ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଅଚାନକ ଦିଲ୍ଲୀ ଗସ୍ତ କରିଛନ୍ତି । ସଂଧ୍ୟାରେ ସେ ରାଷ୍ଟ୍ରପତି ରାମନାଥ କୋବିନ୍ଦଙ୍କୁୁ ରାଷ୍ଟ୍ରପତିଭବନରେ ଭେଟିବାର କାର୍ଯ୍ୟକ୍ରମ ରହିଛି । ରାଷ୍ଟ୍ରପତିଙ୍କୁ ଭେଟି ସେ ଓଡ଼ିଶାକୁ ଆମନ୍ତ୍ରଣ କରିବେ ବୋଲି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଥିଲେ ମଧ୍ୟ ଏହାକୁ ନେଇ ବିଭିନ୍ନ ଆଲୋଚନା ହେଉଛି । ବିଜେପୁର ଉପନିର୍ବାଚନ ପରିପ୍ରେକ୍ଷୀରେ ସୃଷ୍ଟି ହୋଇଥିବା ପରିସ୍ଥିତି ଉପରେ ମୁଖ୍ୟମନ୍ତ୍ରୀ ରାଷ୍ଟ୍ରପତିଙ୍କ ଦୃଷ୍ଟିକୁ ଆଣିବେ ବୋଲି କିଛି ମହଲରେ ଚର୍ଚ୍ଚା ହେଉଛି । ଏହା ପଛରେ ଅନ୍ୟ କୌଣସି ବଡ଼ କାରଣ ବି ଥାଇପାରେ ବୋଲି କୁହାଯାଉଛି । ଆଜି ସଂଧ୍ୟା ୬ଟା ୧୫ ମିନିଟ୍ ରେ ରାଷ୍ଟ୍ରପତିଙ୍କ ସହ ତାଙ୍କର ଭେଟଘାଟ ହେଉଥିବାରୁ ସମସ୍ତଙ୍କ ନଜର ସେୟାଡ଼କୁ ଯାଇଛି ।
ସୂଚନାଯୋଗ୍ୟ ଗତଥର ମୁଖ୍ୟମନ୍ତ୍ରୀ ଦିଲ୍ଲୀଗସ୍ତ କାଳରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭେଟିଥିଲେ । ମୁଖ୍ୟମନ୍ତ୍ରୀ ଭୁବନେଶ୍ୱରରୁ ଯାଇ ପହଞ୍ଚିବା ପରେ ପରେ ପ୍ରଧାନମନ୍ତ୍ରୀଙ୍କ ବାସଭବନ ଯାଇ ତାଙ୍କୁ ଭେଟିଥିଲେ । ପ୍ରଧାନମନ୍ତ୍ରୀଙ୍କ ସହ ଭେଟଘାଟ କାର୍ଯ୍ୟକ୍ରମ ସମ୍ପର୍କରେ ମୁଖ୍ୟମନ୍ତ୍ରୀ ଆଗରୁ କୌଣସି ସୂଚନା ଦେଇ ନ ଥିଲେ । ଏହି କାର୍ଯ୍ୟକ୍ରମ ସମ୍ପର୍କରେ ଗଣମାଧ୍ୟମ ବି କୌଣସି ଟେର୍ ପାଇ ନ ଥିଲା । ଏଥର ରାଷ୍ଟ୍ରପତିଙ୍କୁ ଭେଟିବାକୁ ମୁଖ୍ୟମନ୍ତ୍ରୀ ଯାଉଥିବା ସୂଚନା ଦିଆଯାଇଥିଲେ ମଧ୍ୟ କାରଣ ବିଶ୍ୱାସ ହେଉନି । ରାଷ୍ଟ୍ରପତି ଭାବେ ଶ୍ରୀ କୋବିନ୍ଦ ଦାୟିତ୍ୱ ନେଲା ମୁଖ୍ୟମନ୍ତ୍ରୀ ତାଙ୍କୁ ପ୍ରଥମ ଥର ପାଇଁ ଭେଟିବେ । ଆସନ୍ତକାଲି ଅପରାହ୍ନରେ ମୁଖ୍ୟମନ୍ତ୍ରୀ ଦିଲ୍ଲୀରୁ ଫେରିବେ ।
