ଭୁୁବନେଶ୍ୱର: ମନ୍ତ୍ରୀ କି ନେତାଙ୍କ ଅଭ୍ୟର୍ଥନାରେ ଛୋଟ ଛୁଆଙ୍କୁ ନିୟୋଜିତ ନ କରାଇବାକୁ କଡ଼ା ନିୟମ ରହିଛି । ମାତ୍ର ଏହି କଟକଣା କେମିତି ପାଳନ ହେଉଛି ତାହା ସମସ୍ତଙ୍କୁ ଜଣା । କିଛି ଚାଲାକ୍ ନେତା ଅଲଗା ଢ଼ଙ୍ଗରେ ପିଲାଙ୍କୁ ବ୍ୟବହାର କରି ନିଜର ହୀନ ରାଜନୈତିକ ସ୍ୱାର୍ଥ ହାସଲ କରିବାକୁ ତିଳେମାତ୍ର କୁଣ୍ଠାବୋଧ କରୁନାହାନ୍ତି । ଏଭଳି ଦୁଇଟି ଘଟଣା ଏବେ ସାମନାକୁ ଆସିଛି ।
ଗତ ୨୫ ତାରିଖରେ ଭୁବନେଶ୍ୱର ଡିଏଭି ସ୍କୁଲ ସାମନାରେ ଏକ ମିନି ମାରାଥାନ୍ ଆୟୋଜନ ହୋଇଥିଲା । ଆୟୋଜକ ଥିଲେ ସ୍ଥାନୀୟ ଅଞ୍ଚଳ(ୱାର୍ଡ ନଂ ୪୭) ର କର୍ପୋରେଟର ତଥା ମେୟର ଅନନ୍ତ ନାରାୟଣ(ବୁନୁ) ଜେନା । ପାଖାପାଖି ୨୦୦ କୁନି କୁନି ସ୍କୁଲ ପିଲାଙ୍କୁ ବିଭିନ୍ନ ସ୍ଥାନରୁ ଅଣାଯାଇଥିଲା । ସମସ୍ତଙ୍କୁ ମାରାଥନ୍ ଗଂଜି ପିନ୍ଧାଇ ଦିଆଯାଇଥିଲା । ଏହି ଗଂଜିର ସାମନାରେ ଲେଖାଥିଲା ବିଜୁ ଯୁବ ବାହିନୀ । ଅର୍ଥାତ୍ ପିଲାମାନଙ୍କୁ ବିଜୁ ଯୁବ ବାହିନୀ ସଦସ୍ୟର ପରିଚୟ ଦିଆଯାଇଥିଲା । ବିଜୁ ଯୁବ ବାହିନୀର ସଦସ୍ୟତା ପାଇଁ ସର୍ବନିମ୍ନ ବୟସ ୧୫ ବର୍ଷ ଥିବା ବେଳେ ପାୱାରଫୁଲ୍ ମେୟର ମହାଶୟ ଏହି ୧୫ ବର୍ଷିଆ(!) କୁନି ପିଲାଙ୍କୁ କେଉଁଠୁ ଆଣିଲେ ଏବଂ ସେମାନଙ୍କୁ ବିଜୁ ଯୁବ ବାହିନୀ ବେଶରେ ସଜାଇଲେ ତାହା ତାଙ୍କୁ ଜଣା ଥିବ । ଏ ସମ୍ପର୍କରେ ଆମେ ମେୟରଙ୍କ ମତାମତ ଆଣିବାକୁ ଚେଷ୍ଟା କରିଥିଲେ ମଧ୍ୟ ତାଙ୍କୁ ପାଇ ନ ଥିଲୁ ।
ସୂଚନା ଅନୁଯାୟୀ ଭୁବନେଶ୍ୱରର କିଛି ବସ୍ତିରୁ ମେୟର ମହୋଦୟ ଏହି ପିଲାମାନଙ୍କୁ ଯୋଗାଡ଼ କରି ଆଣିଥିଲେ । ବିଜେଡ଼ି ରାଲି ହେଉଛି କହି ଅଭିଭାବକମାନଙ୍କୁ ପ୍ରବର୍ତ୍ତା ଯାଇଥିଲା । ସେଥିପାଇଁ ହାତଗୁଂଜା ବି ଦିଆଯାଇଥିଲା । ପିଲାମାନଙ୍କୁ ଗୋଟିଏ ଗଂଜି ଓ ଗୋଟିଏ ଖାଦ୍ୟ ପୁଡ଼ିଆର ଲୋଭ ଦିଆଯାଇଥିଲା । ମେୟର ମହାଶୟ ନିରୀହ ପିଲାମାନଙ୍କୁ ଧରି ରାଜନୀତି କରିବା ବିଭିନ୍ନ ମହଲରେ ପ୍ରତିକ୍ରିୟା ସୃଷ୍ଟି କରିଛି । ଏହାକୁ କ୍ଷମତାର ଅହଂକାର ବୋଲି ଅନେକ ସମାଲୋଚନା କରିଛନ୍ତି ।
