ଏକ ସୁସ୍ଥ ଗଣତନ୍ତ୍ର ପାଇଁ ଗଣମାଧ୍ୟମର ଭୂମିକାକୁ ଅସ୍ୱୀକାର କରାଯାଇପାରିବନି । ସାମ୍ବାଦିକତାର ଧର୍ମରୁ ସାମ୍ବାଦିକ ହଟିବା ଉଚିତ୍ ନୁହେଁ । ଯାହା ସତ୍ୟ ସେହି ଖବର ଲୋକଙ୍କୁ ଜଣାଇବା ଦରକାର । ତେଣିକି ଯାହା ପରିଣାମ ହେଉ ନା କାହିଁକି । ପାଠକଙ୍କ ପ୍ରତି ସାମ୍ବାଦିକ ବଫାଦାର ହେଲେ ଯାଇ ଗଣତନ୍ତ୍ର ସୁଦୃଢ଼ ହୋଇପାରିବ ବୋଲି ଶ୍ରୀ ଚାୱାଲା ମତ ଦେଇଥିଲେ । ଏହି ଅବସରରେ କଳିଙ୍ଗ ଟିଭି ତଥା କିଟ୍ ଓ କିସ୍ ର ପ୍ରତିଷ୍ଠାତା ଡ. ଅଚ୍ୟୁତ ସାମନ୍ତଙ୍କର ସେ ଭୂରି ଭୂରି ପ୍ରଶଂସା କରିଥିଲେ । ତାଙ୍କର ନିଷ୍ଠାପର କାର୍ଯ୍ୟ ପାଇଁ ସମଗ୍ର ଭାରତବର୍ଷରେ ସେ ଆଦର୍ଶ ସୃଷ୍ଟି କରିପାରିଛନ୍ତି ବୋଲି କହିଥିଲେ ।
