ମୃତ ସରକାରୀ କର୍ମଚାରୀଙ୍କ ପରିବାରର ଜଣଙ୍କୁ ଚାକିରି ମିଳିବା ସମ୍ଭାବନା ଉଜ୍ଜଳ

୯ଟି ପ୍ରସ୍ତାବକୁ କ୍ୟାବିନେଟ୍ ମଂଜୁରୀ

ଭୁବନେଶ୍ୱର: ସରକାରୀ ଚାକିରିରେ ଥାଇ ମୃତ୍ୟୁବରଣ କରୁଥିବା କର୍ମଚାରୀଙ୍କ ପରିବାରର ଜଣଙ୍କୁ ତୃତୀୟ କିମ୍ବା ଚତୁର୍ଥ ଶ୍ରେଣୀ ପଦବୀରେ ଅନୁକମ୍ପାମୂଳକ ନିଯୁକ୍ତି ଦେବାକୁ ଓଡ଼ିଶା ସିଭିଲ୍ ସର୍ଭିସ୍ (ରିହାବିଲିଟେସନ୍ ଆସିଷ୍ଟାଣ୍ଟ)ରୁଲ୍, ୧୯୯୦ରେ ବ୍ୟବସ୍ଥା ରହିଛି । ମାତ୍ର ମୂଳ ପଦବୀର ଖାଲି ଥିବା ୧୦ ପ୍ରତିଶତ ପଦବୀରେ ଏହି ନିଯୁକ୍ତି ବ୍ୟବସ୍ଥା ଥିବାରୁ ବହୁ ଆବେଦନକାରୀ ଚାକିରି ପାଇବାରୁ ବଞ୍ଚିତ ହେଉଥିଲେ । ରାଜ୍ୟ ସରକାର ଏହି ପ୍ରତିବନ୍ଧକୁ ଉଠାଇ ଦେଇଛନ୍ତି । ଏଣିକି ତୃତୀୟ ଓ ଚତୁର୍ଥ ଶ୍ରେଣୀ ମୂଳ ପଦବୀର ଖାଲି ଥିବା ୫୦ ପ୍ରତିଶତ ପଦବୀରେ ଅନୁକମ୍ପା ନିଯୁକ୍ତି ଦିଆଯିବ । ଏଥି ନିମନ୍ତେ ଆଇନରେ ସଂଶୋଧନ କରାଯାଇ ଓଡ଼ିଶା ସର୍ଭିସ୍ ରୁଲ୍ (ରିହାବିଲିଟେସନ୍ ଆସିଷ୍ଟାଣ୍ଟ) ରୁଲ୍ ,୨୦୨୦ ପ୍ରଣୟନ କରାଯାଇଛି ।

ଆଜି ରାଜ୍ୟ କ୍ୟବିନେଟ୍ ବୈଠକରେ ଏହା ଅନୁମୋଦିତ ହୋଇଛି । ଅନ୍ୟ ଏକ ନିଷ୍ପତ୍ତିରେ ଓଡ଼ିଶା ସର୍ଭିସ୍ ରୁଲ୍,୨୦୦୩ କୁ ସଂଶୋଧନ କରାଯାଇ ଓଡ଼ିଶା ସିଭିଲ୍ ସର୍ଭିସ୍ (ନିଯୁକ୍ତି ଏବଂ ପଦୋନ୍ନତି ଚୟନର ମାନଦଣ୍ଡ) ସଂଶୋଧିତ ନିୟମାବଳୀ,୨୦୦୯ ର ପ୍ରଣୟନ କରାଯାଇଛି । ଏହି ନୂତନ ବ୍ୟବସ୍ଥାରେ ନିୟମ-୪ର ଉପନିୟମ-୨ ଅନୁଯାୟୀ ସେହି ବର୍ଷର ପ୍ରତ୍ୟାଶାମୂଳକ ଖାଲି ପଡ଼ିଥିବା ପଦୋନ୍ନତି ପଦବୀର ସମାନ ବ୍ୟକ୍ତିଙ୍କୁ ତାଲିକାରେ ଅନ୍ତର୍ଭୁକ୍ତ କରାଯିବ । ପୂର୍ବରୁ ୧.୨୫ ଗୁଣା ବ୍ୟକ୍ତିଙ୍କୁ ତାଲିକାରେ ଅର୍ନ୍ତଭୁକ୍ତ କରିବାର ବ୍ୟବସ୍ଥା ଥିଲା ।

ଉପରୋକ୍ତ ପ୍ରସ୍ତାବ ସହ ଆଜି ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ରାଜ୍ୟ କ୍ୟବିନେଟ୍ ବୈଠକରେ ସମୁଦାୟ ୯ଟି ପ୍ରସ୍ତାବକୁ ମଂଜୁର ମିଳିଛି । ସେଥିମଧ୍ୟରେ ଓଡ଼ିଶା ଖଣି ନିଗମର ଯାନ୍ତ୍ରିକ ଖଣିଜ ଉତ୍ତୋଳନ ବ୍ୟବସ୍ଥାରେ ଥିବା ଦୀର୍ଘ କାଳୀନ ଲିଙ୍କେଜ୍ ପଲିସି ରେ ପରିବର୍ତ୍ତନ ଭଳି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ରହିଛି ।

– ଓଡ଼ିଶା ଖଣି ନିଗମ ଲିଃ ସହ ଦୀର୍ଘ ମିଆଦି ସଂଯୋଗରେ ଥିବା ଯେଉଁ କ୍ରେତାମାନେ ଯାନ୍ତ୍ରିକ ଖଣିଜ ଉତ୍ତୋଳନ ବ୍ୟବସ୍ଥାରେ ପୁଞ୍ଜି ବିନିଯୋଗ କରିବା ପାଇଁ ଇଚ୍ଛୁକ, ସେହିମାନେ ୫ ବର୍ଷରୁ ଉଦ୍ଦ୍ୱର୍ ଦୀର୍ଘ ମିଆଦୀ ଖଣିଜ ଯୋଗାଣ ଚୁକ୍ତି କରିବା ପାଇଁ ଉପଯୁକ୍ତ ବିବେଚିତ ହେବେ । ଏହାଦ୍ୱାରା ଓଡ଼ିଶା ଖଣି ନିଗମ ଜରିଆରେ ଅଧିକ ଖଣିଜ ଉତ୍ତୋଳନ ହେବ । ଅନ୍ୟପକ୍ଷରେ, ଯେଉଁ ଖଣି ପଟ୍ଟାଧାରୀମାନଙ୍କର କ୍ରୋମ ଖଣିପଟ୍ଟା ଅଛି, ସେମାନଙ୍କୁ ଜାତୀୟ ଇ-ଖଣି ନିଲାମରେ ଭାଗ ନେବା ପାଇଁ ଅନୁମତି ଦିଆଯିବ ନାହିଁ । ଏହାଦ୍ୱାରା କ୍ରୋମ ଭଳି ଦୁଷ୍ପା୍ର୍ର୍ରପ୍ୟ କଞ୍ଚାମାଲର ଉପଯୁକ୍ତ ବଜାର ଦର ନିର୍ଦ୍ଧାରଣ କରିହେବ ।

– ରାଜ୍ୟର ଯେ କୌଣସି ସ୍ଥାନରେ ସଫ୍ଟୱେୟାର୍ ଟେକ୍ନଲୋଜି ପାର୍କସ୍ ଅଫ ଇଣ୍ଡିଆ(ଏସଟିପିଆଇ) କେନ୍ଦ୍ର ପ୍ରତିଷ୍ଠା ନିମନ୍ତେ ୩ ଏକର ପର୍ଯ୍ୟନ୍ତ ସରକାରୀ ଜମି ବିନା ପ୍ରିମିୟମ ଓ ବିନା ଇନସିଡଣ୍ଟାଲ୍ ଚାର୍ଜରେ ଲିଜ୍ ସୂତ୍ରରେ ଯୋଗାଇ ଦିଆଯିବ । ତେବେ ଲିଜ୍ ରେ ପ୍ରଦାନ କରାଯିବାକୁ ଥିବା ଏହି ସରକାରୀ ଜମି ନିମନ୍ତେ ଏସଟିପିଆଇ କର୍ତ୍ତୃପକ୍ଷଙ୍କୁ ଜମିର ବଜାର ଦରର ୧ ପ୍ରତିଶତ ହିସାବରେ ବାର୍ଷିକ ଖଜଣା ଓ ବାର୍ଷିକ ଖଜଣାର ୭୫ ପ୍ରତିଶତ ହିସାବରେ ସେସ୍ ଦେବାକୁ ପଡ଼ିବ ।

– ସୁନ୍ଦରଗଡ଼ ଜିଲ୍ଲାର ୨ଟି ବ୍ଲକ୍ (କୁଆଁରମୁଣ୍ଡା, ନୂଆଗାଁ) ର ୩୮ଟି ପଞ୍ଚାୟତ ଅଧୀନରେ ଥିବା ୨୧୯ ଗ୍ରାମକୁ ବିଶୁଦ୍ଧ ଜଳ ଯୋଗାଇବା ନିମନ୍ତେ ଦୁଇଟି ପ୍ରକଳ୍ପ କାର୍ଯ୍ୟ ମେସର୍ସ ଭୋଲଟାସ୍ ଲିମିଟେଡ଼, ଥାନେ କରିବ । ଏଥିପାଇଁ ୩୪୦ କୋଟି ୩୯ ଲକ୍ଷ ଟଙ୍କାର ସର୍ବନିମ୍ନ ଟେଣ୍ଡରକୁ କ୍ୟାବିନେଟ୍ ଅନୁମୋଦନ କରିଛନ୍ତି । ୨୪ ମାସ ମଧ୍ୟରେ ଏହା କାର୍ଯ୍ୟକାରୀ କରିବାକୁ ଲକ୍ଷ୍ୟ ରଖାଯାଇଛି ।

– ସେହିଭଳି ଜିଲ୍ଲାର ୩ଟି ବ୍ଲକ୍( ଗୁରୁଣ୍ଡିଆ, କୋଇରା, ଲହୁଣୀପଡ଼ା) ଅନ୍ତର୍ଗତ ୨୫ଟି ପଞ୍ଚାୟତ ଅଧୀନରେ ଥିବା ୨୬୨ ଗ୍ରାମକୁ ବିଶୁଦ୍ଧ ଜଳ ଯୋଗାଇ ଦେବା ପାଇଁ ଅନ୍ୟ ତିନୋଟି ବୃହତ୍ତ ପ୍ରକଳ୍ପ କାର୍ଯ୍ୟକାରୀ ହେବ । ୩୨୦ କୋଟି ୧୧ ଲକ୍ଷ ୨୦ ହଜାର ଟଙ୍କାର ସର୍ବନିମ୍ନ ଟେଣ୍ଡର ପକାଇଥିବା ମେସର୍ସ ଭୋଲଟାସ୍ ଲିମିଟେଡ଼କୁ ବି ଏହି କାର୍ଯ୍ୟ ଦିଆଯାଇଛି । ୨୪ ମାସ ମଧ୍ୟରେ କାର୍ଯ୍ୟ ଶେଷ କରିବାକୁ ଲକ୍ଷ୍ୟ ଧାର୍ଯ୍ୟ ହୋଇଛି ।

କ୍ୟାବିନେଟ୍ ବୈଠକରେ ପଞ୍ଚମ ଅର୍ଥ କମିଶନ ଆକ୍ସନ୍ ଟେକେନ୍ ରିପୋର୍ଟ ଉପସ୍ଥାପିତ ହୋଇଥିଲା ବେଳେ ବିଧାନସଭା ତୃତୀୟ ଅଧିବେସନକୁ ମଂଜୁର ଦିଆଯାଇଥିଲା ।

ବଜେଟ୍ ପରିମାଣ ଟପିବ ଦେଢ଼ ଲକ୍ଷ କୋଟି

ସେପଟେ ୨୦୨୦-୨୧ ଆର୍ଥିକ ବର୍ଷର ବଜେଟ୍ ଚିଠା ପ୍ରସ୍ତାବକୁ ମନ୍ତ୍ରୀ ପରିଷଦ ବୈଠକରେ ଅନୁମୋଦନ ମିଳିଛି । ଏଥର ବଜେଟ୍ ପରିମାଣ ଦେଢ଼ ଲକ୍ଷ କୋଟି ଟଙ୍କାରୁ ଅଧିକ ହେବାର ସମ୍ଭାବନା ରହିଛି । ଗତବର୍ଷ ବଜେଟ୍ ପରିମାଣ ଥିଲା ୧ ଲକ୍ଷ ୩୯ ହଜାର କୋଟି । ଆସନ୍ତା ୧୮ ତାରିଖରେ ବିଧାନସଭାରେ ବଜେଟ୍ ଉପସ୍ଥାପନ ହେବ ।