ଭୁୁବନେଶ୍ୱର: ଦିଲ୍ଲୀଠାରୁ ଭୁବନେଶ୍ୱର । ଭୁବନେଶ୍ୱରରୁ ମାଲକାନଗିରି, ମୟୁରଭଞ୍ଜ । ସବୁ ରାସ୍ତାଘାଟ ଶୂନଶାନ୍ । ଚାରିଆଡ଼େ ଖାଁ ଖାଁ । କରୋନା ଭାଇରସ୍ ରୁ ରକ୍ଷା ପାଇବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଡାକରା ଦେଇଥିବା ‘ଜନତା କର୍ଫ୍ୟୁ’ କୁ ଦେଶର କୋଣ ଅନୁକୋଣରୁ ଲୋକେ ସହଯୋଗ କରିଛନ୍ତି । ରାସ୍ତାକୁ ନ ବାହାରି ଘରେ ରହିଛନ୍ତି ଲୋକେ । କରୋନାର ଭୟାବହତାକୁ ଲୋକମାନେ ବୁଝିସାରିଛନ୍ତି ଏବଂ ସେଥିରୁ ରକ୍ଷା ପାଇବା ପାଇଁ ଘରେ ରହିବାକୁ ଏକମାତ୍ର ବିକଳ୍ପ ଭାବେ ଗ୍ରହଣ କରିଛନ୍ତି । ଓଡ଼ିଶାର ୫ ଜିଲ୍ଲା ଏବଂ ୮ ସହରବାସୀ ଆଜିର ‘ଜନତା କର୍ଫ୍ୟୁ’ ସାଙ୍ଗକୁ ୮ ଦିନିଆ ‘ଲକ୍ ଡାଉନ୍’ ରେ ନିଜକୁ ଆବଦ୍ଧ କରିଛନ୍ତି ।
ରାଜ୍ୟର ଚଳଚଞ୍ଚଳ ଛୋଟବଡ଼ ସବୁ ସହର ଗତକାଲି ରାତିରୁ ହିଁ ଶୂନଶାନ ହୋଇଯାଇଛି । ଖାଲି ମୁଖ୍ୟ ରାସ୍ତାଘାଟ ନୁହେଁ, ସହରର ବିଭିନ୍ନ କଲୋନି ଓ ଗଳିକନ୍ଦିରେ ମଧ୍ୟ ନିରବତା ରାଜ୍ କରୁଛି । ପ୍ରାୟ ସମସ୍ତେ ନିଜ ନିଜ ଘରେ ଥିଲେ ମଧ୍ୟ କାହାରି ମନରେ ସରସ ନାହିଁ । ସମସ୍ତଙ୍କ ମନରେ ଆଶଙ୍କାର ଛାଇ । ପରିବାର ଲୋକ ସମସ୍ତେ ଏକାଠି ଥାଇ ମଧ୍ୟ ସେଭଳି କୋଳାହଳ ନାହିଁ ।
ରାଜଧାନୀ ସମେତ ରାଜ୍ୟର ବିଭିନ୍ନ ସହରରେ ଆଜି ସକାଳୁ କାଁ ଭାଁ କିଛି ଯୁବକଙ୍କ ଛଡ଼ା ରାସ୍ତାରେ କାହାରିକୁ ଦେଖିବାକୁ ମିଳୁନାହିଁ । କଟକ, ଭୁବନେଶ୍ୱର ସହରର ବିଭିନ୍ନ ଛକରେ ପଇଁତରା ମାରୁଥିବା ପୁଲିସ ଅନାବଶ୍ୟକ ବୁଲୁଥିବା ହାତଗଣତି ଯୁବକଙ୍କୁ ତାଗିଦ୍ କରି ଘରକୁ ତଡ଼ି ଦେଉଛନ୍ତି । ଡାକ୍ତରଖାନା ଯାଉଥିବା ଲୋକ, ନିଜ ସମ୍ପର୍କୀୟଙ୍କୁ ଆଣିବାକୁ ଷ୍ଟେସନ୍ କିମ୍ବା ବିମାନବନ୍ଦର ଯାଉଥିବା ଲୋକଙ୍କୁ ବାଟରେ କେହି ବାଧା ନ ପହଞ୍ଚାଇବାକୁ ପୁଲିସ ପକ୍ଷରୁ ଏକ ଆଇ-କାର୍ଡ ଦିଆଯାଉଛି । ମୋଟାମୋଟି ଭାବେ ‘ଜନତା କର୍ଫ୍ୟୁ’ କୁ ଜନସାଧାରଣ ଅକୁଣ୍ଠ ସମର୍ଥନ ଓ ସହଯୋଗ କରୁଛନ୍ତି ।
