ଭୁବନେଶ୍ୱର: “ପ୍ରଥମେ କିଣାଯିବ । ଯଦି କିଣି ନହେଉଛନ୍ତି, ତାହେଲେ ଅପମାନିତ କର । ଯଦି ଅପମାନରେ ବି ଥଣ୍ଡା ନପଡୁଛନ୍ତି, ତା’ହେଲେ ଚାବୁକ୍ ମାର ।”
ୟେ’ ହେଉଛି ସାମ୍ବାଦିକଙ୍କୁ ଚୁପ୍ ରଖିବା ପାଇଁ ବିଜେପିର ନୂଆ ବ୍ଲୁ ହ୍ୱେଲ୍ ଗେମ୍ । ଏ ନୂଆ ଗେମରେ ସେମାନେ ପ୍ରଥମେ ପ୍ରଲୋଭିତ କରି ପରେ କ୍ଷତାକ୍ତ କରିବେ । ଏ ଚାଲ୍ ଧୀରେ ଧୀରେ ପଦାକୁ ଫୁଟି ବାହାରି ଆସିଲାଣି । “ମିଡ଼-ଡେ ଓଡ଼ିଶା” ହାତରେ ଯେଉଁ କ୍ଲିପ୍ଲିଂ ଲାଗିଛି, ତାହା ସଜ୍ଜନ ଶର୍ମା ସେଦିନ ଭରା ସାମ୍ବାଦିକ ସମ୍ମିଳନୀରେ କହିଥିଲେ । ଆପଣ ଜାଣିବା ପାଇଁ ଏହା ଆମେ ଏଠାରେ ପେଶ୍ କରୁଛୁ । ସାମ୍ବାଦିକ ସମ୍ମିଳନୀରେ ଥିବା କିଛି ବରିଷ୍ଠ ସ୍ତମ୍ଭକାର ଓ ଆକ୍ରିଡେଟେଡ୍ ସାମ୍ବାଦିକଙ୍କ ପାଇଁ ସଜ୍ଜନ ଖୋଲା ଧମକ ଦେଇଥିଲେ । ସାମ୍ବାଦିକ ସମ୍ମିଳନୀ ଛାଡି, ପାଖ ୱେଟିଂ ରୁମରେ ବସ । କାରଣ ଏମାନେ ଡାଇରେକ୍ଟ୍ ରିପୋର୍ଟିଂ କରନ୍ତି ନାହିଁ କିମ୍ବା ବିଜେପି ମିଡ଼ିଆ ସେଲ୍ ସହ ଏମାନଙ୍କର ସଂପର୍କ ନାହିଁ । ଖାଲି ସେତିକି ନୁହେଁ, ଡାଏସ୍ ରୁ ଯାହା ନିର୍ଦ୍ଦେଶ ଯିବ ତାକୁ ସାମ୍ବାଦିକମାନେ ମାନିବାକୁ ସଜ୍ଜନ ପରୋକ୍ଷରେ ଧମକ ଦେଇଥିଲେ ।
ଏପରି ଅବିଶ୍ୱସନୀୟ କାଣ୍ଡ କେବେ ବି ହୋଇ ନଥିଲା । କିନ୍ତୁ ସଜ୍ଜନ ଏ ସାହାସ କରିଛନ୍ତି । ଏ ସାହାସ କାହିଁକି କରିଛନ୍ତି ସେଦିନ ସଂଧ୍ୟାରେ(୭ ସେପ୍ଟେମ୍ବର) ଅମିତ ଶାହାଙ୍କ ଡିନର୍ ପାର୍ଟି ଓ ଏଡିଟର୍ସ ମିଟ୍ ରୁ ସ୍ପଷ୍ଟ ହୋଇଥିଲା । ଜଣ ଜଣ କରି ଡାକି ସେଦିନ ନିବୃତ୍ତ ରୁମ୍ ରେ ଧର୍ମେନ୍ଦ୍ର କଥା ହୋଇଥିଲେ । ବିଜେପି ମିଡ଼ିଆ ସେଲ୍ (ଧର୍ମେନ୍ଦ୍ରଙ୍କ ଟିମ୍) ଯେଉଁ ଇସ୍ୟୁ ଉଠେଇବ, ତାହା ହିଁ ବ୍ରେକିଂ ନିଉଜ୍ ଓ ଜନତା ମଂଚ ହେବ ବୋଲି କୁହାଗଲା । ଖାଲି ସେତିକି ନୁହେଁ, କେଉଁ ଟିଭି ବିତର୍କକୁ କାହାରିକୁ ଡକାଯିବ, କାହାକୁ ଡକା ନ ଯିବ ମିଡ଼ିଆ ସେଲ୍ ତାହା ସ୍ଥିର କରିବ ବୋଲି ନିର୍ଦ୍ଦେଶ ରହିଲା । ଏହାର ବଦଳରେ…ଯାହା ଚାହିଁବ ବୋଲି ମଧ୍ୟ ଖୋଲାଖୋଲି କୁହାଯାଇଥିବା ବିଶ୍ୱସ୍ତ ସୂତ୍ରରୁ ଜଣାପଡ଼ିଛି । ଅମିତ୍ ଶାହାଙ୍କ ସାନ୍ନିଧ୍ୟ ପାଇଥିବା ଏଡିଟର ଏହାକୁ କିଭଳି ଗ୍ରହଣ କରିଛନ୍ତି ତାହା ଆମକୁ ମାଲୁମ୍ ନାହିଁ । ତେବେ ସୋମବାର ସଂଧ୍ୟାରେ ମନୋଜ ନାୟକଙ୍କ ଟିଭି ଚାନେଲ୍ ରେ ପ୍ରାୟୋଜିତ ଖୋଲା ବିତର୍କ ବିଜେପି ମିସନ୍ ର ସଫଳ ଉଦ୍ୟମକୁ ପଦାରେ ପକାଇଛି ।
ସବୁଠାରୁ ଉଦବେଗ୍ ର କଥା, ମାଲିକ,ଏଡିଟର,ସାମ୍ବାଦିକଙ୍କୁ ପ୍ରଲୋଭିତ କରି କାର୍ଯ୍ୟକ୍ରମ ଓ ରିପୋର୍ଟ ପ୍ରସ୍ତୁତି ପାଇଁ ଧମକ ଦିଆଯାଉଥିଲେ ମଧ୍ୟ ରାଜ୍ୟରେ ଥିବା ସାମ୍ବାଦିକ ସଂଘଗୁଡ଼ିକ ଚୁପ୍ ରହିଛନ୍ତି । ଓଡ଼ିଶା ସାମ୍ବାଦିକତା ଯୁଗରେ ଏପରି କଳା ଯୁଗ କେବେ ବି ଆସି ନଥିଲା ବୋଲି ଅନେକ ବରିଷ୍ଠ ସାମ୍ବାଦିକ କହିଛନ୍ତି । ତେବେ ବିଜେପିର ଏ ବ୍ଲୁ ହ୍ୱେଲ୍ ଗେମକୁ ପ୍ରତିରୋଧ କରିବା ପାଇଁ କିଛି ଏଡିଟର,ସାମ୍ବାଦିକ ଆଗେଇ ଆସିବା ନିଶ୍ଚିତ ଭାବେ ଆଶାର କିରଣ ସୃଷ୍ଟି କରିଛି ।
