ସଲାମ୍ ସୋନୁ ସୁଦ୍! କେରଳରେ ଫସିଥିବା ୧୬୯ ଓଡ଼ିଆ ଝିଅଙ୍କୁ ସ୍ୱତନ୍ତ୍ର ବିମାନରେ ଛାଡ଼ିଲେ

ଭୁବନେଶ୍ୱର: ଫିଲ୍ମରେ ସିନା ଖଳନାୟକ । ହେଲେ ବାସ୍ତବ ଜୀବନରେ ମହାନାୟକ । ଦରଦ ଓ ମାନବିକତାର ଜଣେ ମୂର୍ତ୍ତିମନ୍ତ ପ୍ରତୀକ । ନିଜର ମହାନତା ଯୋଗୁଁ କୋଟି କୋଟି ଲୋକଙ୍କ ହୃଦୟରେ ବସା ବାନ୍ଧି ସାରିଲେଣି । ସମସ୍ତଙ୍କ ପାଇଁ ଆଦର୍ଶ ପାଲଟିଥିବା ଏହି ମଣିଷ ହେଉଛନ୍ତି ୪୬ ବର୍ଷୀୟ ସୋନୁ ସୁଦ୍ । ମୁମ୍ବାଇରେ ଫସି ରହିଥିବା ବିଭିନ୍ନ ରାଜ୍ୟର ପାଖାପାଖି ୧୫ ହଜାର ପ୍ରବାସୀଙ୍କୁ ଏ ପର୍ଯ୍ୟନ୍ତ ବସ୍ ଯୋଗେ ଭିଟାମାଟିକୁ ଫେରାଇଥିବା ସୋନୁଙ୍କ ଅଭିଯାନରେ ଏବେ ଯୋଡି ହୋଇଛି ଓଡ଼ିଶା ଫର୍ଦ୍ଦ ।

କେରଳର ଏର୍ଣ୍ଣାକୁଲମ୍ ଜିଲ୍ଲାରେ ଫସି ରହିଥିବା ୧୬୯ ଜଣ ଓଡ଼ିଆ ଝିଅଙ୍କୁ ଏକ ଚାର୍ଟଡ୍ ବିମାନରେ ଭୁବନେଶ୍ୱର ଫେରାଇ ଆଣିବାର ବ୍ୟବସ୍ଥା କରି ଓଡ଼ିଆଙ୍କ ହୃଦୟ ଜିଣି ଯାଇଛନ୍ତି ।

ଏର୍ଣ୍ଣାକୁଲମ୍ ର ଏକ କାରଖାନାରେ ସିଲେଇ ଏବଂ ଏମ୍ବ୍ରୋଡୋରି କାମ କରୁଥିବା ଓଡ଼ିଆ ଯୁବତୀମାନେ ଲକ୍ ଡାଉନ୍ କାରଣରୁ ଜୀବିକା ହରାଇ ଅସହାୟ ଅବସ୍ଥାରେ ଥିଲେ । ଅର୍ଥାଭାବରୁ ଘରକୁ ଫେରିବା ସେମାନଙ୍କ ପକ୍ଷେ ସମ୍ଭବ ନ ଥିଲା । ଭୁବନେଶ୍ୱରରେ ରହୁଥିବା ଜଣେ ବନ୍ଧୁଙ୍କଠାରୁ ଏମାନଙ୍କ ସମ୍ପର୍କରେ ସୂଚନା ପାଇଥିଲେ ସୋନୁ । ଅନ୍ୟ ବିକଳ୍ପ ନ ଥିବାରୁ ସେମାନଙ୍କୁ ବିମାନରେ ତୁରନ୍ତ ଘରକୁ ଫେରାଇ ଆଣିବା ପାଇଁ ଉଦ୍ୟମ ଆରମ୍ଭ କରିଥିଲେ । କୋଚି ରୁ ଭୁବନେଶ୍ୱର ମଧ୍ୟରେ ବିମାନ ଚଳାଚଳ କରୁ ନ ଥିଲେ ମଧ୍ୟ କର୍ତ୍ତୃପକ୍ଷଙ୍କଠାରୁ ଆବଶ୍ୟକ ଅନୁମତି ଯୋଗାଡ଼ କରିଥିଲେ ସୋନୁ । ବେଙ୍ଗାଲୁରୁରୁ ସ୍ୱତନ୍ତ୍ର ବିମାନ କୋଚିରେ ପହଞ୍ଚି ୧୬୯ ଓଡ଼ିଆ ଝିଅଙ୍କୁ ଧରି ସକାଳେ ଭୁବନେଶ୍ୱର ଆସିଲା । ଅନ୍ୟମାନଙ୍କ ସହଯୋଗରେ ଭୁବନେଶ୍ୱରରୁ ସେମାନଙ୍କୁ ନିଜ ନିଜ ଘରେ ପହଞ୍ଚାଇବାର ବି ବ୍ୟବସ୍ଥା କରିଥିଲେ ସୋନୁ ।

ସୋନିଙ୍କ ଉଦ୍ୟମ ପଛରେ ରାଜ୍ୟ ସରକାର ଏବଂ ରାଜନଗରର ପୂର୍ବତନ ବିଧାୟକ ଅଂଶୁମାନ ମହାନ୍ତିଙ୍କର ମଧ୍ୟ ଯଥେଷ୍ଟ ସହଯୋଗ ଥିବା ପ୍ରବାସୀମାନେ କହିଛନ୍ତି ।

ଦୁର୍ଦ୍ଦଶାରେ ପଡ଼ିଥିବା ଶତାଧିକ ଓଡ଼ିଆ ଝିଅଙ୍କ ପାଇଁ ସୋନୁ ଏକ ବିମାନ ଯୋଗାଡ଼ କରି କେରଳରୁ ଭୁବନେଶ୍ୱର ଆଣିବା ଖବର ଆଜି ଜାତୀୟ ଗଣମାଧ୍ୟମରେ ଛାଇ ହୋଇଯାଇଛି । ତାଙ୍କର ଏହି କାର୍ଯ୍ୟ ପାଇଁ ସବୁଆଡୁ ପ୍ରଶଂସାର ସୁଅ ଛୁଟିଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତାଙ୍କର ମାନବିକତାର ଉଚ୍ଚ ପ୍ରଶଂସା କରିଛନ୍ତି ।

ସୂଚନାଥାଉକି, ଲକ୍ ଡାଉନ୍ ଯୋଗୁଁ କାମଧନ୍ଦା ହରାଇ ମୁମ୍ବାଇ ସମେତ ମହାରାଷ୍ଟ୍ରର ବିଭିନ୍ନ ଅଞ୍ଚଳରେ ଫସି ରହିଥିବା ବିଭିନ୍ନ ରାଜ୍ୟର ପ୍ରବାସୀ ଶ୍ରମିକଙ୍କ ପାଇଁ ଦେବଦୂତ ସାଜିଛନ୍ତି ସୋନୁ ସୁଦ୍ । ନିଜ ଖର୍ଚ୍ଚରେ ବସ୍ ଯୋଗାଡ଼ କରି ଏମାନଙ୍କୁ ଘରକୁ ପଠାଉଛନ୍ତି । ଯେଉଁଠି ଟ୍ରେନ୍ ଆବଶ୍ୟକ ତାହାର ବି ବ୍ୟବସ୍ଥା କରୁଛନ୍ତି । ସୋନୁଙ୍କୁ ଏହି କାର୍ଯ୍ୟରେ ସହଯୋଗ କରୁଛନ୍ତି ତାଙ୍କ ପତ୍ନୀ ସୋନାଲି ଏବଂ ଦୁଇ ପୁଅ ଇଶାନ ଏବଂ ଆୟାନ୍ । ପ୍ରବାସୀ ଶ୍ରମିକଙ୍କ ପାଇଁ ସୋନୁ ଏକ ଟୋଲ୍ ଫ୍ରି ହେଲପ୍ ଲାଇନ୍ ନମ୍ବର ଜାରି କରିଛନ୍ତି । ପ୍ରତି କଲ୍ କୁ ପତ୍ନୀ ସୋନାଲି ନିଜେ ନୋଟ୍ କରୁଥିଲା ବେଳେ ଦୁଇ ପୁଅ ରୁଟ୍ ଚାର୍ଟ ପ୍ରସ୍ତୁତ କରୁଛନ୍ତି ।

ସଂପୃକ୍ତ ଶ୍ରମିକମାନଙ୍କ ଆବଶ୍ୟକୀୟ ଗସ୍ତ ଅନୁମତି ଏବଂ ଡାକ୍ତରୀ ପରୀକ୍ଷା ବ୍ୟବସ୍ଥା ଦୁଇ ଦିନ ଭିତରେ କରାଇ ସେମାନଙ୍କୁ ବସ୍ ରେ ଭିଟାମାଟି ପଠାଉଛନ୍ତି ସୋନୁ । ଘରେ ପହଞ୍ଚିଲା ପର୍ଯ୍ୟନ୍ତ ସେମାନଙ୍କ ଖାଇବା ପିଇବାର ବନେ୍ଦାବସ୍ତ ମଧ୍ୟ କରୁଛନ୍ତି । ଏହାର ସମସ୍ତ ଖର୍ଚ୍ଚ ସୋନୁ ନିଜେ ବୁଝୁଛନ୍ତି । ପ୍ରବାସୀ ଶ୍ରମିକ ଯିଏ ବି ତାଙ୍କୁ ସାହାଯ୍ୟ ମାଗୁଛନ୍ତି କାହାରିକୁ ହତାଦର କରୁନାହାନ୍ତି । ୫୦ ହଜାରରୁ ଅଧିକ ଶ୍ରମିକଙ୍କୁ ଭିଟାମାଟି ପଠାଇବା ପାଇଁ ନିଜେ ପ୍ରସ୍ତୁତ ହୋଇଛନ୍ତି ।

ମାଇଲ୍ ମାଇଲ୍ ରାସ୍ତାରେ ଚାଲି ଅକଥନୀୟ ଦୁର୍ଦ୍ଦଶା ଭୋଗିବାକୁ କାହାରିକୁ ଦେବେ ନାହିଁ । ଶେଷ ପ୍ରବାସୀ ଜଣଙ୍କ ଘରେ ନ ପହଞ୍ଚିଲା ପର୍ଯ୍ୟନ୍ତ ବିଶ୍ରାମ ନେବେ ନାହିଁ ବୋଲି କହିଛନ୍ତି ସୋନୁ ସୁଦ୍ ।