ସମୀର ଦେ ଙ୍କ ମେଳିରେ ବୈଜୟନ୍ତ; କଟକରୁ ଲଢ଼ିବେ ଲୋକସଭା !

ଭୁବନେଶ୍ୱର: ପ୍ରଥମ ଥର ପାଇଁ ବିଜେପି କ୍ୟାମ୍ପରେ ଖୋଲାଖୋଲି ଆର୍ବିଭାବ ହୋଇଛନ୍ତି ବୈଜୟନ୍ତ ପଣ୍ଡା । ନିଜର ରାଜନୈତିକ ଭବିଷ୍ୟତ ପରଖୁୁଥିବା ବୈଜୟନ୍ତଙ୍କୁ ଆଜି କଟକରେ ବିଜେପିର ବରିଷ୍ଠ ନେତା ସମୀର ଦେ ଙ୍କ ବାସଭବନରେ ଆୟୋଜିତ ବନ୍ଧୁମିଳନରେ ଦେଖିବାକୁ ମିଳିଥିଲା । ଖାସ୍ ବୈଜୟନ୍ତଙ୍କ ଉଦ୍ଦେଶ୍ୟରେ ଏହି ବନ୍ଧୁମିଳନ କରାଯାଇ ତାଙ୍କୁ ଉଚ୍ଛସିତ ସମ୍ବର୍ଦ୍ଧନା ଦିଆଯାଇଥିଲା । ଖାଲି ସେତିକି ନୁହେଁ, କଟକ ଲୋକସଭା ଆସନରୁ ପ୍ରାର୍ଥୀ ହେବା ପାଇଁ ବିଜେପି ନେତାମାନେ ବୈଜୟନ୍ତଙ୍କୁ ଅନୁରୋଧ କରି କରତାଳି ଦେଇଥିଲେ ।

ସୂଚନା ଅନୁଯାୟୀ, ପୂର୍ବ ଯୋଜନାମତେ ସମୀର ଦେ ଆଜି ତାଙ୍କ ସିଡ଼ିଏ-୧ ବାସଭବନସ୍ଥିତ ଘରେ ତାଙ୍କ ଚେଲାଚାମୁଣ୍ଡାଙ୍କୁ ଧରି ବୈଜୟନ୍ତଙ୍କ ପାଇଁ ଏହି ବନ୍ଧୁମିଳନର ଆୟୋଜନ କରିଥିଲେ । ବୈଜୟନ୍ତ ସେଠାରେ ପହଞ୍ଚିଲାକ୍ଷଣି ତାଙ୍କୁ ଫୁଲତୋଡ଼ାରେ ପୋତି ଦେଇଥିଲେ । ବିଜେପି ନଗର ସଭାପତି ଲକ୍ଷ୍ମୀଧର ପ୍ରଧାନ ତାଙ୍କ ଅଭ୍ୟର୍ଥନା ଭାଷଣରେ ବୈଜୟନ୍ତଙ୍କୁ ବେଶ୍ ପ୍ରଶଂସା କରିଥିଲେ । କେନ୍ଦ୍ରାପଡ଼ା ସାଂସଦ ଭାବେ ବୈଜୟନ୍ତଙ୍କ କାର୍ଯ୍ୟକାଳକୁ ଭୂରି ଭୂରି ପ୍ରଶଂସା କରିବା ସହ ଆଗାମୀ ନିର୍ବାଚନରେ କଟକରୁ ବିଜେପି ଲୋକସଭା ପ୍ରାର୍ଥୀ ହେବାକୁ ପ୍ରସ୍ତାବ ଦେଇଥିଲେ । ନଗର ସଭାପତିଙ୍କ ଏହି ପ୍ରସ୍ତାବକୁ ସମୀର ଦେ ଙ୍କ ସମେତ ସେଠାରେ ଉପସ୍ଥିତ ଅନ୍ୟ ନେତାମାନେ କରତାଳି ଦେଇ ସମର୍ଥନ କରିଥିଲେ । ନିଜେ ବୈଜୟନ୍ତ ମଧ୍ୟ ବେଶ୍ ଉଲ୍ଲସିତ ହୋଇଥିଲେ । ସଭାକୁ ସମୀର ଦେ ସଞ୍ଚାଳନ କରୁଥିବା ବେଳେ ବୈଜୟନ୍ତଙ୍କ ବାମ ପଟେ ନଗର ସଭାପତି ଓ ଡାହାଣ ପଟେ ପୂର୍ବତନ ମେୟର ନିବେଦିତା ପ୍ରଧାନ ଉପସ୍ଥିତ ଥିଲେ ।

ଏ ପର୍ଯ୍ୟନ୍ତ ବିଜେପିରେ ଯୋଗ ଦେଇ ନ ଥିବା ବୈଜୟନ୍ତଙ୍କୁ ନେଇ ସମୀର ଦେ ଙ୍କ ଏହି ବନ୍ଧୁମିଳନ ଦଳୀୟ ମହଲରେ ଚର୍ଚ୍ଚାର ବିଷୟ ହୋଇଛି । କୁହାଯାଉଛି, ଏହି ମେଳି ଆୟୋଜନ ସମ୍ପୂର୍ଣ୍ଣ ଭାବେ ପ୍ରାୟୋଜିତ ଥିଲା । ଯାହାର କାର୍ପଟଦାର ଥିଲେ ନିଜେ ବୈଜୟନ୍ତ । ବୈଜୟନ୍ତ କେବେ ବିଜେପିରେ ମିଶିବେ ତାହାର ତାରିଖ ଏଠାରେ ଧାର୍ଯ୍ୟ ହୋଇଥିବା ବେଳେ ତାଙ୍କୁ କଟକରୁ ପ୍ରାର୍ଥୀ କରିବା ପାଇଁ ପୂର୍ବପ୍ରସ୍ତୁତି ହୋଇଥିଲା ।