ସଫା ହେଲେ ଜେନା

ଭୁବନେଶ୍ୱର: ପିସିସି ସଭାପତି ନିରଞ୍ଜନ ପଟ୍ଟନାୟକ ଓ ବିରୋଧୀ ଦଳ ନେତା ନରସିଂହ ମିଶ୍ରଙ୍କ ପଛରେ ପଡ଼ିବା ଶ୍ରୀକାନ୍ତ ଜେନାଙ୍କୁ ମହଙ୍ଗା ପଡ଼ିଛି । ଇସ୍ତାହାର କମିଟି ଅଧ୍ୟକ୍ଷ ପଦରୁ ଆଜି ତାଙ୍କୁ ଅପମାନଜନକ ଭାବେ ବିଦା କରାଯାଇଛି । ତାଙ୍କ ଗୋଷ୍ଠୀର କୁହାଯାଉଥିବା ଶରତ ରାଉତଙ୍କୁ ମଧ୍ୟ ଇସ୍ତାହାର କମିଟିର ଆବାହକ ପଦରୁ ହଟାଯାଇଛି । ଶ୍ରୀକାନ୍ତଙ୍କ ଜାଗାରେ ଗଣେଶ୍ୱର ବେହେରାଙ୍କୁ ଇସ୍ତାହାର କମିଟି ଅଧ୍ୟକ୍ଷ ପଦରେ ନିଯୁକ୍ତି ଦିଆଯାଇଥିବା ବେଳେ ଶରତଙ୍କ ଜାଗାରେ ବିସ୍ମୟ ମହାପାତ୍ରଙ୍କୁ ଆବାହକ ପଦ ଦିଆଯାଇଛି । ରାହୁଲ ଗାନ୍ଧୀଙ୍କ ନିର୍ଦ୍ଦେଶକ୍ରମେ ଏଆଇସିସି ପକ୍ଷରୁ ସାଧାରଣ ସମ୍ପାଦକ ଅଶୋକ ଗେହେଲଟ୍ ଇସ୍ତାହାର କମିଟି ଘୋଷଣା କରିଛନ୍ତି ।

ଇସ୍ତାହାର କମିଟିରେ ଗଣେଶ୍ୱର ବେହେରା ଅଧ୍ୟକ୍ଷ ଥିବା ବେଳେ ନରସିଂହ ମିଶ୍ର, ପ୍ରସାଦ ହରିଚନ୍ଦନ, ସୁଦର୍ଶନ ଦାସ, ଶ୍ୟାମସୁନ୍ଦର ହାଁସଦା, ମାରି ସୁରିନ୍, ନଟବର ଖୁଣ୍ଟିଆ, ପ୍ରଫେସର ଲିକତ୍ ଅଲ୍ଲୀ, ସତ୍ୟପ୍ରକାଶ ନାୟକ ସଦସ୍ୟ ଅଛନ୍ତି । ବିସ୍ମୟ ମହାପାତ୍ରଙ୍କୁ ଆବାହକ ରଖାଯାଇଛି । ଏଆଇସିସି ପକ୍ଷରୁ ଜାରି ତାଲିକାରେ ପୂର୍ବରୁ ଘୋଷିତ ଶ୍ରୀକାନ୍ତ ଜେନାଙ୍କ ବଦଳରେ ଗଣେଶ୍ୱର ବେହେରା ଅଧ୍ୟକ୍ଷ ବୋଲି ସ୍ପଷ୍ଟ ଉଲ୍ଲେଖ ଥିବା ବେଳେ ପୂର୍ବଘୋଷିତ ତାଲିକାରେ ଥିବା ଶରତ ରାଉତଙ୍କ ନାଁ ଉଲ୍ଲେଖ ନ ରହି ବିସ୍ମୟ ମହାପାତ୍ର ଆବାହକ ହେଲେ ବୋଲି ଉଲ୍ଲେଖ କରାଯାଇଛି ।

ଦଳରେ ଥାଇ ଦଳର ଅନିଷ୍ଟ କରୁଥିବା ଶକ୍ତିଙ୍କ ଉଦ୍ଦେଶ୍ୟରେ ଆଜି କଂଗ୍ରେସ ଭବନରେ ଅନୁଷ୍ଠିତ ପଞ୍ଚାୟତ ସମ୍ମିଳନୀରେ ବର୍ଷୁଥିଲେ ନିରଞ୍ଜନ ପଟ୍ଟନାୟକ । ସେପଟେ ସ୍ୱାଧିନତା ସଂଗ୍ରାମୀ ପଡ଼ିଆରେ ସାମାଜିକ ନ୍ୟାୟ ଅଭିଯାନ ବ୍ୟାନରରେ ଦଳିତ,ଆଦିବାସୀ ଓ ପଛୁଆବର୍ଗଙ୍କ ଉପେକ୍ଷାକୁ ନେଇ ଭାଷଣରେ ଗର୍ଜୁଥିଲେ ଶ୍ରୀକାନ୍ତ ଜେନା ଓ କୃଷ୍ଣ ଶଗରିଆ । ଖଣି ଚୋର କଂଗ୍ରେସକୁ ଚଳାଇ ପାରିବେନି କହି ପଟ୍ଟନାୟକ ପରିବାରକୁ ଟାର୍ଗେଟ୍ କରୁଥିଲେ ଶ୍ରୀକାନ୍ତ । ଠିକ ଏତିକିବେଳକୁ ଏଆଇସିସି ପକ୍ଷରୁ ଆସିଥିଲା ଇସ୍ତାହାର କମିଟି ବିଜ୍ଞପ୍ତି । ଯେଉଁଥିରେ ଶ୍ରୀକାନ୍ତ ଜେନା ବଳି ପଡ଼ିଥିଲେ । ସାମ୍ବାଦିକଙ୍କଠାରୁ ଶ୍ରୀକାନ୍ତ ଏହା ଜାଣିଲା ପରେ କହିଥିଲେ, ମୁଁ ଦୁଃଖିତ ନୁହେଁ । ପଦବୀ ଯେତେବେଳେ ମାଗି ନ ଥିଲି ଚାଲିଗଲା ବୋଲି କାହିଁକି ଦୁଃଖ କରିବି । ନିରଞ୍ଜନ କହିଥିଲେ, ଏହା ଏଆଇସିସି ନିଷ୍ପତ୍ତି । ମୋର ସେଥିରେ କିଛି ଭୂମିକା ନାହିଁ ।

ତେବେ ସେ ଯାହା ହେଉ, ଯେଉଁ ଓବିସି ଓ ଦଳିତ ବର୍ଗ ସପକ୍ଷରେ ଶ୍ରୀକାନ୍ତ ଯୁକ୍ତି ବାଢ଼ି ନିରଞ୍ଜନଙ୍କ ପାଇଁ ଗାତ ଖୋଳୁଥିବା କୁହାଯାଉଥିଲା ସେହି ଗାତରେ ନିଜେ ପଡ଼ିଛନ୍ତି । ଦଳିତ ବର୍ଗର ନେତାଙ୍କୁ ତାଙ୍କ ଜାଗାରେ ନିଯୁକ୍ତି ଦିଆଯାଇଛି । ରାଜ୍ୟ କଂଗ୍ରେସ ପାଇଁ ଶ୍ରୀକାନ୍ତ ଜେନାଙ୍କ ଭଳି ନେତାଙ୍କର ଆଉ ଆବଶ୍ୟକତା ନାହିଁ ବୋଲି ଖୋଦ୍ ହାଇକମାଣ୍ଡ ବାର୍ତ୍ତା ଦେଇଥିବା କୁହାଯାଉଛି ।

ନିରଞ୍ଜନ ପଟ୍ଟନାୟକ ଓ ଶ୍ରୀକାନ୍ତ ଜେନାଙ୍କ ମଧ୍ୟରେ ଅହି ନକୂଳ ସମ୍ପର୍କ ଆଜିର ନୁହେଁ, ବହୁ ପୁରୁଣା । ନିରଞ୍ଜନଙ୍କୁ ପିସିସି ସଭାପତି ପଦରେ ବସାଇ ନ ଦେବା ପାଇଁ ଶ୍ରୀକାନ୍ତ ଚକ୍ରାନ୍ତ ଖଂଜିଥିଲେ ବୋଲି ଚର୍ଚ୍ଚା ହୋଇଥିଲା । ଗତ ଏପ୍ରିଲ୍ ମାସରେ ହାଇକମାଣ୍ଡ ନିରଞ୍ଜନଙ୍କୁ ସଭାପତି ଦାୟିତ୍ୱ ଦେବା ବେଳେ ଶ୍ରୀକାନ୍ତ ଜେନାଙ୍କୁ ବି ସନ୍ତୁଷ୍ଟ କରିବାକୁ ଚାହିଁଥିଲେ । ତାଙ୍କୁ ଇସ୍ତାହାର କମିଟି ଅଧ୍ୟକ୍ଷ ପଦରେ ଥଇଥାନ କରିଥିଲେ । ତେବେ ଘରେ ନ ପଶୁଣୁ ଚାଳ ବାଜିବା ନ୍ୟାୟରେ ଶ୍ରୀକାନ୍ତ ନିରଞ୍ଜନଙ୍କୁ ଲକ୍ଷ୍ୟ କରି ତାଙ୍କ ଗେମ୍ ଆରମ୍ଭ କରିଥିଲେ । ଇସ୍ତାହାର ମୁଖବନ୍ଧ ଶୀର୍ଷକରେ କଂଗ୍ରେସ କମିଟି ସଦସ୍ୟ ଓ ଏଆଇସିସି ସଦସ୍ୟଙ୍କୁ ଚିଠି ଲେଖି କଂଗ୍ରେସ କ୍ଷମତାକୁ ଆସିଲେ ଓବିସି କିମ୍ବା ଏସିବିସି ବର୍ଗରୁ ଜଣେ ମୁଖ୍ୟମନ୍ତ୍ରୀ ହେବେ ବୋଲି ପ୍ରସ୍ତାବ ରଖିଥିଲେ । ଖାଲି ସେତିକି ନୁହେଁ କଂଗ୍ରେସ କ୍ଷମତାକୁ ଆସିଲେ ବେଆଇନ ଖଣି ମାଲିକଙ୍କ ଖଣି ବାତିଲ କରି ସେମାନଙ୍କ ସମ୍ପତ୍ତି ବ୍ୟାଜ୍ୟାପ୍ତ ହେବ ବୋଲି ପ୍ରସ୍ତାବ ଦେଇଥିଲେ । ଏହି ପ୍ରସ୍ତାବ ଜରିଆରେ ଶ୍ରୀକାନ୍ତ ନିରଞ୍ଜନଙ୍କୁ ତୀର ଖଂଜିଥିଲେ ବୋଲି ଚର୍ଚ୍ଚା ହୋଇଥିଲା ।

ସେପଟେ କୃଷ୍ଣ ଶଗରିଆଙ୍କୁ ମତେଇ ବିରୋଧୀ ଦଳ ନେତା ନରସିଂହ ମିଶ୍ରଙ୍କୁ ବଦନାମ ଓ ହଟାଇବା ପାଇଁ କୁଆଡ଼େ ଶ୍ରୀକାନ୍ତ ଷଡ଼ଯନ୍ତ୍ର ରଚିଥିଲେ । ଯେଉଁଥିପାଇଁ ମୁଖ୍ୟମନ୍ତ୍ରୀଙ୍କ ସହ ନରସିଂହଙ୍କ ସମ୍ପର୍କ ପ୍ରସଙ୍ଗ ଉଠାଇଥିଲେ ଶଗରିଆ । ଏହାକୁ ଉଭୟ ଶ୍ରୀକାନ୍ତ ଓ ଶଗରିଆ ଅସ୍ୱୀକାର କରିଥିଲେ ମଧ୍ୟ କଂଗ୍ରେସ ମହଲରେ ଏହା ଢ଼େର୍ ଚର୍ଚ୍ଚା ହୋଇଥିଲା । ନିରଞ୍ଜନ ଓ ନରସିଂହଙ୍କୁ ଟାର୍ଗେଟ୍ କରି ଶ୍ରୀକାନ୍ତ କଂଗ୍ରେସକୁ ଭାଗ ଭାଗ କରିବାକୁ ଉଦ୍ୟମ କରୁଥିବା ବିରୋଧୀ ଶିବିରରେ ଆଲୋଚନା ହେଉଥିଲା । ତେବେ ଚର୍ଚ୍ଚାର ସତ୍ୟାସତ୍ୟ ବୋଧହୁଏ କଂଗ୍ରେସ ନେତୃତ୍ୱର ଅନୁଭବ ହୋଇଛି । ଯେଉଁଥିପାଇଁ ଅଚାନକ ଭାବେ ତାଙ୍କ ହାତରୁ ଇସ୍ତାହାର କମିଟି ଅଧ୍ୟକ୍ଷ ପଦ କାଢ଼ି ନିଆଯାଇଛି ।