ଭୁବନେଶ୍ୱର: କଳିଙ୍ଗ ଷ୍ଟାଡିୟମ୍ ରେ ଆଜି ଭାରତ ଓ ନେଦରଲାଣ୍ଡସ୍ ମଧ୍ୟରେ ଅନୁଷ୍ଠିତ ବିଶ୍ୱକପ୍ କ୍ୱାଟର ଫାଇନାଲ୍ ମ୍ୟାଚ୍ ର ମଜା ନେଇଥିଲେ ୩୦ ଜଣ ପୁରୁଣା ହାର୍ଡକୋର ମାଓବାଦୀ । ତାହା ପୁଣି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଗହଣରେ । ମୁଖ୍ୟମନ୍ତ୍ରୀଙ୍କ ସହ ହ୍ୟାଣ୍ଡସେକ୍ କରିବା ସହ କଥା ବି ହୋଇଥିଲେ । କଳିଙ୍ଗ ଷ୍ଟାଡିୟମ୍ ରେ ଏଭଳି ସୁଯୋଗ ମିଳିଥିବାରୁ ସେମାନେ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇ ଖୁସିରେ ଗଦ ଗଦ ହୋଇପଡ଼ିଥିଲେ । ‘ବାସ୍ତବରେ ଆଜି ଆମେ ନିଜକୁ ସମାଜ ମୁଖ୍ୟସ୍ରୋତର ଅଙ୍ଗ ବୋଲି ମନେକରୁଛୁ’ ବୋଲି ସେମାନଙ୍କ ମଧ୍ୟରୁ ଅଧିକାଂଶ ଭାବବିହ୍ୱଳିତ ହୋଇ କହିଥିଲେ ।
ନିକଟରେ ପୁଲିସ ନିକଟରେ ଆତ୍ମସମର୍ପଣ କରି ମାଓ ଚେହେରା ବଦଳାଇଥିବା ଏହି ୩୦ ଜଣଙ୍କ ମଧ୍ୟରେ ୧୫ ଜଣ ମହିଳା ଅଛନ୍ତି । ରାଜ୍ୟ ସରକାରଙ୍କ ଥଇଥାନ ଯୋଜନାରୁ ଉପକୃତ ପାଇ ସେମାନେ ସମାଜର ମୁଖ୍ୟସ୍ରୋତରେ ସାମିଲ ହୋଇସାରିଛନ୍ତି । ସୁଦୂର ମାଲକାନଗିରି ଓ କୋରାପୁଟ ଜିଲ୍ଲାର ସଂପୃକ୍ତ ଅଧିବାସୀମାନେ ବିଶ୍ୱକପ୍ ହକି ଦେଖିବାକୁ ମନରେ ଇଚ୍ଛା ବାନ୍ଧିଥିଲେ । ଆଉ ସେମାନଙ୍କ ଇଚ୍ଛାକୁ ସାକାର କରିବାକୁ ଆଗେଇ ଆସିଥିଲେ ମାଲକାନଗିରି ଏସପି । ରାଜ୍ୟ ସରକାର ଏଥିପାଇଁ ସମ୍ପୂର୍ଣ୍ଣ ସହଯୋଗ କରିଥିଲେ । ଆଜି କଳିଙ୍ଗ ଷ୍ଟାଡିୟମ୍ ରେ ସେମାନଙ୍କ ସହ ବିଶ୍ୱକପ୍ ହକି ଦେଖିବାକୁ ମୁଖ୍ୟମନ୍ତ୍ରୀ ବି ଆଗ୍ରହ ପ୍ରକାଶ କରିଥିଲେ ।
